21 November Thursday

കേരള സർവീസ് ചട്ടത്തിന് 60 വയസ്സ്

സൂര്യക്കോട് നടേശൻUpdated: Tuesday Nov 5, 2019


1959 നവംബർ ഒന്നിന് കേരളത്തിലെ സർക്കാർ ജീവനക്കാരുടെ സേവന‐ആനുകൂല്യ വ്യവസ്ഥകൾ നിലവിൽ വന്നു. ആ ചട്ടം പ്രാബല്യത്തിൽ വന്നതിന്റെ അറുപതാം വർഷമാണിത്.

തുടക്കം
1957 ഏപ്രിൽ അഞ്ചിന് ഇ എം എസ് മുഖ്യമന്ത്രിയായിട്ടുള്ള ആദ്യ മന്ത്രിസഭ കേരളത്തിൽ അധികാരമേറ്റു. തിരുവിതാംകൂറും കൊച്ചിയും മലബാറും ഉൾപ്പെട്ട ഐക്യകേരള സംസ്ഥാനത്ത് പിന്നീട് ‘കേരള മാതൃക ’ എന്ന് ലോകം പ്രകീർത്തിച്ച ഭരണക്രമത്തിന് അടിത്തറ ഒരുക്കുന്നതിനുള്ള മാർഗനിർദേശങ്ങൾ ഉണ്ടാക്കുന്നതിനായി മുഖ്യമന്ത്രിതന്നെ അധ്യക്ഷനായുള്ള ഒന്നാം  ഭരണപരിഷ്കാരകമീഷൻ രൂപീകരിക്കപ്പെട്ടു. വിശദമായ പഠനത്തിനും ചർച്ചകൾക്കുംശേഷം തയ്യാറാക്കിയ കമീഷൻ റിപ്പോർട്ട് ഭരണക്രമം സംബന്ധിച്ച വ്യക്തവും ശക്തവുമായ മാർഗരേഖയാണ്. ക്ഷേമസംസ്ഥാനം കെട്ടിപ്പടുക്കുന്നതിന് പര്യാപ്തമായ സിവിൽ സർവീസിന്റെ ആവശ്യകത എടുത്തുപറഞ്ഞുകൊണ്ടുള്ള പ്രസ്തുത റിപ്പോർട്ട് അഴിമതിരഹിതവും കാര്യക്ഷമവുമായ പ്രവർത്തനത്തിന് സർക്കാരുദ്യോഗസ്ഥരുടെ സഹകരണത്തിന്റെ പ്രാധാന്യം വ്യക്തമാക്കുകയും ചെയ്തു.

ഈ കാഴ്ചപ്പാടിന്റെ അടിസ്ഥാനത്തിലാണ് ജീവനക്കാരുടെ സേവന‐ ആനുകൂല്യ വ്യവസ്ഥകൾക്ക് രൂപംനൽകിയത്. 1949 ജൂലൈ ഒന്നിന് തിരുവിതാംകൂറും കൊച്ചിയും സംയോജിച്ച് തിരു‐കൊച്ചി സംസ്ഥാനം ഉണ്ടാക്കിയെങ്കിലും തിരുവിതാംകൂർ രാജ്യത്തും കൊച്ചി രാജ്യത്തും അതിനുമുമ്പ് നിലനിന്നിരുന്ന സേവന‐ആനുകൂല്യ വ്യവസ്ഥകൾ തന്നെയായിരുന്നു അതത് മേഖലകളിൽ തുടർന്നിരുന്നത്. തിരുവിതാംകൂർഭാഗത്ത് ട്രാവൻകൂർ സർവീസ് റെഗുലേഷനും കൊച്ചി പ്രദേശത്ത് കൊച്ചിൻ സർവീസ് റഗുലേഷനും അപ്രകാരം തുടർന്നിരുന്നു. തിരു‐കൊച്ചി സംസ്ഥാനത്തോട് കൂട്ടിച്ചേർക്കപ്പെട്ട മലബാർ ജില്ലയിലാകട്ടെ, ഫണ്ടമെന്റൽ റൂൾസ് മദ്രാസ്, മദ്രാസ് പെൻഷൻ കോഡ് തുടങ്ങിയവയും നിലനിന്നിരുന്നു. ഏകീകൃത സംസ്ഥാനം രൂപംകൊണ്ടതോടെ പ്രാദേശിക പരിഗണനകൂടാതെ, ഒരേ രീതിയിലുള്ള സേവന‐ആനുകൂല്യ വ്യവസ്ഥകളുടെ ആവശ്യകത ഉയർന്നുവന്നു. ഇതിന് അനുസൃതമായ ചട്ടത്തിന് രൂപംനൽകുന്നതിനായി ഒരു വിദഗ്ധസമിതിയെ സർക്കാർ നിയോഗിച്ചു.നിലവിലുണ്ടായിരുന്ന ചട്ടങ്ങളിലെ കാതലായ അംശങ്ങൾ കൂട്ടിച്ചേർത്ത് ഏകീകൃതചട്ടമായ കേരള സർവീസ് ചട്ടത്തിന് സമിതി രൂപം നൽകി. എന്നാൽ, നിയമസഭയുടെ അംഗീകാരത്തോടെ ചട്ടം നടപ്പാക്കുന്നതിനുമുമ്പ് 1959 ജൂലൈ 31 ന് കുപ്രസിദ്ധമായ വിമോചനസമരത്തിന്റെ മറവിൽ ഭരണഘടനയിലെ അനുച്ഛേദം 356 ദുരുപയോഗം ചെയ്ത് സർക്കാരിനെയും നിയമസഭയെയും പിരിച്ചുവിട്ടു. പിന്നീട് ഭരണഘടനയിലെ അനുച്ഛേദം 309 ലെ ഉപവകുപ്പുപ്രകാരം അന്നത്തെ ഗവർണർ ഡോ. ബി രാമകൃഷ്ണറാവു ചട്ടം അംഗീകരിച്ച് 1959 നവംബർ ഒന്നുമുതൽക്ക് പ്രാബല്യം നൽകിക്കൊണ്ട് 1959 നവംബർ 12 ന് അസാധാരണ ഗസറ്റ് 67 ആയി വിജ്ഞാപനം ചെയ്തു.

1965ൽ നടന്ന തെരഞ്ഞെടുപ്പിൽ ഏതെങ്കിലും കക്ഷിക്കോ മുന്നണിക്കോ ഭൂരിപക്ഷം ലഭിക്കുകയുണ്ടായില്ല. തുടർന്ന്, സംസ്ഥാനം കേന്ദ്രഭരണത്തിന് കീഴിൽ ആകുകയും ഭഗവാൻ സഹായി ഗവർണറായി നിയമിക്കപ്പെടുകയും ചെയ്തു. ജീവിത വിലസൂചികയിലെ ക്രമാതീതവളർച്ച കാരണം തൊഴിലാളിവർഗമാകെ പരിഭ്രാന്തിയിലായ കാലമായിരുന്നു, അത്.

1960ൽ നടന്ന തെരഞ്ഞെടുപ്പിൽ പിഎസ്പിയും കോൺഗ്രസും മുസ്ലിംലീഗിന്റെ സഹായത്തോടെ അധികാരത്തിൽ വരികയും പിഎസ്പി നേതാവ് പട്ടം താണുപിള്ള മുഖ്യമന്ത്രിയായിട്ടുള്ള സർക്കാർ നിലവിൽ വരികയും ചെയ്തു. പിഎസ്പിയും കോൺഗ്രസും തമ്മിൽ അഭിപ്രായവ്യത്യാസം ഉണ്ടായതിനെത്തുടർന്ന്, പട്ടം താണുപിള്ള പഞ്ചാബ് ഗവർണർസ്ഥാനം ഏറ്റെടുക്കുന്നതിനായി 1962  സെപ്തംബറിൽ രാജിവച്ചു. തുടർന്ന്, കോൺഗ്രസ് നേതാവ് ആർ ശങ്കർ മുഖ്യമന്ത്രിയായി. പിഎസ്പി പ്രതിപക്ഷത്തേക്ക് നീങ്ങുകയും മന്ത്രിസഭയ്ക്കെതിരെ അവിശ്വാസപ്രമേയം പാസാവുകയും ചെയ്തതോടെ 1964 ൽ ശങ്കർ മന്ത്രിസഭയും രാജിവച്ചു. ഈ രണ്ട് മന്ത്രിസഭയുടെ കാലത്തും സർവീസ് ചട്ടത്തെ നിയമസഭയുടെ പരിഗണനയ്ക്ക് കൊണ്ടുവന്നിരുന്നില്ല. 1965ൽ നടന്ന തെരഞ്ഞെടുപ്പിൽ ഏതെങ്കിലും കക്ഷിക്കോ മുന്നണിക്കോ ഭൂരിപക്ഷം ലഭിക്കുകയുണ്ടായില്ല. തുടർന്ന്, സംസ്ഥാനം കേന്ദ്രഭരണത്തിന് കീഴിൽ ആകുകയും ഭഗവാൻ സഹായി ഗവർണറായി നിയമിക്കപ്പെടുകയും ചെയ്തു. ജീവിത വിലസൂചികയിലെ ക്രമാതീതവളർച്ച കാരണം തൊഴിലാളിവർഗമാകെ പരിഭ്രാന്തിയിലായ കാലമായിരുന്നു, അത്. തൊഴിൽ മേഖലകളിൽ എല്ലായിടത്തും കൂലി കൂട്ടുന്നതിനും ഇടക്കാല ആശ്വാസത്തിനും ക്ഷാമബത്തയ്ക്കുംവേണ്ടിയുള്ള പ്രക്ഷോഭസമരങ്ങൾ അലയടിച്ചുയർന്നു. സംസ്ഥാന സർക്കാർ ജീവനക്കാർ കേന്ദ്രസർക്കാർ നിരക്കിലുള്ള ക്ഷാമബത്തയ്ക്കും സേവന‐വേതന ഘടന പരിഷ്കരിക്കുന്നതിനുമായി അതിശക്തമായ സമരത്തിന് നിർബന്ധിതരായി. സിആർപിഎഫിനെ ഉപയോഗിച്ച് അതിക്രൂരമായാണ് ഗവർണർ അവകാശസമരത്തെ നേരിട്ടത്. ഒടുവിൽ കേന്ദ്രനിരക്കിൽ ക്ഷാമബത്ത നൽകുന്നതുസംബന്ധിച്ച് പഠിച്ച് റിപ്പോർട്ട് നൽകാൻ ഒരു ജഡ്ജിയെ നിയമിക്കുന്നതിനും ശമ്പളഘടനയിലെ അപാകതകൾ പരിഹരിക്കാൻ സംഘടനാ പ്രതിനിധികൾ ഉൾപ്പെടുന്ന സമിതിയെ നിയോഗിക്കുന്നതിനും സമരത്തിലേർപ്പെട്ടവർക്കെതിരെ കൈക്കൊണ്ട ശിക്ഷാനടപടികൾ അവസാനിപ്പിക്കുന്നതിനും ഗവർണർ സമ്മതിച്ചതിന്റെ അടിസ്ഥാനത്തിൽ 12 ദിവസത്തിനുശേഷം പണിമുടക്ക് പിൻവലിച്ചു.

1967 ലെ തെരഞ്ഞെടുപ്പിൽ സിപിഐ എം നേതൃത്വത്തിലുള്ള സപ്തകക്ഷി മുന്നണി ഭൂരിപക്ഷം നേടുകയും  ഇ എം എസ് മുഖ്യമന്ത്രിയായുള്ള രണ്ടാം മന്ത്രിസഭ 1967 മാർച്ച് ആറിന് അധികാരം ഏൽക്കുകയും ചെയ്തു. തുടർന്ന്, അതേവരെ നിയമസഭയുടെ അംഗീകാരം കാത്തുകഴിഞ്ഞിരുന്ന സർവീസ് ചട്ടത്തെ നിയമസഭയുടെ അംഗീകാരത്തിന് വിധേയമാക്കാനുള്ള നടപടികൾ കൈക്കൊണ്ടു. 1968 സെപ്തംബർ 17 ന് “1968 ലെ പത്തൊമ്പതാമത് പൊതുസേവന നിയമം ”  ജീവനക്കാരുടെ സേവന‐ആനുകൂല്യ വ്യവസ്ഥകൾക്കുവേണ്ടി നിയമസഭ അംഗീകരിച്ച് അതിന്റെ പരിധിയിൽ കേരള സർവീസ് ചട്ടത്തെ ഉൾപ്പെടുത്തി. അന്നുമുതൽ പ്രസ്തുത നിയമത്തിന്റെ നിയന്ത്രണത്തിലാണ് സർവീസ് ചട്ടം.

മൂന്നു ഭാഗങ്ങളുൾപ്പെടുന്ന സർവീസ് ചട്ടത്തിലെ 159 ചട്ടങ്ങളുള്ള ഒന്നാംഭാഗം പൊതുവായ സേവനവ്യവസ്ഥകൾ, ശമ്പളം, അവധി, പ്രവേശനകാലം തുടങ്ങിയവയും, 116 ചട്ടങ്ങളുള്ള രണ്ടാം ഭാഗം യാത്രാബത്തയും 151 ചട്ടങ്ങളുള്ള മൂന്നാംഭാഗത്തെ ഒന്നുമുതൽ 139 ചട്ടങ്ങൾ അടുത്തൂൺ വ്യവസ്ഥകളും 140 മുതൽ 151 വരെ ചട്ടങ്ങൾ സർവീസ് രേഖകളും കൈകാര്യം ചെയ്യുന്നു. ഒന്നും രണ്ടും ഭാഗങ്ങൾക്ക് 1959 നവംബർ ഒന്നുമുതൽക്കും മൂന്നാം ഭാഗത്തിന് 1956 നവംബർ ഒന്നുമുതൽക്കും പ്രാബല്യം നൽകിയിരുന്നു. പിന്നീട് 1966 നവംബർ 14 മുതൽ ലഘൂകരിക്കപ്പെട്ട അടുത്തൂൺ വ്യവസ്ഥകളും നടപ്പാക്കിയിട്ടുണ്ട്.    

കാലോചിതമായ ഒട്ടേറെ മാറ്റങ്ങൾ വരുത്തി    
ആറ് പതിറ്റാണ്ടിനുള്ളിൽ കാലോചിതമായ ഒട്ടേറെ മാറ്റങ്ങൾ ചട്ടത്തിനുണ്ടായിട്ടുണ്ട്. സർക്കാർ സ്വമേധയായും സർവീസ് സംഘടനകളുടെ നിർദേശങ്ങൾ, ജീവനക്കാരുടെ പ്രക്ഷോഭസമരങ്ങളിലെ ആവശ്യങ്ങൾ, കോടതി ഉത്തരവുകൾ, റൂൾസ് റിവിഷൻ കമ്മിറ്റിയുടെ ശുപാർശകൾ എന്നിവയിലൂടെയുമെല്ലാമാണ് വ്യവസ്ഥകൾ പരിഷ്കരിച്ചിട്ടുള്ളത്. ഇതിനകം പത്ത് ശമ്പള പരിഷ്കരണങ്ങൾ നടപ്പാക്കപ്പെട്ടു. അവയിലൂടെയും അല്ലാതെയും ജീവനക്കാരുടെ വേതന ഘടനയിലും, അവധി ആനുകൂല്യങ്ങൾ, ബോണസ്, ചികിത്സാനുകൂല്യങ്ങൾ, സ്ഥലംമാറ്റ വ്യവസ്ഥകൾ പെൻഷൻ ആനുകൂല്യങ്ങൾ, ക്ഷാമബത്ത എന്നിവയിലുമെല്ലാം നേട്ടങ്ങൾ ഉണ്ടാക്കുന്നതിനും അതുവഴി ക്ഷേമസംസ്ഥാനം കെട്ടിപ്പടുക്കുന്നതിന്  ഇച്ഛാശക്തിയുള്ള ജീവനക്കാരുടെ സമൂഹത്തെ സൃഷ്ടിക്കുന്നതിനും വലിയൊരളവുവരെ കഴിഞ്ഞിട്ടുണ്ടെന്നു കാണാം.  കേരളത്തിലെ സർക്കാർ ജീവനക്കാരും പെൻഷൻകാരും ഇന്ന്  വലിയ സാമൂഹ്യ ശക്തിയായിത്തീർന്നുകഴിഞ്ഞത് മികച്ച സേവന ആനുകൂല്യ വ്യവസ്ഥകളുടെകൂടി ഫലമായിട്ടാണ്.

ഇതര സംസ്ഥാനങ്ങൾക്ക് എന്നും മാതൃകയായിട്ടുള്ളതാണ് നമ്മുടെ സർവീസ് ചട്ടം. അതിന്റെ അറുപതാം വാർഷികവേളയിൽ, കേരള ജനതയുടെ വിമോചനത്തിന് അടിത്തറപാകിയ കേരള മാതൃകയുടെയും സർവീസ്ചട്ടത്തിന്റെയും സ്രഷ്ടാവുമായ ഒന്നാം കമ്യൂണിസ്റ്റ് സർക്കാരിന്റെ വഴിത്താരയിലെ പൊൻവിളക്കായി പിണറായി സർക്കാരാണുള്ളത് എന്നത് ചരിത്രനിയോഗംതന്നെ.


പ്രധാന വാർത്തകൾ
 Top