22 October Tuesday

ഗാന്ധിവധോത്സവം

രാവുണ്ണിUpdated: Saturday Feb 9, 2019

പരിവാര ശാഖയിൽ സൂര്യനമസ‌്കാരവും  ദണ്ഡനമസ‌്കാരവും അടിതടപരിശീലനവും കഴിഞ്ഞുള്ള  ജ്ഞാനയജ്ഞവേളയിൽ ഗുരുനമസ‌്കാരത്തോടെ ചരിത്രക്ലാസ് ആരംഭിക്കുന്നു. അടി –-- തട  ശേഷം  ചോദ്യം - ഉത്തരം.

-ആരാണ് ഗാന്ധി ?

അഹിംസാവാദി. അതിനാൽ  ഹിംസിക്കപ്പെടേണ്ടവൻ.
ഗുരു ചോദിച്ചു: ആരാണ് ഗാന്ധി ?

സ്വാതന്ത്ര്യ സമരനായകൻ. അതിനാൽ തുടച്ചുകളയേണ്ടവൻ സംശയമില്ലാതെ ശിഷ്യൻ പറഞ്ഞു. ഗുരുവിന് അഭിമാനമായി. അടുത്തയാളോട് ചോദിച്ചു.ആരാണ് ഗാന്ധി ?

മതേതരവാദി. അതിനാൽ കൊല്ലപ്പെടേണ്ടവൻഗുരുവിന് അഭിമാനമേറി. അടുത്തയാളോട് ചോദിച്ചു. ആരാണ് ഗാന്ധി ?

കീഴാളരെ ദൈവത്തിന്റെ മക്കളെന്ന് വിളിച്ചവൻ. അതിനാൽ പിച്ചിച്ചീന്തപ്പെടേണ്ടവൻ.
അടുത്തയാൾ -പറയൂ, ആരാണ് ഗാന്ധി ?

വർഗീയകലാപങ്ങൾ നടക്കുന്നിടത്തൊക്കെ പാഞ്ഞെത്തി ഒന്നിക്കൂ സ‌്നേഹിക്കൂ എന്നു നിലവിളിച്ചവൻ. അതിനാൽ പിച്ചിച്ചീന്തപ്പെടേണ്ടവൻ.
-ആരാണ് ഗാന്ധി ?

എല്ലാവർക്കും വസ്ത്രം കിട്ടുംവരെ എനിക്ക് വസ്ത്രം വേണ്ടെന്നു പറഞ്ഞവൻ. അതിനാൽ വെട്ടിനുറുക്കപ്പെടേണ്ടവൻ.
-ആരാണ് ഗാന്ധി ?

അധികാരത്തിൽ നിന്നൊഴിഞ്ഞു നടന്നവൻ. അതിനാൽ ധിക്കാരി. ഇല്ലാതാവേണ്ടവൻ. എന്റെ ജീവിതമാണ് എന്റെ സന്ദേശം എന്നു പറഞ്ഞവൻ.അതിനാൽ സന്ദേഹമില്ലാതെ തച്ചുതകർക്കപ്പെടേണ്ടവൻ. ഉപ്പു കുറുക്കിയവൻ.അതിനാൽ ഉപ്പായ് കുറുകേണ്ടവൻ.

നാവില്ലാത്തവനാവേണ്ടവൻ
കണ്ണില്ലാത്തവനാവേണ്ടവൻ
കൈയില്ലാത്തവനാവേണ്ടവൻ
കാലില്ലാത്തവനാവേണ്ടവൻ
ഉടലില്ലാത്തവനാവേണ്ടവൻ
ഉയിരില്ലാത്തവനാവേണ്ടവൻ
ആർഷഭാരത ഭൂമിയിൽ പിറക്കാൻ പാടില്ലാത്തവൻ.

ഠേ.... ഠേ..... ഠേ.

ഗുരു ആനന്ദോന്മത്തനായി. സന്യാസിമാർക്കെന്താ ആനന്ദവും ഉന്മാദവും പാടില്ലെന്നുണ്ടോ?  ആർത്തിയും കാമവും പകയും ഇല്ലാത്തവരാകണം സന്യാസിമാർ എന്ന് ചില മൂഢന്മാർ ഇക്കാലത്തും പറഞ്ഞുനടക്കുന്നുണ്ട്. മോഡിയേറിയ പുണ്യപുരാതന ഭാരത ഭൂമിയിൽ അതൊന്നും നടപ്പില്ല കേട്ടോ. മേൽപ്പറഞ്ഞവയെല്ലാം ഉൾക്കൊണ്ടവരാണ് ആധുനിക സന്യാസിമാർ. അവർ ഫാക്ടറി നടത്തും. കച്ചോടം ചെയ്യും. വിൽക്കും. വാങ്ങും.

ലാഭമുണ്ടാക്കും. ബാങ്കിലിടും. ഇൻകം ടാക്സ് റിട്ടേൺ കൊടുക്കും. എസി മന്ദിരം പണിയും. പരിചാരകരെ വയ‌്ക്കും. ഉദ്ഘാടനംചെയ്യും. സൃഷ്ടിക്കും. സ്ഥിതിയുണ്ടാക്കും. സംഹരിക്കും. ഭരിക്കും. സസ്പെൻഡ‌് ചെയ്യും. പൊട്ടിത്തെറിക്കും. വാളെടുക്കും. കോടതിയിൽ വക്കീലിനെവച്ചു വാദിക്കും. ജാമ്യത്തിലിറങ്ങും. സുഖിക്കും. നമ്മളും മോഡേണായി കേട്ടോ.

പകയും രോഷവും ഹിംസ്രവാസനയും അടക്കാനാകാത്ത ശുദ്ധാത്മാക്കളാകുന്നു ഇന്നത്തെ സന്യാസിമാർ. പ്രജാദേവിയും അസാറാം ബാപ്പുവും സന്ത് രാംപാലും ഭീമാനന്ദ മഹാരാജും ഗുർമിത് റാം റഹിം സിങ്ങും സന്തോഷ് മാധവനും തോക്കുസ്വാമിയും വടിവാൾ സ്വാമിയും ബോംബുസ്വാമിയുമൊക്കെയാണ് മോഡേൺ സന്യാസത്തിന്റെ അംബാസിഡർമാർ. അക്കൂട്ടത്തിലെ ഒരു മുന്തിയ ഇനമാകുന്നു പൂജാ ശകുൻ പാണ്ഡെ. തോക്കുകൊണ്ടാണ് പൂജ. ഒരു സ്റ്റെൺ ഗണ്ണെങ്കിലുമില്ലാതെ ഇക്കാലത്ത് എന്തൂട്ട് സന്യാസം?

ഇന്ത്യയെ പാകിസ്ഥാന‌് ബദൽ ഹിന്ദുസ്ഥാനാക്കി  മാറുന്നതിൽനിന്ന‌ു തടഞ്ഞ മഹാത്മാഗാന്ധിയെ ഒരുതവണ കൊന്നാൽ ആർക്കാണ് മതിവരിക? രഘുപതി രാഘവ സീതാറാം എന്നതു കൊള്ളാം. അവിടെ നിർത്തണം. പിന്നെ ഈശ്വര അള്ളാ എന്നൊക്കെ പാടാൻ തുടങ്ങിയാൽ ഏതു സന്യാസിക്കാണ് രക്തം തിളയ‌്ക്കാതിരിക്കുക?

ഈശ്വരാ എന്ന വിളിയേക്കാൾ മോഡേൺ സന്യാസിനിമാർക്കും സന്യാസിമാർക്കും കാതിനിമ്പം ....ഠേ....ഠേ....ഠേ.... ആകുന്നു. ഏതു കീർത്തനത്തേക്കാളും ഹൃദയഹാരിയാണത്. ഗാന്ധിയുടെ നെഞ്ചിൽ മൂന്നുതവണ വെടിയുണ്ട തുളച്ചുകയറുന്നതും ആ വൃദ്ധശരീരത്തിൽനിന്ന് കുടുകുടാ രക്തം ചീറ്റുന്നതും കാണുമ്പോൾത്തന്നെ കാവിമനസ്സിൽ അഭിമാനം വിജൃംഭിക്കും. വീണ്ടുംവീണ്ടും ഓർക്കാൻ തോന്നും. വീണ്ടുംവീണ്ടും കാണാൻ തോന്നും. മനോവിചാരം കാണുകാന്നല്ലാതെ നേരിൽ കാണാൻ യോഗിമാർക്കും യോഗിനിമാർക്കും യോഗല്ല്യാണ്ടായില്ലെ. പിന്നെന്താ ചെയ്യാ? സിബിഐക്കാര് ചെയ്യുന്ന പോലെ ഡ്യൂപ്പിനെയിട്ട് പരീക്ഷിക്ക്യന്നെ. മനസ്സിന്റെ ദാഹോം വിശപ്പും മാറണ്ടെ.

രക്തസാക്ഷി ദിനത്തിൽത്തന്നെ ഗാന്ധിയുടെ ഡ്യൂപ്പുണ്ടാക്കി. അനുയായികളായ ആനന്ദന്മാരെയും ആനന്ദിമാരെയും കൂട്ടി ഗാന്ധിയുടെ നേരെ വെടിയുതിർത്തു. ഠേ....ഠേ....ഠേ.... ഗാന്ധിരൂപത്തിൽനിന്ന് രക്തമൊഴുകി. എന്തൊരാഹ്ളാദം.. എന്തൊരാനന്ദം... ഇത്ര സന്തോഷം ബാബ‌്റി മസ്ജിദ‌് പൊളിച്ചപ്പോൾപോലും കിട്ടിയിട്ടില്ല കേട്ടോ. ഗോഡ്സെയുടെ ചിത്രത്തിൽ മാല ചാർത്തുകയും മധുരപലഹാരം വിതരണംചെയ്യുകയും ചെയ‌്ത‌് ഇന്നത്തെ ഗാന്ധി വധോത്സവം കെങ്കേമമാക്കി. ഇനിയുള്ള കാലത്ത് ഗോഡ്സെ തന്നെ ഗോഡ്. ആ മഹാൻതന്നെ മഹാത്മാ.

 

നമ്മുടെ വംശം ഇമ്മട്ടിൽ പെരുകിനിറയണം. ഗോകുലബാലന്മാരെയും നമുക്ക് ഇമ്മട്ടിൽ വളർത്തിയെടുക്കണം . മൊബൈലിലും കംപ്യൂട്ടറിലും ഗാന്ധിവധം ഗെയിം ഇൻസ്റ്റാൾ ചെയ്യുക. ബിർളാ ഹൗസിൽനിന്ന് പ്രാർഥനായോഗത്തിലേക്ക് ഗാന്ധി നടന്നുവരുന്നതും ഗോഡ്സേജി മുമ്പിൽ വന്നുനിന്ന് വന്ദിക്കുന്നതും ഒളിച്ചുവച്ച തോക്കെടുത്ത് വെടിയുതിർക്കുന്നതും.... മതി, അത്ര മതി. ഏറ്റവും കുറഞ്ഞ സമയംകൊണ്ട് മൂന്നു വെടിവച്ച് ഗാന്ധിയെ കൊന്നുവീഴ്ത്തുന്നവർക്ക് കൂടുതൽ പോയിന്റ്. നമ്മുടെ കുട്ടികളും മോഡേൺ ആവണ്ടെ ? ഒരു കാര്യം പ്രത്യേകം ശ്രദ്ധിക്കണം. ഗെയിം ഗാന്ധിയിൽ ഒതുക്കിനിർത്തരുത്. കൽബുർഗി, ധാബോൽക്കർ, പൻസാരെ, ഗൗരി ലങ്കേഷ് എന്നിങ്ങനെ ലിസ്റ്റിൽപ്പെട്ട ബുദ്ധിജീവികൾ, മുസ്ലിങ്ങൾ, ദളിതർ, മതേതര വാദികൾ എന്നിവരേയും ഗെയിമിൽ എടുക്കണേ.

രവി പൂജാരി, പൂജാ ശകുൻ പാണ്ഡെ, അസാറാം ബാപ്പു, ഗൂർമിത് തുടങ്ങിയ പേരുകൾ കേട്ടാൽ ഇതിൽ ആരാണ് സന്യാസി, ആരാണ് അധോലോക കൊലയാളി എന്നൊക്കെ മതിഭ്രമം വരും. സാരമില്ല. അടുത്ത ശാഖയിൽചെന്ന് സംശയനിവൃത്തി വരുത്തിക്കൊള്ളുവിൻ.


പ്രധാന വാർത്തകൾ
 Top