ടൂറിസത്തെ പ്രോത്സാഹിപ്പിച്ച്‌ ഉത്തരകൊറിയ; വോൺസാൻ വിനോദസഞ്ചാര മേഖല തുറന്നു

സിയോൾ: ടൂറിസം മേഖലയ്ക്ക്‌ കൂടുതൽ കരുത്തുമായി ഉത്തരകൊറിയ. ഉത്തരകൊറിയയുടെ കിഴക്കൻ തീരത്ത് 20,000 ത്തോളം സന്ദർശകരെ ഉൾക്കൊള്ളാൻ കഴിയുന്ന വോൺസാൻ കൽമ തീരദേശ വിനോദസഞ്ചാര മേഖലയുടെ നിർമാണം പൂർത്തിയായതായി സംസ്ഥാന മാധ്യമങ്ങൾ വ്യാഴാഴ്ച റിപ്പോർട്ട് ചെയ്തു. ടൂറിസം പ്രോത്സാഹിപ്പിക്കുന്നതിനായി കിം ജോങ് ഉൻ മുന്നോട്ട്‌വെച്ച പ്രധാന പദ്ധതിയാണിത്.

രാജ്യത്ത്‌ കൂടുതൽ വിനോദസഞ്ചാര മേഖലകൾ നിർമിക്കുമെന്ന്‌ വിനോദസഞ്ചാര മേഖലയുടെ ഉദ്ഘാടന ചടങ്ങിൽ കിം ജോങ് ഉൻ പറഞ്ഞതായി കെസിഎൻഎ വാർത്താ ഏജൻസി അറിയിച്ചു.

photo credit: www.kcna.kp

തദ്ദേശവാസികളുടെ അവധിക്കാല കേന്ദ്രമായ വോൺസാൻ കടൽത്തീരം ഉത്തരകൊറിയ പുനർനിർമിച്ചുവരികയാണ്. 2014 ലാണ്‌ പദ്ധതിയ്ക്ക്‌ തുടക്കമിടുന്നത്‌. ജൂലൈ 1 മുതൽ ആഭ്യന്തര അതിഥികൾക്കായി മേഖല തുറക്കുമെന്ന് കെസിഎൻഎ പറഞ്ഞു.

ഫെബ്രുവരിയിൽ ഉത്തരകൊറിയ അന്താരാഷ്ട്ര വിനോദസഞ്ചാരികൾക്കായി അതിർത്തികൾ തുറന്നുകൊടുത്തിരുന്നു. രാജ്യത്തിന്റെ പ്രത്യേക സാമ്പത്തിക മേഖല സ്ഥിതി ചെയ്യുന്ന വടക്കുകിഴക്കൻ അതിർത്തി നഗരമായ റാസണിലേക്ക്‌ 13 അന്താരാഷ്‌ട്ര വിനോദസഞ്ചാരികൾക്ക്‌ ഫെബ്രുവരി 20 മുതൽ 24വരെ യാത്ര സംഘടിപ്പിച്ചതായി ബീജിങ്‌ ആസ്ഥാനമായ ട്രാവൽ ഏജൻസി അറിയിച്ചു.

photo credit: www.kcna.kp

2020 ന് ശേഷം റഷ്യയും ഉത്തരകൊറിയയും തമ്മിൽ ട്രെയിൻ സർവീസുകൾ ആരംഭിച്ചിരുന്നു. മോസ്‌കോയിൽ നിന്ന്‌ സിയോളിലേയ്ക്കുള്ള പാസഞ്ചർ ട്രെയിൻ സർവീസ് പുനരാരംഭിച്ചുകൊണ്ട് ടൂറിസം മേഖലയിലെ സഹകരണം വിപുലീകരിക്കു എന്നതായിരുന്നു ഇരുരാജ്യങ്ങളുടെയും ലക്ഷ്യം.

ഒരുകാലത്ത് ഉത്തരകൊറിയയുടെ പ്രധാന വരുമാന സ്രോതസ്സായിരുന്നു ടൂറിസം. മുമ്പ് ആയിരക്കണക്കിന് വിദേശ വിനോദസഞ്ചാരികൾ, പ്രധാനമായും ചൈനയിൽ നിന്നുള്ളവരുടെ പ്രധാന ടൂറിസ്റ്റ്‌ സ്‌പോട്ടായിരുന്നു ഉത്തരകൊറിയ. ഉത്തരകൊറിയ സന്ദർശിക്കുന്നവരിൽ 90% വും ചൈനീസ്‌ സഞ്ചാരികളാണ്‌. പ്രതിവർഷം 300,000 വരെ ചൈനീസ് വിനോദസഞ്ചാരികൾ ഉത്തരകൊറിയയിലേക്ക് വന്നിരുന്നു. 2024 അവസാനത്തോടെ, ഏകദേശം 880 റഷ്യൻ വിനോദസഞ്ചാരികളും ഉത്തരകൊറിയ സന്ദർശിച്ചതായി റിപ്പോർട്ടുണ്ട്‌.