ദിത്വാ ചുഴലിക്കാറ്റ്: തമിഴ്‌നാട്ടിൽ കനത്ത മഴ

ചെന്നൈ : തമിഴ്‌നാട് തീരത്തേക്ക് പ്രവേശിച്ച ദിത്വ ചുഴലിക്കാറ്റിനെ തുടർന്ന് സംസ്ഥാനത്ത് പലയിടങ്ങളിലും വ്യാപകമായി മഴ പെയ്തു. ശനിയാഴ്ച സംസ്ഥാനത്തെ തീരപ്രദേശങ്ങളിലും കാവേരി ഡെൽറ്റ ജില്ലകളിലും കനത്ത മഴ നാശം വിതച്ചു. രാമന്തപുരം ജില്ലയിൽ മഴയിൽ കനാലിനു സമീപം ടൂറിസ്റ്റ് വാൻ കുടുങ്ങി. പിൻവാതിലിലൂടെ പുറത്തേക്ക് ഇറങ്ങിയതിനാൽ യാത്രക്കാർ രക്ഷപ്പെട്ടു. ശക്തമായ കാറ്റും കനത്ത മഴയും ഉണ്ടാകാൻ സാധ്യതയുള്ളതിനാൽ ജനങ്ങൾ അനാവശ്യമായി പുറത്തിറങ്ങരുതെന്ന് ജില്ലാ ഭരണകൂടം മുന്നറിയിപ്പ് നൽകിയിട്ടുണ്ട്. ധനുഷ്കോടി സന്ദർശിക്കുന്ന വിനോദസഞ്ചാരികൾക്കും മുന്നറിയിപ്പ് നൽകിയിട്ടുണ്ട്.

തഞ്ചാവൂർ, നാഗപട്ടണം, മയിലാടുതുറൈ, തിരുവിടൈമരുദൂർ, കുംഭകോണം, പാപനാശം, തിരുവൈയാരു, പട്ടുകോട്ടൈ, കടലൂർ, ചെന്നൈയുടെ ചില ഭാഗങ്ങൾ എന്നിവയുൾപ്പെടെ സംസ്ഥാനത്തെ വിവിധ ഭാഗങ്ങളിൽ കനത്ത മഴ പെയ്തു. മഴയെത്തുടർന്ന് വിവിധ ജില്ലകളിലെ സ്കൂളുകൾക്ക് ഇന്ന് അവധി നൽകി. രാമന്തപുരം, നാഗപട്ടണം ജില്ലകളിൽ ശക്തമായ കാറ്റും വേലിയേറ്റവും മഴയും റിപ്പോർട്ട് ചെയ്തു.

തെക്ക് പടിഞ്ഞാറൻ ബംഗാൾ ഉൾക്കടലിൽ രൂപം കൊണ്ട ദിത്വാ ചുഴലിക്കാറ്റ് 6 മണിക്കൂറിനുള്ളിൽ മണിക്കൂറിൽ 8 കിലോമീറ്റർ വേഗതയിൽ വടക്ക്-വടക്ക് പടിഞ്ഞാറൻ ദിശയിലേക്ക് നീങ്ങി, ഇന്ന് പുലർച്ചെ 5.30 ന് തെക്ക് പടിഞ്ഞാറൻ ബംഗാൾ ഉൾക്കടലിലും അതിനോട് ചേർന്നുള്ള വടക്കൻ ശ്രീലങ്കയിലും കേന്ദ്രീകരിച്ചതായി ഐഎംഡി അറിയിച്ചു. കാരയ്ക്കലിന് തെക്ക്- തെക്കുകിഴക്കായി 190 കിലോമീറ്റർ, പുതുച്ചേരിക്ക് തെക്ക്-തെക്കുകിഴക്കായി 300 കിലോമീറ്റർ, ചെന്നൈയ്ക്ക് 400 കിലോമീറ്റർ തെക്ക് മാറി സ്ഥിതി ചെയ്യുന്ന ഇത് നവംബർ 30 ന് പുലർച്ചെയോടെ വടക്ക്-വടക്കുപടിഞ്ഞാറോട്ട് നീങ്ങി തെക്ക് പടിഞ്ഞാറൻ ബംഗാൾ ഉൾക്കടലിൽ വടക്കൻ തമിഴ്‌നാട്, പുതുച്ചേരി, അതിനോട് ചേർന്നുള്ള തെക്കൻ ആന്ധ്രാപ്രദേശ് തീരങ്ങൾ എന്നിവിടങ്ങളിൽ എത്തുമെന്നും കാലാവസ്ഥാ ബുള്ളറ്റിൻ അറിയിച്ചു.