14 August Friday

ഡോക്ടേഴ്സ് ദിന സ്‌മരണകൾ - ഡോ. ബി ഇക്‌ബാൽ എഴുതുന്നു

വെബ് ഡെസ്‌ക്‌Updated: Wednesday Jul 1, 2020


സ്വാതന്ത്ര്യ സമരസേനാനിയും ബംഗാൾ മുഖ്യമന്ത്രിയുമായിരുന്ന ഡോ. ബി സി റോയ്‌യുടെ ജന്മദിനമാണ് ഇന്ത്യയിൽ ഡോക്ടേഴ്സ് ദിനമായി ആചരിക്കുന്നത്. ഈവർഷത്തെ ഡോക്ടേഴ്സ്‌ ദിനത്തിന് 1818 ജൂലൈ ഒന്നിന് ജനിച്ച മറ്റൊരു മഹാനായ ഡോക്ടറെക്കൂടി അനുസ്‌മരിക്കേണ്ടതുണ്ട്. ആരോഗ്യപ്രവർത്തകർ കൈ നന്നായി കഴുകുന്നത് രോഗികളുടെ മരണനിരക്ക് കുറയ്‌ക്കും എന്ന് വ്യക്തമാക്കിയതിനെത്തുടർന്ന് പീഡനങ്ങൾക്കിരയായി രക്തസാക്ഷിത്വം വരിക്കേണ്ടിവന്ന ഹംഗേറിയൻ ഭിഷഗ്വരൻ ഇഗ്നാസ് ഫിലിപ് സെമ്മൽ വെയ്സ് ജനിച്ചത് അന്നാണ്. ശരീരദൂരം പാലിച്ചും മാസ്‌ക്‌ ധരിച്ചും കൈകൾ ആവർത്തിച്ച് കഴുകിക്കൊണ്ടുമാണ് കോവിഡിനെ പ്രധാനമായും നിയന്ത്രിക്കേണ്ടത്. സെമ്മൽ വെയ്‌സ് ഏതാണ്ട് രണ്ട് നൂറ്റാണ്ടിനുമുമ്പ്‌ മുന്നോട്ടുവച്ച ശുചിത്വ രീതിയാണ് കോവിഡിനെതിരെ ഇപ്പോൾ പ്രയോഗിച്ചുവരുന്നത്. ഈ സാഹചര്യത്തിൽ നമുക്ക് സെമ്മൽ വെയ്സിനോട് ആദരം പ്രകടിപ്പിക്കേണ്ടതുണ്ട്.

വെയ്‌സ്‌: അമ്മമാരുടെ രക്ഷകൻ
ഇഗ്നാസ് ഫിലിപ് സെമ്മൽ വെയ്സ് ഹംഗേറിയൻ ഡോക്‌ടറും ശാസ്‌ത്രജ്ഞനുമായിരുന്നു. വിയന്നയിലെ പ്രശസ്തമായ ആശുപത്രിയിലാണ് അദ്ദേഹം ജോലിചെയ്തിരുന്നത്. സ്‌ത്രീരോഗ വിദഗ്ധനായിരുന്ന  വെയ്സ് ജോലി നോക്കിയിരുന്ന ആശുപത്രിയിൽ ധാരാളം പ്രസവങ്ങൾ നടന്നിരുന്നു. ആശുപത്രിയിൽ പ്രസവത്തിന്‌ പ്രധാനമായും രണ്ട്‌ വാർഡാണ് ഉണ്ടായിരുന്നത്, ഡോക്ടർമാർ പ്രസവമെടുക്കുന്ന വാർഡും നേഴ്‌സുമാർ പ്രസവമെടുക്കുന്ന വാർഡും. അന്നൊക്കെ "പർപൈറൽ ഫീവർ' എന്നറിയപ്പെട്ടിരുന്ന പ്രസവപ്പനി നിരവധി അമ്മമാരുടെ ജീവൻ അപഹരിച്ചിരുന്നു. പ്രസവാനന്തരം രോഗാണുബാധയെത്തുടർന്ന് ശക്തമായ പനിയും മറ്റ്‌ ലക്ഷണങ്ങളും വന്ന് പ്രസവപ്പനിയെത്തുടർന്ന് നിരവധി അമ്മമാർ മരണമടഞ്ഞിരുന്നു.  പ്രസവാനന്തരമുള്ള അണുബാധയാണ് പ്രസവപ്പനിക്ക് കാരണമെന്ന് അക്കാലത്ത് അറിഞ്ഞുകൂടായിരുന്നു.

ഡോ. സെമ്മൽ വെയ്സ്  /  ഡോ. ബി സി റോയ്‌

ഡോ. സെമ്മൽ വെയ്സ് / ഡോ. ബി സി റോയ്‌


 

ഡോക്ടർമാരുടെ പ്രസവവാർഡിൽ, നേഴ്സ്മാരുടെ പ്രസവവാർഡിനെ അപേക്ഷിച്ച് പ്രസവപ്പനിമൂലമുള്ള മരണം കൂടുതലാണെന്ന് സെമ്മൽ വെയ്‌സിന്‌ കാണാൻ കഴിഞ്ഞു. രോഗികളുടെ ബന്ധുക്കളും ഇക്കാര്യം ശ്രദ്ധിച്ചിരുന്നു. അതുകൊണ്ട് അവർ ഡോക്ടർമാരുടെ വാർഡിൽ പ്രസവിക്കാൻ താൽപ്പര്യം കാട്ടിയിരുന്നില്ല. രണ്ടു വാർഡിലെയും മരണനിരക്കുകൾ ശ്രദ്ധയോടെ പഠിച്ച വെയ്‌സ്‌ മറ്റൊരു കാര്യംകൂടി കണ്ടുപിടിച്ചു. ഡോക്ടർമാരിൽ പലരും വാർഡിൽ വരുന്നത് ഡിസെക്‌ഷൻ ഹാളിൽ (മൃതദേഹപരിശോധനാമുറി) നിന്നാണെന്ന്. മെഡിക്കൽ വിദ്യാർഥികളെ പരിശീലിപ്പിച്ചിരുന്ന ആശുപത്രികൂടിയായിരുന്നു അത്. പല യുവ ഡോക്ടർമാരും ഡിസെക്‌ഷൻ- കഴിഞ്ഞ് നേരെ പ്രസവമുറിയിൽ എത്തുമായിരുന്നു. മൃതദേഹങ്ങളിൽനിന്ന് അവരുടെ കൈയിൽ പറ്റുന്ന എന്തോ വസ്‌തു ആയിരിക്കണം ഈ മരണങ്ങൾക്ക് കാരണം എന്ന് വെയ്‌സ് സംശയിച്ചു. അതുകൊണ്ട്  കൈ കഴുകി രോഗവാഹിയായ വസ്തുവിനെ നീക്കംചെയ്താൽ പ്രശ്നം പരിഹരിക്കാം എന്ന നിഗമനത്തിൽ അദ്ദേഹം എത്തി. വെയ്സ് രണ്ട് വാർഡിന്റെയും മുന്നിൽ ഹൈപോക്ലോറൈറ്റ് ലായനികൊണ്ട്‌ കൈകഴുകാൻ ഏർപ്പാട്‌ ചെയ്തു. എല്ലാവരും നിർബന്ധമായും കൈ കഴുകണമെന്ന് ബോർഡും സ്ഥാപിച്ചു. ഫലം അത്ഭുതാവഹമായിരുന്നു. കുറച്ചുമാസങ്ങൾക്കുള്ളിൽ രണ്ടുവാർഡിലെയും മരണനിരക്ക് കുറഞ്ഞു. കൈ കഴുകുക എന്ന ലളിതമായ പ്രക്രിയയിലൂടെ രോഗപ്രതിരോധം സാധ്യമാണെന്ന് സെമ്മൽ വെയ്‌സ് അസന്ദിഗ്ധമായി തെളിയിച്ചു. അദ്ദേഹത്തിനും രോഗാണുക്കളെക്കുറിച്ചൊന്നും അറിവില്ലായിരുന്നു; എങ്കിലും രണ്ട് വാർഡിലെയും മരണനിരക്കിലെ വ്യത്യാസം സൂക്ഷ്മമായി നിരീക്ഷിച്ചാണ് ഈ നിഗമനത്തിൽ എത്തിയത്. സെമ്മൽ വെയ്സ് പറഞ്ഞതനുസരിച്ച് കൈകഴുകി പ്രസവമെടുത്ത മറ്റ് ആശുപത്രികളിലും അമ്മമാരുടെ മരണനിരക്ക് ഗണ്യമായി കുറഞ്ഞു. "അമ്മമാരുടെ രക്ഷകൻ' എന്ന് അതുവഴി ഇദ്ദേഹം വിശേഷിപ്പിക്കപ്പെട്ടു.

വെയ്‌സിന്റെ ആശയങ്ങൾ അന്നത്തെ യാഥാസ്ഥിതിക വൈദ്യസമൂഹം നിരസിച്ചു. മാത്രമല്ല‌, പല ഡോക്ടർമാരും കൈ കഴുകണമെന്ന നിർ‌ദേശത്തിൽ ഏറെ പ്രകോപിതരായി പ്രതികരിച്ചു. കൈ കഴുകുന്നതിന്റെ പ്രസക്തി  വെയ്സ് തെളിയിച്ചെങ്കിലും അദ്ദേഹം ജോലിചെയ്തിരുന്ന വിയന്ന ജനറൽ ആശുപത്രിയിലെ മറ്റ്‌ ഡോക്‌ടർമാരിൽ പലരും അത് സ്വീകരിക്കാൻ കൂട്ടാക്കിയില്ല. മാത്രമല്ല, അദ്ദേഹത്തിന്റെ ജോലിയുടെ കാലാവധി പുതുക്കിക്കൊടുക്കാൻപോലും അവർ വിസമ്മതിച്ചു. അദ്ദേഹം ഏറെ ആഗ്രഹിച്ചിരുന്ന പ്രൊഫസർ പദവി  ഉറപ്പായപ്പോൾ, വളരെ വേദനയോടെ  വിയന്ന വിട്ട് സ്വന്തം ജന്മനാടായ ഹംഗറിയിലെ ബുഡാപെസ്റ്റ് നഗരത്തിലെ പെസ്റ്റ് യൂണിവേഴ്സിറ്റിയിൽ ജോലി സ്വീകരിക്കേണ്ടിവന്നു.


 

ക്രമേണ അവിടെ പ്രസവവിഭാഗത്തിൽ (ഒബ്സ്റ്റിക്‌സ്‌) തലവനാകുകയും ചെയ്‌തു. മാനസികമായി തകർന്ന് വെയ്‌സ് ഭ്രാന്തിന്റെ വക്കത്തെത്തി. വെയ്സിന് മാനസിക അസ്ഥിരത ഉണ്ടെന്ന് ആശുപത്രി അധികൃതർ അറിയിച്ചതിനെത്തുടർന്ന് പൊലീസ് അദ്ദേഹത്തെ അറസ്റ്റ് ചെയ്ത് മനോരോഗാശുപത്രിയിൽ തടങ്കലിൽ പാർപ്പിച്ചു. അവസാനകാലത്ത് അദ്ദേഹത്തിന് മാനസികാസ്വാസ്ഥ്യം ഉണ്ടാകുകയും ബലമായി ഭ്രാന്തിന്‌ ചികിത്സിക്കുന്ന കേന്ദ്രത്തിൽ പ്രവേശിപ്പിക്കുകയും ചെയ്തു. തുടർന്ന്, തന്റെ 47–-ാം വയസ്സിൽ, ജയിൽ കാവൽക്കാർ തല്ലിച്ചതച്ചതിനെത്തുടർന്ന് ഏറെ മുറിവേറ്റ് രോഗാണുബാധമൂലം അദ്ദേഹം രക്തസാക്ഷിത്വം വരിച്ചു.

ശരീരം ദൂരംപാലിച്ചും മാസ്‌ക്‌ ഉപയോഗിച്ചും  വെയ്സ് നിർദേശിച്ച കൈകഴുകൽ പിന്തുടർന്നുമാണ് ഇന്ന്‌ ലോകജനത കോവിഡിനെ പ്രതിരോധിച്ചുകൊണ്ടിരിക്കുന്നത്. അതുകൊണ്ട്, ജീവിതകാലത്ത് ശുചിത്വത്തിലൂടെ രോഗാണുബാധയിൽനിന്ന്‌ രക്ഷനേടാം - എന്ന ലളിതമായ ശാസ്ത്രസത്യം വെളിപ്പെടുത്തിയതിന്റെ പേരിൽ വേട്ടയാടപ്പെട്ട് ജീവൻ വെടിയേണ്ടിവന്ന വെയ്സിനെ കോവിഡ് കാലത്ത് അനുസ്മരിക്കേണ്ടതിന് പ്രത്യേക പ്രാധാന്യമുണ്ട്.


ദേശാഭിമാനി ഇപ്പോള്‍ ടെലഗ്രാമിലും ലഭ്യമാണ്‌. കൂടുതല്‍ വാര്‍ത്തകള്‍ക്കും അപ്ഡേറ്റുകള്‍ക്കുമായി ടെലഗ്രാം ചാനല്‍ സബ്സ്ക്രൈബ് ചെയ്യാം.


പ്രധാന വാർത്തകൾ
 Top