റഷ്യന്‍ എണ്ണക്കപ്പൽ ആക്രമിച്ച്‌ ഉക്രയ്‌ൻ

മോസ്‌കോ/കീവ്‌: സംഘർഷം അവസാനിപ്പിക്കാനുള്ള സമാധാന ദ‍ൗത്യങ്ങൾ തുടരുന്നതിനിടെയും ഏറ്റുമുട്ടി ഉക്രയ്‌നും റഷ്യയും. കരിങ്കടലിൽ റഷ്യയുടെ രണ്ട്‌ എണ്ണ കപ്പലുകൾക്കുനേരെ ആക്രമണം നടന്നു. ഉക്രയ്‌ൻ ഡ്രോൺ ആക്രമണത്തിലാണ്‌ കപ്പലിന്‌ തീപിടിച്ചതെന്നാണ്‌ റിപ്പോർട്ട്‌. ശനിയാഴ്ച രാവിലെ തുർക്കിയ തീരത്തിനുസമീപം ‘വിരാട്’എന്ന കപ്പലാണ് ആക്രമിക്കപ്പെട്ടത്. ഇതേ കപ്പലിനുനേരെ വെള്ളിയാഴ്ച രാത്രിയും ആക്രമണമുണ്ടായി.

274 മീറ്റർ നീളമുള്ള കൈറോസ് എന്ന റഷ്യൻ കപ്പലിനും തീപ്പിടിച്ചു. തീ അണയ്ക്കാനുള്ള ശ്രമം തുടരുകയാണെന്ന്‌ തുർക്കി‍യ അറിയിച്ചു. കപ്പലിലുണ്ടായിരുന്ന 25 ജീവനക്കാരെ രക്ഷാപ്രവർത്തകർ സുരക്ഷിതമായി പുറത്തെത്തിച്ചതായും അധികൃതർ അറിയിച്ചു.

ഉക്രയ്‌നിലെ വിവിധ ഉ‍ൗർജനിലയങ്ങൾക്കുനേരെ റഷ്യയും ആക്രമണം നടത്തി. കീവിൽ മൂന്ന്‌ പേരും ഡിനിപ്രോപെത്രോവ്‌സ്‌കിൽ രണ്ട്‌ പേരും കൊല്ലപ്പെട്ടതായി കീവ്‌ മേയർ അറിയിച്ചു. ക്രിമിയൻ പ്രവിശ്യ ലക്ഷ്യമിട്ടെത്തിയ 100 ഡ്രോണുകളെ പ്രതിരോധിക്കാനായതായി റഷ്യ അറിയിച്ചു.

​

ഉക്രയ്‌ൻ സംഘം യുഎസിലേക്ക്‌

റഷ്യ–ഉക്രയ്‌ൻ സംഘർഷം അവസാനിപ്പിക്കാനുള്ള സമാധാന ഉടമ്പടിയുടെ ഭാഗമായി വെടിനിർത്തൽ ചർച്ചകൾക്കായി ഉക്രയ്‌ൻ സംഘം അമേരിക്കയിലേക്ക്‌ തിരിച്ചതായി ഉക്രയ്‌ൻ പ്രസിഡന്റ്‌ വ്ളോദിമിർ സെലൻസ്‌കി. ഉക്രയ്‌ൻ ദേശീയ സുരക്ഷാ കൗൺസിലിന്റെ സെക്രട്ടറി റസ്റ്റം ഉമെറോവാണ് പ്രതിനിധി സംഘത്തിന്റെ തലവനെന്ന്‌ സെലെൻസ്കി എക്സിൽ കുറിച്ചു. സമാധാന നീക്കങ്ങളുടെ ഭാഗമായി യുഎസ്, ഉക്രയ്ൻ, റഷ്യ എന്നീ രാജ്യങ്ങളുടെ പ്രതിനിധികൾ അബുദാബിയിലും യുഎസ്, ഉക്രയ്ൻ പ്രതിനിധികൾ ജനീവയിലും നേരത്തെ ചർച്ച നടത്തിയിരുന്നു. തുടർചർച്ചകൾക്കായാണ്‌ സംഘം യുഎസിലേക്ക്‌ തിരിച്ചത്‌.