21 September Saturday

നിങ്ങൾക്കെന്നെക്കുറിച്ച് എന്തെല്ലാം മുൻവിധിയുണ്ടെങ്കിലും ഞാനത് കാര്യമാക്കുന്നില്ല-': സമീര റെഡ്ഡി

വെബ് ഡെസ്‌ക്‌Updated: Friday Jul 12, 2019

 

രണ്ടാമത്തെ കുഞ്ഞിന് ജന്മംനൽകാനുള്ള കാത്തിരിപ്പിലാണ് സമീര റെഡ്ഡി. "ഏറെ പ്രതീക്ഷയോടെ ആനന്ദത്തോടെ കാത്തിരിക്കുന്നു, നിങ്ങൾക്കെന്നെക്കുറിച്ച് എന്തെല്ലാം മുൻവിധിയുണ്ടെങ്കിലും ഞാനത് കാര്യമാക്കുന്നില്ല-' സമീര ഇൻസ്‌റ്റഗ്രാമിൽ കുറിച്ചു.

ബോളിവുഡിലും തെന്നിന്ത്യയിലും ഏറെ ശ്രദ്ധിക്കപ്പെട്ട താരം 2014ൽ വിവാഹത്തോടെ സിനിമ വിട്ടതാണ്. 2015ൽ ആദ്യ കുഞ്ഞിന് ജന്മംനൽകി. ഗർഭകാലത്തോടെ ശരീരഭാരം കൂടിയ സമീറയുടെ ചിത്രങ്ങൾ സാമൂഹ്യമാധ്യമങ്ങളിലെ "സൗന്ദര്യാരാധകർക്ക്' ഒട്ടും സഹിക്കാനായില്ല.

ബോളിവുഡ് താരം തടിവച്ചതിനെച്ചൊല്ലി നീണ്ട വാദപ്രതിവാദങ്ങൾ തന്നെ സാമൂഹ്യമാധ്യമങ്ങളിൽ അരങ്ങേറി. അപമാനകരമായ പരാമർശങ്ങൾക്ക് ശക്തമായ മറുപടിയാണ് സമീറ നൽകിയത്. തന്റെ ഗർഭകാല ചിത്രങ്ങൾ സാമൂഹ്യമാധ്യമങ്ങളിൽ ചങ്കൂറ്റത്തോടെ പങ്കുവച്ചുകൊണ്ടായിരുന്നു അത്. പെണ്ണിന്റെ സൗന്ദര്യത്തിന് മാർക്കിടാൻ ഇരിക്കുന്നവരുടെ നെറ്റി ചുളുവിപ്പിച്ചുകൊണ്ടാണ് സമീര നിറവയർ ചിത്രങ്ങൾ പങ്കുവയ്ക്കുന്നത്.

കുടുംബത്തിലെ ഏഴാംമാസ ആഘോഷച്ചടങ്ങുകളും പിന്നാലെ പുറത്തുവിട്ടു. മേയ്ക്ക് അപ് ഒന്നുമില്ലാതെ "ഇതാണ് ഞാൻ' എന്ന് പ്രഖ്യാപിച്ച് വീഡിയോയും കഴിഞ്ഞദിവസം അവർ ഇറക്കി. " ഞാൻ ഗർഭകാലം ആഘോഷിക്കുകയാണ്. വിരിയാൻ കൊതിക്കുകയാണ് ഞാൻ', സമീര പറയുന്നു.

മോഡലിങ് രംഗത്ത് തിളങ്ങിയ സമീറ, പങ്കജ് ഉധാസിന്റെ ആഹിസ്ത എന്ന സംഗീത ആൽബത്തിലൂടെയാണ് ആദ്യം ശ്രദ്ധിക്കപ്പെടുന്നത്. ഡർന മനാ ഹെ, മുസാഫിർ,  റേസ് തുടങ്ങിയ ചിത്രങ്ങളിലൂടെ ബോളിവുഡിൽ ശ്രദ്ധിക്കപ്പെട്ട നടി, ഗൗതം വാസുദേവ് മേനോന്റെ വാരണം ആയിരത്തിലൂടെയാണ് തെന്നിന്ത്യയിൽ തരംഗമാകുന്നത്.

വെടി, വേട്ടൈ, നടുസിനി നായ്കൾ തുടങ്ങിയ ചിത്രങ്ങളും ശ്രദ്ധിക്കപ്പെട്ടു. തെലുങ്കിലും നിരവധി ശ്രദ്ധേയചിത്രങ്ങളിൽ വേഷമിട്ടു. ഒരുനാൾവരും എന്ന മോഹൻലാൽ ചിത്രത്തിലൂടെ മലയാളത്തിലും എത്തി. ഇരുചക്രവാഹന വ്യവസായിയായ അക്ഷയ് വാർദ്രയാണ് ഭർത്താവ്.


പ്രധാന വാർത്തകൾ
 Top