25 August Sunday

ഒസാക്ക നൽകുന്ന സന്ദേശം

ഡോ. ജോസഫ് ആന്റണിUpdated: Wednesday Jul 3, 2019


ആഗോളതലത്തിൽ അനേകം പ്രതിസന്ധികൾ നീറിനിൽക്കുന്ന പശ്ചാത്തലത്തിലാണ് ജപ്പാനിലെ ഒസാക്കയിൽ ജൂൺ 27നും 28നും വികസിത–--വികസ്വര രാജ്യങ്ങളുടെ കൂട്ടായ‌്മയായ ജി- 20  ഉന്നത തലസമ്മേളനം നടന്നത്. ആഗോള സമ്പദ‌്‌വ്യവസ്ഥയെത്തന്നെ അപകടകരമായി ബാധിച്ചുതുടങ്ങിയിരിക്കുന്ന പ്രശ‌്നങ്ങൾ നിരവധിയാണ‌്. ലോക സമ്പദ്‌വ്യവസ്ഥയിൽ ഒന്നും രണ്ടും സ്ഥാനക്കാരായ അമേരിക്കയും ചൈനയും തമ്മിലുള്ള വ്യാപാരയുദ്ധം, ഇറാനെതിരെ അമേരിക്ക നടത്തുന്ന ആക്രമണനീക്കം, അമേരിക്കയും ഇന്ത്യയും തമ്മിൽ നിലനിൽക്കുന്ന വ്യാപാരത്തർക്കം, റഷ്യക്കെതിരായ ഉപരോധങ്ങൾ, റഷ്യൻ മിസൈൽ വാങ്ങുന്നതുമൂലം തുർക്കിക്കും ഇന്ത്യക്കുംനേരെ അമേരിക്ക മുഴക്കുന്ന ഉപരോധഭീഷണി, വെനസ്വേലയ‌്ക്കെതിരായ അട്ടിമറിനീക്കം തുടങ്ങിയവ അവയിൽ ചിലതുമാത്രം. ഇവയിലെല്ലാം പൊതുവിൽ കാണാവുന്ന ഒരുകാര്യം എല്ലാ തർക്കങ്ങളുടെയും ഒരറ്റത്ത് അമേരിക്കയാണ‌് എന്നതാണ്. മേൽസൂചിപ്പിച്ച തർക്കങ്ങളെല്ലാം ഉടലെടുത്തത് ഡോണൾഡ് ട്രംപ് അമേരിക്കൻ പ്രസിഡന്റായി അധികാരമേറ്റതിനു ശേഷമാണെന്നതാണ് മറ്റൊരു സവിശേഷത.

20–-ാം നൂറ്റാണ്ടിന്റെ അവസാനപാദങ്ങളിൽ മെക‌്സിക്കോയിലും 1997ൽ ഏഷ്യൻ രാജ്യങ്ങളിലും 1998ൽ അമേരിക്കയിലും റഷ്യയിലുമുണ്ടായ സാമ്പത്തിക പ്രതിസന്ധികളിൽനിന്നും കരകയറുന്നതിന്, അമേരിക്കയുടെയും ക്യാനഡയുടെയും ധനമന്ത്രിമാരായിരുന്ന ലാറി സമ്മേഴ്സും പോൾ മാർട്ടിനുമാണ്  ജി- 20 എന്ന ആശയം മുന്നോട്ടുവച്ചത്. ഈ രാജ്യങ്ങളിലെ ധന മന്ത്രിമാരുടെ ആദ്യസമ്മേളനം 1999ൽ ബെർലിനിൽ സമ്മേളിച്ചെങ്കിലും രാഷ്ട്രത്തലവന്മാർ പങ്കെടുക്കുന്ന ഉന്നത തലസമ്മേളനം ആദ്യമായി നടന്നത് 2008ൽ വാഷിങ്ടണിലാണ്. 2008ൽ അമേരിക്ക ഉൾപ്പെടെയുള്ള പാശ്ചാത്യ രാജ്യങ്ങളുടെ സമ്പദ‌്‌വ്യവസ്ഥകളെ തകർത്തെറിഞ്ഞ സാമ്പത്തിക പ്രതിസന്ധിയാണ് ഉന്നത തലസമ്മേളനത്തിന‌് വഴിതെളിച്ചത്.

അമേരിക്ക തുടരുന്ന "തത്വാധിഷ‌്ഠിത യാഥാർഥ്യവാദം’

പാശ്ചാത്യ വികസിത മുതലാളിത്ത രാജ്യങ്ങളും ചൈന, റഷ്യ, ഇന്ത്യ, ദക്ഷിണ കൊറിയ മുതലായ വികസ്വര രാജ്യങ്ങളും ചേരുന്ന 19 രാഷ്ട്രങ്ങളും യൂറോപ്യൻ യൂണിയനും ചേരുന്നതാണ് ജി -20. രണ്ടാം ലോകയുദ്ധത്തിനുശേഷം നിലവിൽവന്ന ഈ രാഷ‌്ട്രസഖ്യമാണ് ലോകരാഷ്ട്രീയം നിയന്ത്രിക്കുന്നതെന്നു കാണാൻ പ്രയാസമില്ല. ലോക ജനസംഖ്യയുടെ മൂന്നിൽ രണ്ടുവിഭാഗം കുടികൊള്ളുന്ന ഈ രാജ്യങ്ങളിലാണ് ആഗോളസമ്പദ‌്‌വ്യവസ്ഥയുടെ  85 ശതമാനവും. 75 ശതമാനം അന്തർദേശീയ വ്യാപാരവും ഇവിടെയാണ‌്. ഐക്യരാഷ്ട്രസംഘടനയിലെ സുരക്ഷാ കൗൺസിലിലെ അഞ്ച‌് സ്ഥിരാംഗങ്ങളും ജി- 20യിലെ അംഗങ്ങളാണ്.

ലോകം ആശങ്കയുടെ മുൾമുനയിൽ നിൽക്കുമ്പോഴും ഒസാക്കയിൽ നടന്ന ആഗോള രാഷ്ട്രീയ- സാമ്പത്തിക ഭീമന്മാരുടെ സമ്മേളനം അത്ഭുതങ്ങളൊന്നും സൃഷ്ടിക്കാതെയാണ‌് അവസാനിച്ചത്. അത്ഭുതങ്ങളൊന്നും സൃഷ്ടിച്ചില്ലെങ്കിലും ഒസാക്ക സമ്മേളനം ലോകരാഷ്ട്രീയത്തിന‌് ആശാവഹമല്ലാത്ത ചില സൂചനകൾ സമ്മാനിക്കുകയുണ്ടായി.

ആഗോളപ്രശ്നങ്ങളോട് അമേരിക്ക പുലർത്തുന്ന "അമേരിക്ക ഒന്നാമത്’ എന്ന സ്വാർഥപൂർണമായ നിലപാടിന്റെ ആപൽസൂചനകൾ ഒരിക്കൽക്കൂടി സമ്മേളനത്തിൽ വെളിവായി. എല്ലാ പ്രശ്നങ്ങളോടും  ട്രംപിനുള്ളത് ഒരു ഒറ്റയാൾ സമീപനമാണ‌്. ഈ സമീപനം അമേരിക്കൻ പ്രസിഡന്റ്  തെരഞ്ഞെടുപ്പ‌ുപ്രചാരണ സമയത്തുതന്നെ വെളിവായതാണ‌്. എല്ലാ അന്തർദേശീയ സംഘടനകളെയും കരാറുകളെയും ചൈന, ഇന്ത്യ എന്നീ രാജ്യങ്ങളെയും  ഇസ്ലാം മതവിശ്വാസികളെയും ലാറ്റിൻ അമേരിക്കൻ രാജ്യങ്ങളെയും അമേരിക്കയുടെ പ്രശ്നങ്ങൾക്കുള്ള കാരണക്കാരായാണ് ട്രംപ് ചിത്രീകരിച്ചത്. ഈ നിലപാടുകളുടെ നയപ്രഖ്യാപനമാണ് 2018ലെ അമേരിക്കയുടെ ദേശീയ സുരക്ഷാതന്ത്രമായി പ്രസിദ്ധീകരിച്ചത്.
2018ലെ ദേശീയ സുരക്ഷാതന്ത്രത്തിന്റെ അടിത്തറയായി നിൽക്കുന്നത് "തത്വാധിഷ‌്ഠിത യാഥാർഥ്യവാദം’ എന്ന സിദ്ധാന്തമാണ്. ഈ സിദ്ധാന്തത്തിന്റെ സുപ്രധാന നിലപാടുകൾ  ഇവയാണ്:

1. അന്താരാഷ്ട്രസ്ഥാപനങ്ങളല്ല, മറിച്ച്, പരമാധികാര രാജ്യങ്ങളുമായി ബന്ധപ്പെടുന്നതാണ് ലോക സമാധാനത്തിന് നല്ലത്
2. ആഗോളതലത്തിൽ ശക്തിരാഷ്ട്രീയത്തിനാണ് കേന്ദ്രസ്ഥാനം
3. അമേരിക്കയുടെ സ്വാധീനം എല്ലായിടത്തും വർധിപ്പിക്കുക
4. അമേരിക്കൻ ജനതയുടെയും ജീവിതരീതിയുടെയും സംരക്ഷണം ഉറപ്പാക്കുക
5. അമേരിക്കൻ സുഭിക്ഷതയെ പ്രോത്സാഹിപ്പിക്കുക.
ട്രംപിന്റെ അമേരിക്ക തുടരുന്ന "തത്വാധിഷ‌്ഠിത യാഥാർഥ്യവാദം’ എന്ന സിദ്ധാന്തം അമേരിക്കയും സഖ്യശക്തികളും മുന്നോട്ടുവച്ച ഉദാരവാദ ആഗോളക്രമത്തിന്റെ ചരമഗീതം കുറിക്കുന്നതാണ് ഒസാക്കയിൽ കണ്ടത്.

അമേരിക്കയും ചൈനയും തമ്മിലുള്ള വ്യാപാരത്തർക്ക പരിഹാരത്തിൽ ജി- 20ക്ക്‌ ഒരു ക്രെഡിറ്റും നൽകാൻ ട്രംപ് തയ്യാറല്ല. തന്റെ സ്വതസിദ്ധമായ ശൈലിയിൽ വ്യാപാരത്തർക്കങ്ങൾ ചർച്ചകളിലൂടെ പരിഹരിക്കാൻ ചൈനയുടെ പ്രസിഡന്റ് ഷി ജിൻപിങ്ങുമായി ധാരണയാകുകയായിരുന്നു. ഇന്ത്യൻ പ്രധാനമന്ത്രിയുമായും ചർച്ചകൾ നടത്തിയെങ്കിലും പരിഹാരമൊന്നും നിർദേശിക്കപ്പെട്ടില്ല.

ഇവിടെ ശ്രദ്ധിക്കപ്പെടേണ്ടത്, രാജ്യങ്ങൾ തമ്മിലുള്ള വ്യാപാരത്തർക്കങ്ങൾ രണ്ടാംലോക യുദ്ധത്തിനുശേഷം മുതലാളിത്ത രാജ്യങ്ങൾ രൂപംനൽകിയ ബ്രെട്ടൻവുഡ്സ് സ്ഥാപനങ്ങളിലൊന്നായ ഡബ്ല്യുടിഒ (ആദ്യം ഗാട്ട്) കൈകാര്യം ചെയ്യേണ്ട വിഷയങ്ങളാണ്. അവയെ അവഗണിച്ചുകൊണ്ടും ചോദ്യംചെയ‌്തുകൊണ്ടുമാണ്  രാഷ്ട്രങ്ങളെ  ഉപരോധങ്ങളിലൂടെ സമ്മർദത്തിലാക്കി ചർച്ചകളിലേക്കു കൊണ്ടുവരാൻ അമേരിക്ക ശ്രമിക്കുന്നത്. സ്വതന്ത്ര രാജ്യങ്ങളുമായുള്ള പരസ‌്പര ചർച്ചകളിലൂടെയുള്ള പ്രശ്നപരിഹാരത്തിനാണ് "തത്വാധിഷ‌്ഠിത യാഥാർഥ്യവാദം’  ഊന്നൽ നൽകുന്നത്. അതിനാലാണ് അധികാരത്തിൽ വന്നയുടൻതന്നെ ട്രാൻസ് –- പസിഫിക് പാർട്ണർഷിപ് കരാറിൽനിന്നും അമേരിക്ക പിന്മാറിയത്.
ഒസാക്കയിൽ ഏറ്റവും പ്രാധാന്യം നൽകി അവതരിപ്പിച്ചതാണ് പാരീസ് കാലാവസ്ഥാ വ്യതിയാന കരാറിനെ അംഗീകരിക്കുന്ന ഖണ്ഡിക. അമേരിക്ക അതിനെ അംഗീകരിക്കാൻ തയ്യാറായില്ല. അധികാരമേറ്റെടുത്ത ഉടൻതന്നെ ട്രംപ് പാരീസ് കരാറിൽനിന്നും പിന്മാറിയ കാര്യം ഇവിടെ സ‌്മരണീയമാണ്.

പാശ്ചാത്യ ഉദാരവാദം കാലഹരണപ്പെട്ടു

ബഹുരാഷ്ട്ര സംഘടനകൾ എത്തിച്ചേരുന്ന കരാറുകൾ അംഗീകരിക്കാനുള്ള വൈമനസ്യത്തിന്റെ ഫലമായിട്ടാണ് ഇറാൻ ആണവകരാറിൽനിന്ന‌് അമേരിക്ക പിന്മാറിയത്. ഉത്തര കൊറിയയുടെ കാര്യത്തിലും അതുതന്നെയാണ് സംഭവിച്ചത്. ചൈനയുമായും  ഇറാനുമായും ഉത്തര കൊറിയയുമായെല്ലാം ബഹുരാഷ്ട്ര സംഘടനകളുടെയൊന്നും സഹായമില്ലാതെ നേരിട്ടുള്ള ചർച്ചയാണ് ട്രംപിന് താൽപ്പര്യം. നാടകീയ നയതന്ത്രത്തിലാണ് താൽപ്പര്യമെന്നതിന്റെ  ഉദാഹരണമാണ് ഉത്തര കൊറിയ സന്ദർശിക്കാൻ പൊടുന്നനെയുള്ള ട്രംപിന്റെ   തീരുമാനം.
ഇവയിൽനിന്നു വെളിച്ചത്തുവരുന്ന സുപ്രധാനമായ കാര്യം, പാശ്ചാത്യ ഉദാരവാദം, റഷ്യൻ പ്രസിഡന്റ് വ്ളാദിമിർ പുടിൻ സൂചിപ്പിച്ചതുപോലെ കാലഹരണപ്പെട്ടിരിക്കുന്നുവെന്നാണ്. പാശ്ചാത്യ ഉദാരവാദനയങ്ങളുടെ മുഖ്യവക്താവും പ്രയോക്താവുമായിരുന്ന അമേരിക്ക അതിനെ ഉപേക്ഷിച്ചുകഴിഞ്ഞു. അവർ "അമേരിക്ക ഒന്നാമത്’ എന്ന പ്രൊട്ടക‌്ഷനിസ്റ്റ് നയത്തിൽ ഉറച്ചുനിൽക്കുന്നു. അമേരിക്കയ‌്ക്ക‌് ഗുണമുണ്ടെങ്കിൽ മാത്രമേ അവർ ബഹുരാഷ്ട്ര സംഘടനകളെ മാനിക്കൂ. അതിന്റെ ഏറ്റവുംനല്ല ഉദാഹരണമാണ് "ഡാറ്റാ ട്രാക്’ എന്നപേരിൽ ജപ്പാൻ മുന്നോട്ടുവച്ച വ്യക്തിവിവരങ്ങളെ ആഗോളവൽക്കരിക്കാനുള്ള നിർദേശം. കാലാവസ്ഥാ വ്യതിയാനം തടഞ്ഞ‌് ലോകത്തെ സർ‌വനാശത്തിൽനിന്നും രക്ഷിക്കാനുള്ള സമ്മേളന തീരുമാനങ്ങളോടു യോജിക്കാൻ തയ്യാറാകാത്ത അമേരിക്ക, തങ്ങൾക്ക് സാമ്പത്തികനേട്ടമുണ്ടാക്കുന്ന "ഡാറ്റയുടെ സ്വതന്ത്രമായ ഒഴുക്കിനെ’ സർവാത്മനാ സ്വാഗതം ചെയ‌്തത‌് ഇതിന്റെ ഏറ്റവും നല്ല ഉദാഹരണമാണ്. ജി- 20  നേരത്തെ നടന്ന ഉന്നത തലസമ്മേളനങ്ങളിൽ പ്രൊട്ടക‌്ഷനിസ‌്റ്റ‌് നയങ്ങൾക്കെതിരെ ഉൾപ്പെടുത്തിയിരുന്ന വാചകങ്ങൾ ഒസാക്ക സമ്മേളന പ്രഖ്യാപനത്തിൽ ഉൾപ്പെടുത്താൻ അമേരിക്ക സമ്മതിച്ചതുമില്ല.

"തത്വാധിഷ്ഠിത യാഥാർഥ്യവാദം’ ആദ്യഘട്ടങ്ങളിൽ അമേരിക്കയ‌്ക്ക‌് ചില നേട്ടങ്ങളുണ്ടാക്കിയെങ്കിലും  അതുമൂലം ആഗോളരാഷ്ട്രീയത്തിൽ രണ്ടു കാര്യം സംഭവിക്കുമെന്നാണ് ഒസാക്ക സമ്മേളനം കാട്ടിത്തരുന്നത്. ആദ്യത്തേത് അന്താരാഷ്ട്രരംഗത്തുള്ള അമേരിക്കയുടെ ഒറ്റപ്പെടൽ. കാലാവസ്ഥാ വ്യതിയാനത്തിന്റെ കാര്യത്തിലും ഇറാൻ സംഭവവികാസങ്ങളിലും അമേരിക്കയുടെ പാശ്ചാത്യസൗഹൃദ രാഷ‌്ട്രങ്ങളെല്ലാം അമേരിക്കയ‌്ക്ക‌് എതിരായാണ് നിലകൊണ്ടിരിക്കുന്നത്. രണ്ടാമത്തേത‌്, അമേരിക്കയുടെ നേതൃത്വത്തിൽ ഉദാരവാദനയങ്ങളുടെ ഫലമായി രൂപംകൊണ്ട അന്താരാഷ്ട്രസ്ഥാപനങ്ങൾ ചരിത്രത്തിന്റെ ഒരു നിയോഗമെന്നോണം അപ്രസക്തമായിക്കൊണ്ടിരിക്കുന്നുവെന്നതാണ്. ഒസാക്കയിൽ നടന്ന ജി- 20യുടെ 14–-ാം സമ്മേളനം ശ്രദ്ധേയമാകുന്നത് എടുത്ത തീരുമാനങ്ങളുടെ പേരിലായിരിക്കില്ല, ഉദാരവാദം രൂപംനൽകിയ ബഹുരാഷ്ട്ര സംഘടനകളെ അപ്രസക്തമാക്കാനുള്ള അമേരിക്കയുടെ നിഷേധാത്മക നിലപാടിന്റെ പേരിലായിരിക്കും.


പ്രധാന വാർത്തകൾ
 Top