സ്വർണവില ; 60,000 കടന്ന്‌ 
പവൻ , 22 ദിവസത്തിനുള്ളിൽ വർധിച്ചത് 3320 രൂപ

കൊച്ചി

സംസ്ഥാനത്ത് സ്വർണവില പവന്‌ 60,000 രൂപയിലധികമായി. ബുധനാഴ്‌ച പവന് 600 രൂപ വർധിച്ച്‌ 60,200 രൂപയും ​ഗ്രാമിന് 75 രൂപ വർധിച്ച് 7525 രൂപയുമായി. 2024 ഒക്ടോബർ 31 ലെ 59,640 രൂപ എന്ന റെക്കോഡാണ് മറികടന്നത്. ഡിസംബർ 31ന് 56,880 രൂപയിലേക്ക് താഴ്‌ന്ന്‌ 22 ദിവസത്തിനുള്ളിൽ 3320 രൂപയാണ് വർധിച്ചത്.

ഒരു പവൻ ആഭരണം വാങ്ങാൻ പണിക്കൂലിയും നികുതിയും ഹാൾമാർക്കിങ് നിരക്കും ഉൾപ്പെടെ കുറഞ്ഞത് 65,160 രൂപ വേണം. കുറഞ്ഞ പണിക്കൂലി അഞ്ചുശതമാനം എന്ന കണക്കിലാണിത്. ഉയർന്ന പണിക്കൂലിയുള്ള ആഭരണങ്ങൾക്ക് വില വീണ്ടും വർധിക്കും. 2024 ജനുവരി 22ന് 46,240 രൂപയായിരുന്നു പവൻവില.

അന്താരാഷ്ട്ര വിപണിയിൽ സ്വർണവില കുതിച്ചുയർന്നതാണ് സംസ്ഥാനത്തും വില ഉയർത്തിയത്‌. അമേരിക്കൻ പ്രസിഡന്റ് തെരഞ്ഞെടുപ്പിൽ ഡോണൾഡ് ട്രംപ് വിജയം ഉറപ്പിച്ചതോടെ അന്താരാഷ്‌ട്രവില ട്രോയ് ഔൺസിന് (31.1 ​ഗ്രാം) 2536 ഡോളറിലേക്ക് താഴ്‌ന്നിരുന്നു. ട്രംപ്‌ അധികാരമേറ്റെടുത്തതോടെ 2750 ഡോളറിലേക്ക് ഉയർന്നു.