പൊതുസ്ഥലത്ത് മൂത്രമൊഴിക്കുന്നതിനെ എതിർത്തു; യുഎസിൽ ഹരിയാന സ്വദേശിയെ വെടിവച്ച് കൊന്നു

കാലിഫോർണിയ: യുഎസിൽ പൊതുസ്ഥലത്ത് മൂത്രമൊഴിക്കുന്നതിനെ എതിര്‍ത്ത ഹരിയാന സ്വദേശിയെ വെടിവച്ച് കൊന്നു. ഹരിയാനയിലെ ജിന്ദ് സ്വദേശിയായ കപിൽ (26) ആണ് കൊല്ലപ്പെട്ടത്. കാലിഫോർണിയയിലെ ഒരു കടയിൽ സെക്യൂരിറ്റി ഗാർഡായി ജോലി ചെയ്യുകയായിരുന്നു കപിൽ.

ജോലി ചെയ്യുന്ന കടയ്ക്ക് പുറത്ത് ഒരാൾ മൂത്രമൊഴിക്കുന്നത് കണ്ട് കപിൽ എതിർത്തു. തുടർന്ന് ഇരുവരും തമ്മിൽ തർക്കമുണ്ടായി. സം​ഘർഷത്തിനിടെ പ്രതി തോക്കെടുത്ത് കപിലിന് നേരെ വെടിയുതിർക്കുകയായിരുന്നുവെന്ന് ജിന്ദിലെ ബരാ കലൻ ഗ്രാമത്തലവൻ സുരേഷ് കുമാർ ഗൗതം പറഞ്ഞു.

വെടിവയ്പ്പ് നടന്നയുടനെ ദൃക്‌സാക്ഷികൾ പൊലീസിനെ വിവരം അറിയിച്ചു. ​ഗുരുതരമായി പരിക്കേറ്റ കപിലിനെ അടുത്തുള്ള ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൂന്ന് വർഷങ്ങൾക്ക് മുമ്പാണ് കപിൽ അമേരിക്കയിലേക്ക് പോയത്. യുഎസ് അധികാരികൾ പ്രതിയുടെ പേര് പുറത്തുവിട്ടിട്ടില്ല. നിയമ നടപടികൾ സ്വീകരിച്ചിട്ടുണ്ടോ എന്നും അധികൃതർ വ്യക്തമാക്കിയിട്ടില്ല.