14 August Friday

പ്രതാപം വീണ്ടെടുക്കാൻ കേരള ടൂറിസം

ഡോ. കെ എസ്‌ ചന്ദ്രശേഖർUpdated: Thursday Jun 11, 2020


മറ്റേതൊരു വിനോദസഞ്ചാരകേന്ദ്രവും  ലക്ഷ്യമിടുന്നതുപോലെ കേരളം ടൂറിസത്തിൽ നിരവധി അവാർഡുകൾ നേടിയിട്ടുണ്ട്. എന്നിരുന്നാലും, നമ്മുടെ സാധ്യതകൾ പൂർണമായി വിനിയോഗിക്കാൻ കഴിഞ്ഞിട്ടില്ല. സ്വിറ്റ്സർലൻഡ് പോലുള്ള ഒരു രാജ്യത്തുപോലും 2019 ജൂലൈയിൽ സന്ദർശിച്ച വിനോദ സഞ്ചാരികളുടെ എണ്ണം വളരെ കുറവാണ്. യൂറോപ്യൻ യൂണിയനുള്ളിൽ, തെക്കൻ, മെഡിറ്ററേനിയൻ യൂറോപ്പാണ് ഏറ്റവും കൂടുതൽ ആളുകൾ സന്ദർശിക്കുന്ന രാജ്യങ്ങൾ. ലോകത്തിലെ മികച്ച പത്ത് ലക്ഷ്യസ്ഥാനങ്ങളിൽ അഞ്ചെണ്ണം യൂറോപ്യൻ യൂണിയനിലാണ്.

കേരള ടൂറിസത്തിന്റെ കണക്കനുസരിച്ച്, 2019 ൽ മൊത്തം സഞ്ചാരികളുടെ എണ്ണം 1,95,74,004 ആണ്. ഇതിൽ 1,83,84,233 ആഭ്യന്തര, 11,89,771 വിദേശ വിനോദ സഞ്ചാരികളുണ്ട്. മുൻവർഷത്തെ അപേക്ഷിച്ച് 17.2 ശതമാനം വളർച്ചയാണ്  കാണിക്കുന്നത്.  കേരളത്തിലേക്ക് യാത്ര ചെയ്യുന്നവരിൽ യുകെ, യുഎസ്എ, ഫ്രാൻസ്, ജർമനി, അറേബ്യ എന്നിവിടങ്ങളിലെ പൗരന്മാർ ഉൾപ്പെടുന്നു. സ്വീഡനിൽനിന്നും ഇറ്റലിയിൽനിന്നും വരുന്നവരും വർധിച്ചു. നിപാ വൈറസ് മൂലം  മന്ദഗതിയിലായിരുന്നുവെങ്കിലും സംസ്ഥാന സർക്കാരിന്റെ പെട്ടെന്നുള്ള ഇടപെടൽ വിനോദസഞ്ചാരികൾക്ക്  ആത്മവിശ്വാസമുണ്ടാക്കി. കൊറോണക്കാലത്തും കേരളത്തിൽ ആരോഗ്യ പ്രവർത്തകരുടെ ലഭ്യത, പരിശോധനാസംവിധാനം, ഹോം ക്വാറന്റൈൻ, തീവ്ര സമ്പർക്കം കണ്ടെത്തൽ, അതിഥിത്തൊഴിലാളികൾക്കായി ആയിരക്കണക്കിന് ഷെൽട്ടറുകൾ , കമ്യൂണിറ്റി അടുക്കള എന്നിവയും ആരോഗ്യം, ശുചിത്വം, മികച്ച നിലവാരം എന്നിവയുമായി കേരളം ലോകത്തിന്റെ ശ്രദ്ധ പെട്ടെന്ന് ആകർഷിച്ചു.

ഉൽ‌പ്പാദനത്തേക്കാൾ കൂടുതൽ ഉപഭോഗാവസ്ഥയുള്ള സംസ്ഥാനമാണ്‌. ലോക്‌ഡൗണിനുശേഷം കേരളത്തിലേക്ക് വരുന്നവരുടെ എണ്ണത്തിൽ വർധന ഉണ്ടായിരിക്കും.  ടൂറിസം രംഗത്ത് കേരളത്തിന് വലിയ സാധ്യതയുണ്ട്. ആയുർവേദത്തിനും പ്രകൃതിചികിത്സയ്ക്കും പേരുകേട്ട സംസ്ഥാനമായതിനാൽ യൂറോപ്പിലേക്ക് പോകുന്നവർ കേരളത്തിലേക്ക് വരാൻ തുടങ്ങും.


 

ആദ്യ സന്ദർശനത്തിൽ സഞ്ചാരിയെ സന്തോഷിപ്പിച്ചാൽ, കുറഞ്ഞ ചെലവ് കണക്കിലെടുത്ത് ആവർത്തിച്ചുള്ള സന്ദർശനത്തിനുള്ള സാധ്യതയുണ്ട്. കോർപറേറ്റ് ആശുപത്രികൾ പോലും ഇപ്പോൾ മെഡിക്കൽ ടൂറിസം സാധ്യതകൾക്കായി കാത്തിരിക്കുന്നു. ഇപ്പോൾ പകർച്ചവ്യാധിയോടെ, ഇന്ത്യയിലെ മെഡിക്കൽ ടൂറിസം വളരുമെന്ന് വ്യക്തമാണ്. കോവിഡ് 19 ന് ശേഷമുള്ള ഒരു മികച്ച അവസരമാണിത്. ആയുർവേദം ലോകമെമ്പാടും അറിയപ്പെടുന്നതിനാൽ ഭാവിയിലും സഞ്ചാരികളുടെ പട്ടികയിൽ ഉണ്ടാകും. വിദേശികൾക്ക് അനുയോജ്യമായ ഒരു പാക്കേജ് വാഗ്ദാനം ചെയ്യാൻ കഴിയുമെങ്കിൽ, അത് കൂടുതൽ യൂറോപ്യന്മാരെ ആകർഷിക്കും.  എല്ലാ ആയുർ‌വേദ അധിഷ്ഠിത റിസോർട്ടുകളും വെൽ‌നെസ് സെന്ററുകളും സംസ്ഥാന സർക്കാരിന്റെ  കീഴിൽ കൊണ്ടുവരേണ്ടതുണ്ട്.

നാം ടൂറിസം അടിസ്ഥാന സൗകര്യങ്ങൾ വികസിപ്പിക്കേണ്ടതുണ്ട്. ആരോഗ്യവും ശുചിത്വവും പ്രഥമ പരിഗണനയായിരിക്കണം. ഒരു വിദേശകുടുംബത്തിന് ഉചിതമായ പാക്കേജ് നൽകാൻ കഴിയുമെങ്കിൽ ലോക ടൂർ ഡയറിയിലെ അടുത്ത ലക്ഷ്യസ്ഥാനം കേരളമായിരിക്കും. വിമാനത്താവളങ്ങളും പ്രധാന ടൂറിസം കേന്ദ്രങ്ങളും ഹോട്ടലുകളും റിസോർട്ടുകളും തമ്മിൽ അടുത്ത ബന്ധവും ആവശ്യമാണ്.  കൊറോണയ്‌ക്കുശേഷമുള്ള അടുത്ത രണ്ട് വർഷം നമുക്ക്‌ നിർണായകമാണ്. ഈ സമയത്ത്, ആവശ്യമായ അടിസ്ഥാന സൗകര്യം സ്ഥാപിക്കാനും കേരളത്തെ സഞ്ചാരികളുടെ ഇഷ്‌ട കേന്ദ്രമായി  ഉയർത്താനും കഴിയുമെങ്കിൽ കൊറോണ നഷ്‌ടപ്പെടുത്തിയ പ്രതാപം വീണ്ടെടുക്കാം.

(കേരള സർവകലാശാലയിൽ ഐഎംകെ വിഭാഗം മേധാവിയാണ്‌ ലേഖകൻ)


ദേശാഭിമാനി ഇപ്പോള്‍ ടെലഗ്രാമിലും ലഭ്യമാണ്‌. കൂടുതല്‍ വാര്‍ത്തകള്‍ക്കും അപ്ഡേറ്റുകള്‍ക്കുമായി ടെലഗ്രാം ചാനല്‍ സബ്സ്ക്രൈബ് ചെയ്യാം.

മറ്റു വാർത്തകൾ

പ്രധാന വാർത്തകൾ
 Top