ട്രെയിനിൽ നിന്ന് വീണ് യുവതി മരിച്ച സംഭവം; ടിടിഇ തള്ളിയിട്ടതെന്ന് ഭര്‍ത്താവും കുടുംബവും, കേസ്

ന്യൂഡൽഹി: ഓടുന്ന ട്രെയിനിൽ നിന്നു വീണ് യുവതി മരിച്ച സംഭവത്തിൽ ടിക്കറ്റ് എക്സാമിനർക്കെതിരെ (ടിടിഇ) കൊലക്കുറ്റം ചുമത്തി കേസ് രജിസ്റ്റർ ചെയ്തു. ഉത്തർപ്രദേശിലെ ഇറ്റാവയ്ക്ക് സമീപം പട്‌ന–ആനന്ദ് വിഹാർ സ്പെഷ്യൽ ട്രെയിനിൽ നിന്നാണ് യുവതി താഴേക്ക് വീണത്. ടിക്കറ്റിനെച്ചൊല്ലിയുള്ള തർക്കത്തിനിടെ ടിടിഇ ട്രെയിനിൽ നിന്ന് തള്ളിയിട്ടതാണെന്ന് യുവതിയുടെ കുടുംബം ആരോപിച്ചു.

ആരതി യാദവ് (32) എന്ന യുവതിയാണ് മരിച്ചത്. ഭർത്താവ് അജയ് യാദവ് ഇന്ത്യൻ നാവികസേനയിൽ ഉദ്യോഗസ്ഥനാണ്. ചികിത്സയ്ക്കായി ഡൽഹിയിലേക്ക് തനിച്ചു യാത്ര ചെയ്യുകയായിരുന്നു ആരതി. ചൊവ്വാഴ്ച രാവിലെ കാൺപൂരിൽ നിന്നാണ് ഇവർ സ്ലീപ്പർ കോച്ചിൽ കയറിയത്. എന്നാൽ, ഇവർക്ക് ടിക്കറ്റ് ഉണ്ടായിരുന്നത് മറ്റൊരു ട്രെയിനിലേക്കായിരുന്നു. ഇത് ചോദ്യം ചെയ്ത ടിടിഇ സന്തോഷ് കുമാർ ജനറൽ കോച്ചിലേക്ക് മാറാൻ യുവതിയോട് ആവശ്യപ്പെട്ടു. തർക്കം രൂക്ഷമായതോടെ ടിടിഇ ആരതിയെ ട്രെയിനിൽ നിന്ന് തള്ളിയിട്ടെന്നാണ് കുടുംബത്തിന്റെ പരാതി.

സംഭവം നടന്ന സ്ഥലത്തുനിന്ന് നാല് കിലോമീറ്റർ അകലെ നിന്നാണ് ആരതിയുടെ പഴ്സ് കണ്ടെത്തിയതെന്ന് കുടുംബം പറയുന്നു. മൊബൈൽ ഫോൺ മറ്റൊരു സ്ഥലത്ത് വെച്ചാണ് കണ്ടെടുക്കാനായത്. മൃതദേഹവും സാധന സാമഗ്രികളും പലയിടങ്ങളിൽ ചിതറിക്കിടക്കുന്ന നിലയിൽ കണ്ടത് കൊലപാതക സാധ്യത വർദ്ധിപ്പിക്കുന്നുവെന്നും ഇത് അപകടമരണമല്ലെന്നും കുടുംബാംഗങ്ങൾ ആരോപിച്ചു. കുടുംബത്തിന്റെ പരാതിയുടെ അടിസ്ഥാനത്തിൽ ഇറ്റാവയിലെ ഗവൺമെന്റ് റെയിൽവേ പൊലീസ് ടിടിഇക്കെതിരെ കൊലക്കുറ്റത്തിന് കേസെടുത്തു.

എന്നാൽ, സംഭവത്തിന് ദൃക്‌സാക്ഷികളായ അഞ്ച് യാത്രക്കാർ ടിടിഇയെ അനുകൂലിച്ചുകൊണ്ട് റെയിൽവേയ്ക്ക് രേഖാമൂലം മൊഴി നൽകിയിട്ടുണ്ട്. ജനറൽ കോച്ചിലേക്ക് മാറാൻ ടിടിഇ ആവശ്യപ്പെട്ടപ്പോൾ യുവതി സ്വയം ചാടുകയായിരുന്നുവെന്നാണ് ഇവരുടെ മൊഴി. താൻ അടുത്ത സ്റ്റേഷനിൽ ഇറങ്ങിക്കോളാം എന്ന് പറഞ്ഞ യുവതി, ടിടിഇ വീണ്ടും കോച്ചിൽ നിന്ന് മാറാൻ ആവശ്യപ്പെട്ടപ്പോൾ "ഞാൻ ട്രെയിനിൽ നിന്ന് ചാടും" എന്ന് പറഞ്ഞ ശേഷം ബാഗെടുത്ത് പുറത്തേക്ക് ചാടുകയായിരുന്നു എന്നാണ് ഒരു സഹയാത്രികൻ മൊഴി നൽകിയത്.

എങ്കിലും, ടിടിഇയുടെ പെരുമാറ്റത്തെക്കുറിച്ച് ഒരു യാത്രക്കാരൻ 139-ൽ വിളിച്ച് പരാതിപ്പെട്ടിരുന്നെന്നും ഇപ്പോൾ അയാൾ മൊഴി മാറ്റിയെന്നുമാണ് ആരതിയുടെ ഭർത്താവ് അജയ് യാദവ് ആരോപിക്കുന്നത്. ആത്മഹത്യ ചെയ്യാനാണ് ഉദ്ദേശിച്ചതെങ്കിൽ 130 കിലോമീറ്ററിലധികം യാത്ര ചെയ്യേണ്ട ആവശ്യം യുവതിക്കില്ലായിരുന്നു എന്നും അദ്ദേഹം കൂട്ടിച്ചേർത്തു. നിലവിൽ കേസിൽ സമഗ്രമായ അന്വേഷണം പുരോഗമിക്കുകയാണ്.