20 August Tuesday

കട്ടപ്പനയിലെ ‘ആറ്റുകാൽ സുരൻ’

വെബ് ഡെസ്‌ക്‌Updated: Sunday Jul 14, 2019

എ സുൽഫിക്കർ
മുടി നീട്ടിവളർത്തിയ ആറ്റുകാൽ സുരൻ ‘പതിനെട്ടാംപടി’ നിറഞ്ഞു നിൽക്കുകയാണ‌്. “‘മലയാളം ടാക്കീസിൽ നീ എന്നെക്കൊണ്ട‌് തെലുങ്ക‌് പടം ഓടിപ്പിക്കുമല്ലേടാ’’ സുരന്റെ ആക‌്ഷൻ സീനിനെ ആരവങ്ങളോടെയാണ‌് പ്രേക്ഷകർ സ്വീകരിച്ചത‌്. ഇടുക്കി കട്ടപ്പനയിലെ കൊച്ചു ഗ്രാമത്തിൽനിന്ന‌് ശങ്കർ രാമകൃഷ‌്ണൻ സംവിധാനംചെയ‌്ത പതിനെട്ടാംപടിയിലൂടെ മലയാളസിനിമയിൽ ചുവടുറപ്പിക്കുകയാണ‌് അംബി നീനാസം.

ഒ എൻ വിയുടെ ‘ഭൂമിക്കൊരു ചരമഗീതം’ നാടകമാക്കിയപ്പോൾ മലയാള അധ്യാപകനായ എം എൻ ജോസഫാണ‌് നാടകവേദിയിലേക്ക‌് അംബിയെ നയിച്ചത‌്. പിന്നീട‌് കട്ടപ്പനയിയിലെ ദർശന ഫിലിം സൊസൈറ്റിയിലൂടെ നിരവധി നാടകങ്ങളിൽ അഭിനയിച്ചു. ‘ഒഴിവുദിവസത്തെ കളി’ നാടകമാണ‌് അംബിയുടെ വഴിത്തിരിവ‌്. നിരവധി അന്താരാഷ്ട്ര നാടകോത്സവ അരങ്ങുകളിലേക്ക‌് കയറാനായി. നാടകം ലഹരിയായ അംബി നേരെ തിരുവനന്തപുരത്തേക്ക‌് വണ്ടികയറി. മാലാ പാർവതിക്കും എം ജെ ജ്യോതിഷിനുമൊപ്പം നാലുവർഷം നാടക അരങ്ങുകളിൽ. തുടർന്ന‌് ഇവരുടെ സഹായത്തോടെ കർണാടകത്തിലെ തിയറ്റ‌ർ സ‌്കൂൾ

നീനാസത്തിലേക്ക‌്. തിയറ്റർ പഠനം കഴിഞ്ഞ‌് വീട്ടിലെ വിളിപ്പേര‌് അംബിയോടൊപ്പം നീനാസവും കൂടെക്കൂട്ടി മടക്കം. ‌സനൽകുമാർ ശശിധരന്റെ ‘ഉന്മാദങ്ങളുടെ രാത്രി’യിൽ അഭിനയിക്കുമ്പോഴാണ‌് ‘പതിനെട്ടാംപടി’ യുടെ അവസരം വന്നത്. അങ്ങനെ ആറ്റുകാൽ സുരനായി. സിനിമയിൽ പുതിയ അവസരങ്ങളൊന്നുമായില്ലെന്ന‌് പറയുമ്പോഴും തെല്ലും നിരാശയില്ല അംബിക്ക‌്. കട്ടപ്പനയിൽ ഒരു നാടക തിയറ്റർ തുടങ്ങണം, പുതുതലമുറയ‌്ക്ക‌് പ്രചോദനമാകുന്ന നാടകങ്ങൾ അവതരിപ്പിക്കണം, ഒപ്പം സിനിമയുമെന്ന ആഗ്രഹം മാത്രമാണുള്ളത‌്. ആറ്റുകാൽ സുരന‌് ലഭിച്ച കൈയടിയാ‌ണ‌് അഭിനയജീവിതത്തിൽ പ്രചോദനം. അതിന‌് സഹായിച്ചത് തിയറ്റർ പശ്ചാത്തലവും ശങ്കർ രാമകൃഷ‌്ണനുമാണെന്നും അംബി പറഞ്ഞു.


പ്രധാന വാർത്തകൾ
 Top