റീ റിലീസിനൊരുങ്ങി വല്യേട്ടൻ: സോഷ്യൽ മീഡിയയിൽ തരംഗമായി 4k ട്രെയിലർ

കൊച്ചി > മമ്മൂട്ടി ചിത്രം ‘വല്യേട്ടൻ’ റീ-റിലീസിന് ഒരുങ്ങുന്നു. നവംബർ 29നാണ് ചിത്രം തിയറ്ററിലെത്തുന്നത്. ചിത്രത്തിന്റെ 4K ട്രെയിലർ സോഷ്യൽ മീഡിയയിൽ തരം​ഗമായി. യൂട്യൂബിൽ ട്രെൻഡിങ് ലിസ്റ്റിൽ രണ്ടാമതാണ് വല്യേട്ടൻ ട്രെയിലർ. അമ്പലക്കര ഫിലിംസിന്റെ ബാനറിൽ 24 വർഷത്തിനു ശേഷം മാറ്റിനി നൗവാണ് 4K ദൃശ്യമികവോടെയും ഡോൾബി ശബ്ദ സാങ്കേതികവിദ്യയോടെയും ചിത്രം വെള്ളിത്തിരയിലേക്ക് റീ-റിലീസിനെത്തിക്കുന്നത്. രഞ്ജിത്തിൻ്റെ തിരക്കഥയിൽ ഷാജി കൈലാസ് ഒരുക്കിയ ചിത്രത്തിൽ കേന്ദ്ര കഥാപാത്രമായ അറക്കൽ മാധവനുണ്ണിയായാണ് മമ്മൂട്ടി വേഷമിട്ടത്. ഷാജി കൈലാസ് -രഞ്ജിത്ത് കൂട്ടുകെട്ടിലെ ആദ്യ മമ്മൂട്ടി ചിത്രം കൂടിയാണിത്.

2000 സെപ്തംബർ പത്തിന് റിലീസ് ചെയ്ത ‘വല്യേട്ടൻ’ ആ വർഷത്തെ സൂപ്പർഹിറ്റ് ചിത്രങ്ങളിൽ ഒന്നായിരുന്നു. ആവേശം നിറയ്ക്കുന്ന കഥയ്ക്കും ശ്രദ്ധേയമായ പ്രകടനങ്ങൾക്കുമൊപ്പം ആരാധകർ ഏറ്റുപാടിയ ഗാനങ്ങളുമായിരുന്നു ചിത്രത്തിന്റെ സക്സസ് ഫോർമുല. ശോഭന, സിദ്ദിഖ്, മനോജ് കെ ജയൻ, പൂർണിമ ഇന്ദ്രജിത്ത്, ഇന്നസെൻ്റ്, എൻ എഫ് വർഗീസ്, കലാഭവൻ മണി, വിജയകുമാർ, സുധീഷ് തുടങ്ങി നെടുനീളൻ താരനിര തന്നെ ചിത്രത്തിൻ്റെ ഭാഗമായിരുന്നു. പൊന്നിയിൻ സെൽവൻ, ബർഫി, തമാശ, ദശാവതാരം തുടങ്ങിയ ചിത്രങ്ങളുടെ ഛായാഗ്രഹകനായ  രവി വർമ്മനാണ് ഛായാഗ്രഹണം നിർവഹിച്ചത്. പശ്ചാത്തല സംഗീതം- രാജാമണി. ഗിരീഷ് പുത്തഞ്ചേരിയുടെ വരികൾക്ക് സംഗീതം നൽകിയത് മോഹൻ സിത്താരയാണ്. ചിത്രസംയോജനം എൽ ഭൂമിനാഥനും കലാസംവിധാനം നിർവഹിച്ചത് ബോബനുമാണ്.

ചിത്രത്തിന്റെ സംഗീത സംവിധാനം റീ- മാസ്റ്റർ ചെയ്തിരിക്കുന്നത് ബെന്നി ജോൺസനാണ്. ഡോൾബി അറ്റ്മോസ് മിക്സിങ് ചെയ്തത് എം ആർ രാജകൃഷ്ണൻ. ധനുഷ് നയനാരാണ് സൗണ്ട് ഡിസൈനിങ്. ടീസറും ട്രെയിലറും എഡിറ്റ് ചെയ്തത് കാർത്തിക് ജോഗേഷ്.  ഡോ. സംഗീത ജനചന്ദ്രനാണ് (സ്റ്റോറീസ് സോഷ്യൽ) മാർക്കറ്റിങ് ആൻഡ് കമ്മ്യൂണിക്കേഷൻസ് നിർവഹിക്കുന്നത്.  ചിത്രത്തിന്റേതായി മുമ്പ് പുറത്തിറങ്ങിയ ടീസറും പോസ്റ്ററുകളുമെല്ലാം ആരാധകർ ഏറ്റെടുത്തിരുന്നു.