24 August Saturday

മേഹൂ സിംബ, മുസാഫാ കാ ബേട്ട; ഇതാ "മുസാഫയുടെ മകൻ സിംബ'

വെബ് ഡെസ്‌ക്‌Updated: Saturday Jul 13, 2019

ലയൺ കിങ്ങിന്റെ പുതിയ സിനിമയ‌്ക്കായി കാത്തിരിക്കാൻ ആരാധകർക്ക‌് ഒരു കാരണംകൂടി. മുസാഫയും സിംബയുമായി ഇത്തവണ എത്തുന്നത‌് കിങ‌് ഖാനും മകനുമാണ‌്. ലോകംമുഴുവൻ ആരാധകരുള്ള ലയൺ കിങ്ങിനായി ശബ്ദം നൽകാനായതിലെ സന്തോഷം പങ്കുവയ‌്ക്കുകയാണ‌് ഷാരൂഖ‌് ഖാൻ. ഇന്ത്യയിൽ ഈ ചിത്രം എത്തുമ്പോഴാണ‌് ബോളിവുഡ‌് ബാദുഷയുടെ ശബ്ദം മുസാഫയ‌്ക്ക‌് കിട്ടുന്നത‌്. സിംബയാകുന്നത‌് മകൻ ആര്യൻ ഖാന്റെ ശബ്ദവും. ചിത്രത്തിലെ ആര്യന്റെ ഡബ്ബിങ‌് വീഡിയോ കഴിഞ്ഞദിവസം ഷാരൂഖ‌് പുറത്തുവിട്ടിരുന്നു. ഇതോടെ ആവേശത്തിലായ ആരാധകർ വീഡിയോയ്ക്കുതാഴെ സന്തോഷം പങ്കുവച്ചു. ഷാരൂഖിന്റെയും ആര്യന്റെയും ശബ്ദങ്ങളിലെ സാമ്യതയാണ് പലരും ചൂണ്ടിക്കാട്ടിയത‌്. മകന്റെ ഡബ്ബിങ‌് വീഡിയോ ഷാരൂഖ‌് ട്വിറ്ററിലൂടെയാണ‌് പങ്കുവച്ചത്. "മേരാ സിംബ' എന്ന അടിക്കുറിപ്പോടെ. മേഹൂ സിംബ, മുസാഫാ കാ ബേട്ട എന്ന് തുടങ്ങുന്നതാണ‌് വീഡിയോ. നേരത്തെയും ഷാരൂഖും ആര്യനും ഒരുമിച്ച‌് ഡബ‌് ചെയ‌്തിട്ടുണ്ട‌്.
ഇൻക്രെഡിബിൾ എന്ന ഹോളിവുഡ് ചിത്രത്തിനുവേണ്ടിയായിരുന്നു ഇത‌്.

"മകനൊപ്പം ജോലിചെയ്യാൻ സാധിച്ചതിൽ വളരെ സന്തോഷവാനാണ‌് ഞാൻ. തികച്ചും വ്യക്തിപരമായ സന്തോഷം. ഞാനൊരു പ്രൊഫഷണലാണ‌് ഇക്കാര്യത്തിൽ. പക്ഷേ, മകൻ അങ്ങനെയല്ല, അതിനാൽത്തന്നെ അവനുമൊന്നിച്ച‌് ഇത്തരത്തിൽ സഹകരിക്കാനായതിൽ പിതാവ‌് എന്ന നിലയിൽ ഞാൻ ഏറെ സന്തുഷ്ടനാണ‌്. ഇൻക്രെഡിബിൾ ചെയ്യുമ്പോൾ ആര്യന‌് ഒമ്പതുവയസ്സായിരുന്നു. അവന്റെ ശബ്ദവും അത്രയും മധുരതരമായിരുന്നു. എന്നാലിപ്പോൾ അതിലേറെയും'–- ഷാരൂഖ‌് കുറിച്ചു.

സംവിധായകൻ ജോൺ ഫവ്രോ ഒരുക്കുന്ന ലയൺ കിങ്, ഡിസ്നിയുടെ പ്രോസ്തെറ്റിക് കംപ്യൂട്ടർ അനിമേറ്റഡ് റീമേക്കാണ്. 19ന് റിലീസ് ചെയ്യും. 2016ല്‍ പുറത്തിറങ്ങിയ ജംഗിള്‍ ബുക്കിന്റെ വിജയത്തിനുശേഷം ജോൺ ഒരുക്കുന്ന അനിമേഷൻ ചിത്രമാണിത‌്.


പ്രധാന വാർത്തകൾ
 Top