മൂന്നാം ലോക രാജ്യങ്ങളിൽ നിന്നുള്ള കുടിയേറ്റക്കാരെ ഇനി വേണ്ട: ഡോണൾഡ് ട്രംപ്

വാഷിങ്ടൻ: മൂന്നാം ലോക രാജ്യങ്ങളിൽ നിന്നുമുള്ള കുടിയേറ്റം സ്ഥിരമായി നിർത്തിവെക്കുമെന്ന പ്രഖ്യാപനവുമായി ഡോണൾഡ് ട്രംപ്. യുഎസ് സംവിധാനം "പൂർണ്ണമായി വീണ്ടെടുക്കുന്നതിന്" ഈ നീക്കം അത്യന്താപേക്ഷിതമാണെന്നും ട്രംപ് വ്യക്തമാക്കി. അഫ്ഗാൻ പൗരൻ വൈറ്റ് ഹൗസിന് സമീപം രണ്ട് നാഷണൽ ഗാർഡ് സൈനികർക്ക് നേരെ നടത്തിയ വെടിവയ്പ്പിന് പിന്നാലെയാണ് ട്രംപിന്റെ പ്രഖ്യാപനം. 'ട്രൂത്ത് സോഷ്യൽ' എന്ന പ്ലാറ്റ്‌ഫോമിലായിരുന്നു ട്രംപ് ഇക്കാര്യങ്ങൾ പറഞ്ഞത്.

നാഷണൽ ഗാർഡ് സൈനികരായ സാറാ ബെക്ക്‌സ്ട്രോമിനും (20), ആൻഡ്രൂ വുൾഫിനും (24) നേരെയാണ് വെടിവയ്പ്പുണ്ടായത്. ഗുരുതരമായി പരിക്കേറ്റ സാറാ ബെക്ക്‌സ്ട്രോം മരണത്തിന് കീഴടങ്ങി. വുൾഫ് ഗുരുതരാവസ്ഥയിൽ തുടരുകയാണ്.

സാങ്കേതികമായി രാജ്യം മുന്നോട്ട് പോയിട്ടും നിലവിലെ കുടിയേറ്റ നയം 'ഈ നേട്ടങ്ങളെയും പലരുടെയും ജീവിത സാഹചര്യങ്ങളെയും നശിപ്പിച്ചു' എന്ന് അദ്ദേഹം ആരോപിച്ചു. "യുഎസ് സംവിധാനം പൂർണ്ണമായി വീണ്ടെടുക്കുന്നതിന് വേണ്ടി എല്ലാ മൂന്നാം ലോക രാജ്യങ്ങളിൽ നിന്നുമുള്ള കുടിയേറ്റം ഞാൻ സ്ഥിരമായി നിർത്തിവെക്കും," ട്രംപ് പറഞ്ഞു.

'ഉറക്കം തൂങ്ങി ജോ ബൈഡൻ' ഒന്നും നോക്കാതെ ഒപ്പിട്ടു നൽകിയ, ദശലക്ഷക്കണക്കിന് നിയമവിരുദ്ധ പ്രവേശനാനുമതികൾ അവസാനിപ്പിക്കും. സകല കുടിയേറ്റ പദ്ധതികളും റദ്ദാക്കും.'

"അമേരിക്കക്ക് മുതൽക്കൂട്ടല്ലാത്ത, അല്ലെങ്കിൽ രാജ്യത്തെ സ്നേഹിക്കാൻ പറ്റാത്ത ആരെയും പുറത്താക്കും. നമ്മുടെ രാജ്യത്തെ പൗരന്മാരല്ലാത്തവർക്കുള്ള എല്ലാ ഫെഡറൽ ആനുകൂല്യങ്ങളും സബ്‌സിഡികളും നിർത്തലാക്കും. ആഭ്യന്തര സമാധാനത്തെ തകർക്കുന്ന കുടിയേറ്റക്കാരുടെ പൗരത്വം റദ്ദാക്കും. പൊതുചെലവോ സുരക്ഷാ ഭീഷണിയോ പാശ്ചാത്യ നാഗരികതയുമായി പൊരുത്തപ്പെടാത്തവരോ ആയ വിദേശ പൗരന്മാരെ നാടുകടത്തും," ട്രംപ് പ്രഖ്യാപിച്ചു.

ഇതുവഴി അനധികൃതവും പ്രശ്നങ്ങളുണ്ടാക്കുന്നതുമായ ജനസംഖ്യയിൽ വലിയ കുറവ് വരുത്താനാണ് ലക്ഷ്യമിടുന്നതെന്നും ട്രംപ് വ്യക്തമാക്കി. "തിരിച്ചുള്ള കുടിയേറ്റത്തിലൂടെ മാത്രമേ ഈ അവസ്ഥ പൂർണ്ണമായി മാറ്റാൻ കഴിയൂ. അല്ലാത്തവർക്ക് സന്തോഷകരമായ താങ്ക്‌സ്ഗിവിങ് ആശംസിക്കുന്നു, എന്നാൽ അമേരിക്കയുടെ തത്വങ്ങളെ വെറുക്കുകയും മോഷ്ടിക്കുകയും കൊല്ലുകയും നശിപ്പിക്കുകയും ചെയ്യുന്നവർക്ക് ഇവിടെ അധികകാലം തുടരാൻ കഴിയില്ല!" ട്രംപ് പറഞ്ഞു.