അമേരിക്കയിലെ ഇന്ത്യൻ വിദ്യാർഥിയുടെ കൊലപാതകം; ഒരാൾ പിടിയിൽ

ഹൂസ്റ്റൺ : യുഎസിൽ ​ഗ്യാസ് സ്റ്റേഷനിൽ ജോലി ചെയ്യുന്നതിനിടെ ഇന്ത്യൻ വിദ്യാർഥി വെടിയേറ്റുമരിച്ച സംഭവത്തിൽ ഒരാൾ പിടിയിൽ. ടെക്സാസിൽ നിന്നുള്ള 23കാരനാണ് പിടിയിലായത്. ഹൈദരാബാദ് സ്വദേശിയായ ചന്ദ്രശേഖർ പോളാണ് (27) ഡാലസിൽ പമ്പിൽ ജോലി ചെയ്യുന്നതിനിടെ വെടിയേറ്റ് മരിച്ചത്. വെള്ളി രാത്രിയായിരുന്നു സംഭവം.

2023-ൽ ഉപരിപഠനത്തിനായാണ് ചന്ദ്രശേഖർ പോൾ യുഎസിലേക്ക് പോയത്. ഹൈദരാബാദിൽ ഡെൻ്റൽ സർജറിയിൽ ബിരുദം പൂർത്തിയാക്കിയ ശേഷമാണ് അമേരിക്കയിലെത്തിയത്. ആറ് മാസം മുൻപ് മാസ്റ്റേഴ്സ് ബിരുദം പൂർത്തിയാക്കിയിരുന്നു. ഈസ്റ്റ്‌ചേസ് പാർക്ക്‌വേയിലെ പെട്രോൾ പമ്പിൽ പാർട്ട് ടൈം ഷിഫ്റ്റിൽ ജോലി ചെയ്യുന്നതിനിടെയാണ് പ്രതി ചന്ദ്രശേഖർ പോളിനെ വെടിവച്ചതെന്നും തുടർന്ന് ഉദ്യോഗസ്ഥർ പിടികൂടുന്നതിന് മുമ്പ് സംഭവസ്ഥലത്ത് നിന്ന് ഓടി രക്ഷപ്പെടുകയായിരുന്നുവെന്നും പൊലീസ് പറഞ്ഞു. വെടിയേറ്റ പോൾ സംഭവസ്ഥലത്തുവച്ചുതന്നെ മരിച്ചു.

നോർത്ത് റിച്ച്‌ലാൻഡ് ഹിൽസിൽ നിന്നുള്ള റിച്ചാർഡ് ഫ്ലോറസ് എന്നയാളെയാണ് പിടികൂടിയത്. വെടിവയ്പ്പിനുശേഷം ഫ്ലോറസ് ഒരു മൈൽ അകലെ വച്ച് മറ്റൊരു വാഹനത്തിന് നേരെ വെടിയുതിർത്തു. പിന്നീട് മെഡോബ്രൂക്ക് ഡ്രൈവിലെ വസതിയിലേക്ക് കടക്കാൻ ശ്രമിക്കുന്നതിനിടെ വാഹനം ഒരു ഗേറ്റിൽ ഇടിച്ചുകയറ്റിയതായും പൊലീസ് കൂട്ടിച്ചേർത്തു. പിന്നീട് ഉദ്യോഗസ്ഥർ പ്രതിയെ അറസ്റ്റ് ചെയ്യുകയായിരുന്നു. വാഹനത്തിൽ നിന്ന് തോക്ക് കണ്ടെടുത്തു. പ്രതി നിലവിൽ ആശുപത്രിയിലാണെന്നും കൊലപാതകക്കുറ്റം ചുമത്തിയിട്ടുണ്ടെന്നും ഫോർട്ട് വർത്ത് പൊലീസ് പറഞ്ഞു.

യുഎസിലെ ഷട്ട്ഡൗൺ കാരണം ഔപചാരിക പ്രസ്താവനയും അന്വേഷണവും വൈകിയതായി ഫോർട്ട് വർത്തിലെയും ടാരന്റ് കൗണ്ടിയിലെയും ഉദ്യോഗസ്ഥർ വ്യക്തമാക്കി. അന്വേഷണം പുരോഗമിക്കുകയാണെന്നും വെടിവയ്പ്പിന് പിന്നിലെ കാരണം ഇതുവരെ കണ്ടെത്തിയിട്ടില്ലെന്നും അധികൃതർ പറഞ്ഞു. ചന്ദ്രശേഖറിന്റെ മൃതദേഹം നാട്ടിലേക്ക് കൊണ്ടുപോകുന്നതിനായി അദ്ദേഹത്തിന്റെ കുടുംബവുമായി ബന്ധപ്പെട്ടിട്ടുണ്ടെന്ന് ഹൂസ്റ്റണിലെ ഇന്ത്യൻ കോൺസുലേറ്റ് ജനറൽ അറിയിച്ചു. മകൻ്റെ മൃതദേഹം യുഎസിൽ നിന്ന് നാട്ടിലെത്തിക്കാൻ സഹായിക്കണമെന്ന് ആവശ്യപ്പെട്ട് ചന്ദ്രശേഖറിൻ്റെ കുടുംബവും സർക്കാരിനെ സമീപിച്ചിരുന്നു.

കൊലപാതകത്തിൽ നിരവധി ഇന്ത്യൻ- അമേരിക്കൻ സമൂഹത്തിലെ അംഗങ്ങളും വിദ്യാർഥികളും ഞെട്ടൽ പ്രകടിപ്പിച്ചു. യുഎസിൽ ഇന്ത്യൻ വിദ്യാർഥികളെ ലക്ഷ്യമിട്ടുള്ള സമീപകാല അക്രമങ്ങൾ വ്യാപകമായിട്ടുണ്ടെന്ന് പലരും അഭിപ്രായപ്പെട്ടു. ചന്ദ്രശേഖർ പോളിന്റെ ഭൗതികാവശിഷ്ടങ്ങൾ ഇന്ത്യയിലേക്ക് കൊണ്ടുപോകുന്നതിനും കുടുംബത്തെ സഹായിക്കുന്നതിനുമായി ഒരു GoFundMe കാമ്പെയ്‌ൻ ആരംഭിച്ചിട്ടുണ്ട്. സംഭവത്തോടെ യുഎസിൽ പാർട്ട് ടൈം ജോലി ചെയ്യുന്ന വിദേശ വിദ്യാർഥികളുടെ സുരക്ഷയിൽ ആശങ്കയും വ്യാപകമാകുന്നുണ്ട്.