12 November Tuesday

മാമാങ്കത്തിന്റെ നിർമാണംതന്നെ ചരിത്രസംഭവമെന്ന്‌ മമ്മൂട്ടി; ഓഡിയോ പ്രകാശനം നടന്നു

വെബ് ഡെസ്‌ക്‌Updated: Monday Oct 21, 2019

മെഗാസ്റ്റാര്‍ മമ്മൂട്ടി നായകനായി ഒരുങ്ങുന്ന മാമാങ്കം സിനിമയുടെ സംഗീതം ഇനി നമ്മുടെ സ്വന്തം. ചിത്രത്തിന്‍റെ റിലീസിനായുളള കാത്തിരിപ്പിന്‍റെ എരിതീയിൽ എണ്ണയൊഴിച്ച് മാമാങ്കം ഓഡിയോ പ്രകാശനവും മേക്കിങ് വീഡിയോ അവതരണവും കൊച്ചിയില്‍ നടന്നു. ജസ്റ്റിസ് സിറിയക് ജോസഫിനും സംവിധായകൻ ഹരിഹരനും സിഡി മാതൃക കൈമാറിക്കൊണ്ട് ചിത്രത്തിലെ നായകനായ മമ്മൂട്ടിയാണ് ഓഡിയോ പ്രകാശനം നിര്‍വ്വഹിച്ചത്.

മാമാങ്കം ഒരു വലിയ ചരിത്രമാണെന്നും ചരിത്രം പറയുന്ന സിനിമയാണെന്നും ഇതിന്‍റെ നിര്‍മ്മാണം തന്നെ ഒരു വലിയ ചരിത്രമാണെന്നും നടൻ മമ്മൂട്ടി പറഞ്ഞു. ചരിത്രമാകാന്‍ പോകുന്നൊരു സിനിമയാണ്. ഈ സിനിമയുടെ വലിയ ഭാഗ്യം  ഈ സിനിമയുടെ നിര്‍മ്മാതാവാണ്. നിലവില്‍ മലയാളസിനിമയിൽ തന്നെ ഏറ്റവും കൂടുതല്‍ ചിലവ് ചെയ്ത സിനിമയാണ്. നിര്‍മ്മാതാവ് വേണു കുന്നപ്പിള്ളിയാണ് ഈ സിനിമയുടെ വലിയ ശക്തി. കഴിഞ്ഞ രണ്ടര വര്‍ഷത്തോളമായി അദ്ദേഹം ഈ പ്രൊജക്ടിന് പിന്നാലെയാണ്. അദ്ദേഹം ഒരു വ്യവസായ പ്രമുഖനാണ്. പൂര്‍ണ്ണമായും ഈ സിനിമയുടെ തിരക്കഥയോട് നീതി പുലര്‍ത്തും വിധം നിര്‍മ്മിക്കാന്‍ അദ്ദേഹത്തിനായിട്ടുണ്ടെന്നും മമ്മൂട്ടി വ്യക്തമാക്കി.

ഒരു ചാവേറിന്‍റെ മനോ വ്യാപാരത്തോടെ വേണുവും പത്മകുമാറും ഈ സിനിമയ്ക്കായി മുന്നിട്ടിറങ്ങിയത് ഏറെ ശ്ലാഘനീയമാണെന്ന് മുഖ്യാതിഥിയായെത്തിയ ജസ്റ്റിസ് സിറിയക് ജോസഫ് പറഞ്ഞു. വടക്കന്‍ വീരഗാഥയില്‍ സംവിധാനം പഠിക്കാന്‍ വന്നൊരു ചെറുക്കന്‍ കേരളത്തിലെ ഏറ്റവും വലിയ ചിത്രം സംവിധാനം ചെയ്തിരിക്കുകയാണ്, ഏറെ അഭിമാനം സന്തോഷമെന്ന് സംവിധായകൻ ഹരിഹരന്‍ പറഞ്ഞു.  മമ്മൂട്ടി മത്സരിക്കുന്നത് ഷാരുഖിനോടോ സല്‍മാനോടോ ഒന്നും അല്ല ലോകസിനിമയിലെ മഹാനടന്മാരോടാണെന്നും മാമാങ്കം മലയാള സിനിമയെ ഒരുപടികൂടി മുന്നോട്ട് നയിക്കുമെന്നും അദ്ദേഹം കൂട്ടിചേര്‍ത്തു.

തന്‍റെ ജീവിതത്തിൽ ഏറെ സംഭവബഹുലമായ ദിവസമാണിതെന്നും ദുബായിയില്‍ ബിസിനസ് ചെയ്തിരുന്നൊരാളായ താന്‍ ഈ സിനിമ നിര്‍മ്മിക്കാനിറങ്ങിയത് ഗുണമായോ ദോഷമായോ സിനിമ ഇറങ്ങികഴിയുമ്പോള്‍ പ്രേക്ഷകര്‍ തീരുമാനിക്കുമെന്ന് നിര്‍മ്മാതാവ് വേണു കുന്നപ്പിള്ളി പറഞ്ഞു.

തന്‍റെ ഗുരുക്കന്മാരടക്കമുള്ള സദസ്സിൽ സംസാരിക്കാന്‍ വാക്കുകള്‍ക്ക് ക്ഷാമമുണഅടെന്നും ഏറെ അഭിമാനത്തോടെ ഇവിടെ നില്‍ക്കുന്നതെന്നും 30 വര്‍ഷങ്ങള്‍ക്ക് മുമ്പ് ഹരിഹരന്‍ സാറിനൊപ്പം വടക്കന്‍ വീരഗാഥയില്‍ അസി.ഡയറക്ടറായി തുടങ്ങിയ താന്‍  ഇപ്പോള്‍ മാമാങ്കം സംവിധായകനായി ഇവിടെ നിൽക്കുകയാണെന്നും ഈ സിനിമ തനിക്കൊരു സ്വപ്‌നം പോലെയാണെന്നും സംവിധായകൻ എം. പത്മകുമാര്‍ പറഞ്ഞു. മലയാളത്തിലെ മറ്റൊരു സിനിമയും അനുഭവിച്ചിട്ടില്ലാത്തത്രയും ദുര്‍ഘടമായ പാതയിലൂടെ കടന്നുപോയ ഒരു ചിത്രമാണിതെന്നും ആ സമയത്ത് കൂടെനിന്ന ഏവര്‍ക്കും നന്ദി പറയുന്നുവെന്നും പത്മകുമാര്‍ കൂട്ടിച്ചേര്‍ത്തു.

എറണാകുളം എം.പി ഹൈബി ഈഡൻ, സംവിധായകൻ ലാല്‍ ജോസ്, മുന്‍ എം.പി പി.രാജീവ്, മാമാങ്കം സംവിധായകന്‍ എം. പത്മകുമാര്‍, നിര്‍മ്മാതാവ് വേണു കുന്നപ്പിള്ളി, നടിമാരായ പ്രാചി തെഹ്ലാന്‍, അനു സിത്താര നടന്മാരായ ഉണ്ണി മുകുന്ദന്‍, സണ്ണി വെയ്ൻ, സുരേഷ് കൃഷ്ണ, മണികണ്ഠൻ ആചാരി, ബൈജു എഴുപുന്ന, അച്യുതന്‍, സുദേവ് നായര്‍,  തിരക്കഥാകൃത്ത് ശങ്കര്‍ രാമകൃഷ്ണൻ, സംഗീത സംവിധായകന്‍ എം.ജയചന്ദ്രൻ, സോഹൻ റോയ്, ലിബര്‍ട്ടി ബഷീര്‍ തുടങ്ങി നിരവധി പേര്‍ ചടങ്ങിൽ സന്നിഹിതരായിരുന്നു.  നടന്‍ ടൊവീനോയും നടി സംയുക്ത മേനോനും ചേര്‍ന്ന് ചിത്രത്തിന്‍റെ മേക്കിങ്ങ് വീഡിയോ അവതരിപ്പിച്ചു.


പ്രധാന വാർത്തകൾ
 Top