13 July Monday

വിദ്യാഭ്യാസം: ബദൽരീതികൾ അനിവാര്യം

ഡോ. കെ കെ ദാമോദരൻUpdated: Monday Jun 1, 2020


കോവിഡ്–-19 ഏറ്റവും ആഴത്തിൽ ബാധിച്ച മേഖലയാണ് വിദ്യാഭ്യാസം. രോഗവ്യാപനം തടയാനായി എല്ലാ രാജ്യങ്ങളും ഏറ്റവും ആദ്യമായും വ്യാപകമായും അടച്ചുപൂട്ടിയത് വിദ്യാഭ്യാസസ്ഥാപനങ്ങളെയാണ്. യുനെസ്കോയുടെ കണക്കനുസരിച്ച് കഴിഞ്ഞ മാർച്ച് 23 ആയപ്പോഴേക്കും 198 രാജ്യങ്ങളിലായി ലോക വിദ്യാർഥി ജനസംഖ്യയുടെ ഏതാണ്ട് 90 ശതമാനം വരുന്ന 1.38 ബില്യൺ വിദ്യാർഥികൾ വീട്ടിലിരിക്കാൻ തുടങ്ങിയിരുന്നു. രോഗം തുടങ്ങിവച്ച ചൈനയിൽ രോഗം ഏതാണ്ട് പൂർണമായും നിയന്ത്രണവിധേയമാകുകയും പൊതുവിൽ എല്ലാ  രാജ്യങ്ങളും കോവിഡിനൊപ്പം ജീവിക്കാൻ ശീലിക്കുകയും ചെയ്തിരിക്കുന്നു. ഇതിനെത്തുടർന്ന് ഡെൻമാർക്ക്, ജപ്പാൻ തുടങ്ങിയ രാജ്യങ്ങൾ  വിദ്യാഭ്യാസ സ്ഥാപനങ്ങൾ തുറന്നു. ചൈനയിലെ വുഹാനിൽ മെയ് 11  മുതൽ കോളേജുകളും തുറന്നു തുടങ്ങിയിട്ടുണ്ട്. എന്നാൽ, ദരിദ്ര രാജ്യങ്ങളിലും  ഇന്ത്യപോലുള്ള വികസ്വര രാജ്യങ്ങളിലും ലോകാരോഗ്യ സംഘടന നിലവിൽ പുറപ്പെടുവിച്ചിട്ടുള്ള കൊറോണ പ്രതിരോധ നിർദേശങ്ങൾ  പാലിച്ചുകൊണ്ട് വിദ്യാഭ്യാസ സ്ഥാപനങ്ങൾക്ക് തുറന്നു പ്രവർത്തിക്കാൻ കഴിയില്ല. അതേസമയം, അധികകാലം  ഇപ്പോഴത്തെ നിശ്ചലാവസ്ഥയിൽ തുടരാനും കഴിയില്ല.

സമയാസമയങ്ങളിൽ നടക്കുന്ന വിദ്യാർഥി പ്രവേശനം, ക്ലാസുകൾ, പരീക്ഷ, മൂല്യനിർണയം, ഫലപ്രഖ്യാപനം, വിടുതൽ തുടങ്ങിയ ആവർത്തന സ്വഭാവമുള്ള  കുറെ നടപടികളിലൂടെയാണ് വിദ്യാഭ്യാസപരിപാടി മുന്നോട്ടൊഴുകുന്നത്. കോവിഡിനെത്തുടർന്ന് ഈ ഒഴുക്ക് തടസ്സപ്പെട്ടു. ഓൺലൈൻ  അധ്യയനം ഉൾപ്പെടെയുള്ള  വിദൂര വിദ്യാഭ്യാസ പരിപാടിയാണ് പൊതുവിൽ ഇനി  വിനിയോഗിക്കുന്നത്. ഓൺലൈൻ കോഴ്സുകളെയും  അധ്യയനത്തെയും അനുകൂലിച്ചും പ്രതികൂലിച്ചും ചൂടേറിയ സംവാദങ്ങൾ നടക്കുന്ന സന്ദർഭത്തിലാണ് പൊടുന്നനെ ലോക്ഡൗൺ പ്രഖ്യാപിക്കപ്പെടുന്നത്.

ഓൺലൈൻ അധ്യയനത്തിന്  കോവിഡ് കാലത്ത് നേടിയ സ്വീകാര്യതയും വ്യാപനവും തുടർന്നും  നിലനിന്നാൽ ഇതുവരെ തുടർന്നുവന്ന വിദ്യാഭ്യാസ പരിപാടി അപ്പാടെ തകർന്നുപോകും. എന്നാൽ, അത്തരത്തിലൊരു ദുരന്തത്തിനുള്ള സാധ്യത ഇല്ലെന്നോ വളരെ കുറവാണെന്നോ വേണം  കരുതാൻ. കാരണം വിദ്യാഭ്യാസത്തിന്റെ നാനാവിധ ലക്ഷ്യങ്ങൾ രൂപപ്പെടുത്തിയതാണ് നിലവിലെ അധ്യയന സമ്പ്രദായങ്ങളെ. പരിമിതമായ മാറ്റങ്ങൾ സംഭവിക്കുന്നുണ്ടെങ്കിലും  വിദ്യാഭ്യാസത്തിന്റെ ലക്ഷ്യങ്ങളെ അപ്പാടെ മാറ്റുക ലോകത്തിന് ഇപ്പോഴും അചിന്തനീയമാണ്.

ഇന്റർനെറ്റ് ലഭ്യത ഉറപ്പാക്കണം
ഓൺലൈൻ അധ്യയനവും പഠനവും ഏറ്റവും അനുയോജ്യവും സ്വീകാര്യവുമാകുന്നത്  മനുഷ്യന് പുറത്തിറങ്ങാനാകാതെ അടച്ചിരിക്കുന്ന  ലോക്ഡൗൺ കാലഘട്ടത്തിൽ മാത്രമാണ്. അഞ്ചാം തലമുറ ഇന്റർനെറ്റ് സേവനം സാർവത്രികമായ ചൈന, അമേരിക്ക, ജപ്പാൻ തുടങ്ങിയ രാജ്യങ്ങളൊഴിച്ചാൽ  ലോകത്തിന്റെ എല്ലാ ഭാഗങ്ങളിലും വേഗതയേറിയ ഇന്റർനെറ്റ് ഇന്നും ഒരു കിട്ടാക്കനിയാണ്.

നമ്മുടെ രാജ്യത്താണെങ്കിൽ അഞ്ചിനും ഇരുപത്തൊമ്പതിനും ഇടയിൽ പ്രായമുള്ള  നിലവിൽ വിദ്യാർഥികളായവരുടെ വീടുകളിൽ 8.3 ശതമാനം എണ്ണത്തിലേ കംപ്യൂട്ടറുള്ളൂ. ഇവയിൽത്തന്നെ 21.6 ശതമാനം വിദ്യാർഥികളേ  ഇന്റർനെറ്റ് സേവനം  ഉപയോഗിക്കുന്നുള്ളു. ഗ്രാമപ്രദേശങ്ങളിലാണെങ്കിൽ ഈ ഘടകങ്ങൾ യഥാക്രമം 4 ശതമാനവും 15 ശതമാനവുമാണ്. ഇത്തരത്തിൽ, സമൂഹങ്ങൾക്കിടയിലുള്ള ഡിജിറ്റൽ വിടവിന് പുറമെ ശാസ്ത്രവിഷയങ്ങളും ഭാഷാസാഹിത്യ വിഷയങ്ങളും പഠിപ്പിക്കുന്നതിലും ഓൺലൈൻ രീതിക്ക് പരിമിതികളുണ്ട്.


 

ലബോറട്ടറിയിൽ പരീക്ഷണത്തിൽ ഏർപ്പെടുന്ന വിദ്യാർഥി തന്റെ പഞ്ചേന്ദ്രിയങ്ങളിലൂടെയും കാര്യങ്ങൾ  ഗ്രഹിക്കുമ്പോൾ  ഓൺലൈൻ ലബോറട്ടറിയിൽനിന്ന്‌ കാര്യങ്ങൾ കണ്ടു മനസ്സിലാക്കാൻ മാത്രമേ അവസരമുള്ളു. ഭാഷയുടെയും സാഹിത്യത്തിന്റെയും കാര്യമെടുത്താലും  ഓരോ ശീർഷകങ്ങളെയും വ്യത്യസ്തമായ വിധത്തിലാണ് വ്യത്യസ്ത അധ്യാപകർ സമീപിക്കുകയും അവതരിപ്പിക്കുകയും ചെയ്യുക. ഓരോ ക്ലാസിലും നടക്കുന്ന ചർച്ചകളും  വിമർശനങ്ങളും നിരീക്ഷണങ്ങളും വ്യത്യസ്തമായിരിക്കും. ഇങ്ങനെ വ്യത്യസ്ത സരണികളിലൂടെ സഞ്ചരിക്കവെ ഓരോരുത്തരും നൽകുന്ന സംഭാവനകൾ സ്വീകരിച്ചുകൊണ്ടാണ്  സമൂഹത്തിന്റെ  വിജ്ഞാനം  വികസിക്കുന്നത്.  ഇതിൽനിന്ന്‌ വ്യത്യസ്തമായി, ഒരു കേന്ദ്രത്തിൽ തയ്യാറാക്കുന്ന ക്ലാസുകൾ രാജ്യത്തുടനീളം വ്യത്യസ്ത സാഹചര്യങ്ങളിൽ  ജീവിക്കുന്ന വിദ്യാർഥികൾക്ക് വിവരസാങ്കേതിക വിദ്യയുടെ സഹായത്തോടെ എത്തിച്ചുകൊടുക്കുന്ന സമ്പ്രദായമാണ് ഓൺലൈൻ അധ്യയനം.

സാധ്യതകൾ പരമാവധി പ്രയോജനപ്പെടുത്തുക
കോവിഡ് കാലത്തെ അടച്ചിരിപ്പിന്റെ ഫലമായി വിദ്യാഭ്യാസ സ്ഥാപനങ്ങളിൽ നിലവിലുള്ള നിശ്ചലാവസ്ഥ മാറ്റിയെടുക്കേണ്ടത് പല നിലയിൽ അത്യന്താപേക്ഷിതമാണ്. സമയക്രമമനുസരിച്ച് നടക്കേണ്ട  ക്ലാസുകളും പരീക്ഷകളും ഫലപ്രഖ്യാപനവും നടന്നേ മതിയാകൂ. ഈ സാഹചര്യത്തിൽ ഓൺലൈൻ അധ്യയനത്തിന്റെ സാധ്യതകൾ പരമാവധി പ്രയോജനപ്പെടുത്തുക എന്നതുതന്നെയാണ് അധ്യാപകർക്ക് മുന്നിലുള്ള ഏക പോംവഴി.  മാത്രവുമല്ല, ദീർഘകാലം കോവിഡിനോടൊപ്പം ജീവിക്കേണ്ട സാഹചര്യമുണ്ടായാൽ നിലവിലെ പശ്ചാത്തല സൗകര്യങ്ങൾ വച്ചുമാത്രം മുഴുവൻ വിദ്യാർഥികളെയും എല്ലാ വിഷയങ്ങളും മുഖദാവിൽ പഠിപ്പിക്കാൻ നമുക്ക് കഴിയില്ല.

ഇ–-വിഭവങ്ങൾ  സമാഹരിക്കാനും ആയവയെ ക്ലാസുകളിലേക്ക് ചുരുക്കാനും മൾട്ടിമീഡിയ സഹായത്തോടെ വിദ്യാർഥികളുമായി സംവദിക്കാനും അധ്യാപകർക്കു കഴിയേണ്ടതുണ്ട്. മുഴുവൻ അധ്യാപകർക്കും ഇതിനാവശ്യമായ ശാസ്ത്രീയ പരിശീലനം നൽകാൻ സർക്കാരും സർവകലാശാലകളും മുൻകൈ എടുക്കണം.  മറ്റുള്ളവരിൽനിന്ന്‌ വ്യത്യസ്തമായി 93.7 ശതമാനം ജനങ്ങൾക്ക് മൊബൈൽ ഫോണും 54 ശതമാനം പേർക്ക് ഇന്റർനെറ്റ് സേവനവുമുള്ള സംസ്ഥാനമാണ് നമ്മുടേത്. അടച്ചിരിപ്പ് കാലത്ത് ഭൂരിഭാഗം വിദ്യാർഥികളും വിവരസാങ്കേതികവിദ്യയോട് അസാധാരണമായ അടുപ്പം സ്ഥാപിച്ചിട്ടുണ്ടാകും. അതിനൊത്ത് അധ്യാപകരും വിദ്യാഭ്യാസ സ്ഥാപനങ്ങളും സർവകലാശാലകളും  മാറിയാൽ വിദ്യാഭ്യാസരംഗത്തെ കോവിഡാനന്തര വെല്ലുവിളികളെ നമുക്ക് നേരിടാനാകും.


പ്രധാന വാർത്തകൾ
 Top