മെക്സിക്കൻ ട്രെയിൻ ഡബിൾ ഡെക്കർ ബസിൽ ഇടിച്ച് 10 പേർ കൊല്ലപ്പെട്ടു

മെക്സികോ: മധ്യ മെക്സിക്കോയിൽ ചരക്ക് ട്രെയിൻ ഡബിൾ ഡെക്കർ പാസഞ്ചർ ബസിൽ ഇടിച്ച് പത്ത് പേർ കൊല്ലപ്പെട്ടു. അപകടത്തിൽ 61 പേർക്ക് പരിക്കേറ്റു. ഓടിക്കൊണ്ടിരിക്കുന്ന ട്രെയിനിന് മുന്നിലൂടെ കടന്നുപോകാൻ ശ്രമിച്ച ബസാണ് അപകടത്തിൽപ്പെട്ടത്.

ഏഴ് സ്ത്രീകളും മൂന്ന് പുരുഷന്മാരും കൊല്ലപ്പെട്ടതായി മെക്സിക്കോ സ്റ്റേറ്റ് അറ്റോർണി ജനറൽ ഓഫീസ് അറിയിച്ചു. പരിക്കേറ്റവരിൽ ചിലരുടെ നില ഗുരുതരമാണെന്നും മറ്റുള്ളവരെ അടിയന്തിര ചികിത്സ നൽകി ആശുപത്രിയിൽ നിന്ന് ഡിസ്ചാർജ് ചെയ്തതായും ഉദ്യോ​ഗസ്ഥർ കൂട്ടിച്ചേർത്തു.

കനേഡിയൻ പസഫിക് കൻസാസ് സിറ്റി ഡി മെക്സിക്കോ റെയിൽവേ അപകടത്തിൽ അനുശോചനം രേഖപ്പെടുത്തി. റോഡ് അടയാളങ്ങൾ മാനിക്കണമെന്നും നിർദേശങ്ങൾക്കനുസരിച്ച് ക്രോസിംഗുകളിൽ നിർത്താനും ഡ്രൈവർമാരോട് റെയിൽ‌വേ ആഹ്വാനം ചെയ്തു.

തലസ്ഥാനമായ മെക്സിക്കോ സിറ്റിയിൽ നിന്ന് ഏകദേശം 115 കിലോമീറ്റർ (71 മൈൽ) വടക്കുപടിഞ്ഞാറായി സ്ഥിതി ചെയ്യുന്ന അറ്റ്ലാകോമുൽകോ എന്ന പട്ടണത്തിനും സമീപത്തുള്ള മൈക്കോവാക്കൻ സംസ്ഥാനത്തെ മറാവതിയോയ്ക്കും ഇടയിലുള്ള ഹൈവേയിലെ ഒരു വ്യാവസായിക മേഖലയിലാണ് കൂട്ടിയിടി ഉണ്ടായതെന്ന് പ്രാദേശിക അധികൃതർ പറഞ്ഞു.