അമേരിക്കയിൽ പെട്രോൾ പമ്പിൽ ജോലി ചെയ്യുന്നതിനിടെ ഇന്ത്യൻ വിദ്യാർഥി വെടിയേറ്റു മരിച്ചു

ഡാലസ്: അമേരിക്കയിലെ ഡാലസിൽ ഇന്ത്യൻ വിദ്യാർഥി വെടിയേറ്റു മരിച്ചു. ഹൈദരാബാദ് സ്വദേശിയായ 27 വയസുകാരനായ ചന്ദ്രശേഖർ പോളാണ് മരിച്ചത്. പെട്രോൾ പമ്പിൽ ജോലി ചെയ്യുന്നതിനിടെയാണ് ചന്ദ്രശേഖരൻ അജ്ഞാതൻ്റെ വെടിയേറ്റ് കൊല്ലപ്പെട്ടത്.

2023-ൽ ഉപരിപഠനത്തിനായാണ് ചന്ദ്രശേഖർ പോൾ യുഎസിലേക്ക് പോയത്. ഹൈദരാബാദിൽ ഡെൻ്റൽ സർജറിയിൽ ബിരുദം പൂർത്തിയാക്കിയ ശേഷമാണ് അദ്ദേഹം അമേരിക്കയിലെത്തിയത്. ആറ് മാസം മുൻപ് മാസ്റ്റേഴ്സ് ബിരുദം പൂർത്തിയാക്കിയ ചന്ദ്രശേഖർ, ഒരു മുഴുസമയ ജോലിക്ക് വേണ്ടി ശ്രമിക്കുന്നതിനിടെയാണ് പെട്രോൾ പമ്പിൽ പാർട്ട്-ടൈം ജോലി ചെയ്തിരുന്നത്.

മകൻ്റെ മൃതദേഹം യു എസിൽ നിന്ന് നാട്ടിലെത്തിക്കാൻ സഹായിക്കണമെന്ന് ആവശ്യപ്പെട്ട് ചന്ദ്രശേഖറിൻ്റെ കുടുംബം സർക്കാരിനെ സമീപിച്ചിരിക്കുകയാണ്.

ബിആർഎസ് എംഎൽഎ സുധീർ റെഡ്ഡിയും മുൻ മന്ത്രി ടി ഹരീഷ് റാവുവും ഹൈദരാബാദിലെ വിദ്യാർഥിയുടെ വീട്ടിലെത്തി കുടുംബാംഗങ്ങളെ കണ്ടു. ചന്ദ്രശേഖറിൻ്റെ മൃതദേഹം എത്രയും വേഗം നാട്ടിലെത്തിക്കാൻ സർക്കാർ അടിയന്തര നടപടി സ്വീകരിക്കണമെന്ന് ആവശ്യപ്പെട്ടു.

"വലിയ ഉയരങ്ങളിൽ എത്തുമെന്ന് വിശ്വസിച്ചിരുന്ന മകൻ ഇനിയില്ലെന്നറിയുമ്പോൾ മാതാപിതാക്കൾ അനുഭവിക്കുന്ന വേദന ഹൃദയഭേദകമാണ്," ഹരീഷ് റാവു തൻ്റെ ഓൺലൈൻ പോസ്റ്റിൽ പറഞ്ഞു.