16 September Monday

ഏലം വിപണി ഉയർന്നു; ഏലത്തട്ടകൾക്ക് ആവശ്യക്കാരേറെ

വെബ് ഡെസ്‌ക്‌Updated: Tuesday Jul 2, 2019
വണ്ടൻമേട‌്> ഏലയ‌്ക്കാ വിപണിയിൽ വില കുത്തനെ ഉയർന്നതോടെ ഹൈറേഞ്ചിൽ ഏലം കൃഷിക്ക് പ്രിയമേറുന്നു. കൃഷി വ്യാപിക്കുന്നതിനോടൊപ്പം നടാനുള്ള ഏലത്തട്ടകൾക്ക് ആവശ്യക്കാരും ഏറി. തോട്ടങ്ങളിൽ ഏലത്തട്ടകൾക്കും വില കുതിച്ചുയരുകയാണ്. നല്ലയിനം തട്ട ഒന്നിന് 170 രൂപ വരെ വിലയ‌്ക്കാണ് വിൽക്കുന്നത്.
 
80 രൂപ മുതൽ ഏലത്തട്ടകൾ ലഭ്യമാണ്. എന്നാൽ, ആവശ്യാനുസരണം നടാനുള്ള മികച്ചയിനം തട്ടകൾ ലഭിക്കാത്തതാണ് കാർഷിക മേഖല ഇപ്പോൾ നേരിടുന്ന പ്രതിസന്ധി. ചെറുകിട, -വൻകിട ഏലത്തോട്ടങ്ങളിൽ പഴയ ചെടികൾ പറിച്ചുമാറ്റി പുനഃകൃഷി നടത്തുന്നതും തട്ടകൾക്ക് ക്ഷാമം നേരിടുന്നതിന് കാരണമാകുന്നുണ്ട്.
 
മലബാർ, മൈസൂർ, വഴുക്ക എന്നിങ്ങനെ മൂന്നിനങ്ങളാണ് ആദ്യകാലം മുതൽ സംസ്ഥാനത്ത്‌ കൃഷിചെയ്യുന്നത്‌. ഇവ കൂടാതെ പ്രത്യേകം ഉൽപാദിപ്പിച്ചെടുത്തിട്ടുള്ള സങ്കരയിനങ്ങളായ ഞള്ളാനി ഗോൾഡ‌്, ഐസിആർഐ 1, 2, പി വി 1, 2, എംസിസി -12, എംസിസി 16, എംസിസി -40 തുടങ്ങിയവയും ഇടുക്കിയിൽ വിളയുന്നു. ഹെക്ടറിന് 1456 കിലോഗ്രാം വിളവ് ലഭിക്കുന്ന ഒരിനമാണ് ഐഐഎസ്ആർ കൊടക് സുവാസിനി ഇനത്തിനും ആവശ്യക്കാരേറെയാണ്. 
 
കൊടക് സുവാസിനി ജലസേചനം നൽകി ശാസ്ത്രീയമായി പരിചരിക്കുന്ന തോട്ടങ്ങളിലാണ് കൂടുതൽ വിളവ് ലഭ്യമാവുക. വമ്പൻ വില നൽകി തട്ടകൾ വാങ്ങി കൃഷി വ്യാപിപ്പിക്കുമ്പോൾ വരും കാലങ്ങളിൽ ഏലയ‌്ക്കാ വിലയിലുണ്ടാകുന്ന നേരിയ വിലത്തകർച്ച പോലും കാർഷിക മേഖലയെ സാരമായി ബാധിക്കാനിടയുണ്ട്. 
 
സമീപകാലത്ത‌് ഏലയ‌്ക്കയ‌്ക്ക‌് വിപണിയിൽ ക്ഷാമം നേരിട്ടതോടെയാണ് വില കുത്തനെ ഉയർന്നത്. ഉയർന്ന വില ആറായിരത്തിലെത്തി നിൽക്കുമ്പോൾ ഇതിന്റെ ഗുണം സാധാരണക്കാർക്ക‌് ലഭിക്കുന്നില്ലെന്നും ആക്ഷേപമുയരുന്നുണ്ട്. വിപണിയിൽ വേണ്ടത്ര ഏലയ‌്ക്ക എത്താത്ത സാഹചര്യത്തിലുണ്ടാകുന്ന വിലക്കയറ്റം വമ്പൻ സംരംഭകർക്കു മാത്രമേ ഗുണം ചെയ്യുന്നുള്ളൂ. ഇതിനുപിന്നിൽ അട്ടിമറി നടക്കുന്നതായും ആരോപണമുയരുന്നുണ്ട്. നിജസ്ഥിതി എന്തു തന്നെയായാലും ഉയരുന്ന വില അങ്ങനെതന്നെ തുടർന്നാൽ കാർഷിക മേഖല സമ്പദ്സമൃദ്ധിയുടെ വിഹായസിലേക്ക‌് തിരിച്ചുവരുന്ന കാലം വിദൂരമാകില്ല. 
 
പ്രധാന വാർത്തകൾ
 Top