വസ്തു തർക്കം: അതിർത്തി കയ്യേറിയെന്നാരോപിച്ച് കുടുംബങ്ങൾ തമ്മിൽ ഏറ്റുമുട്ടൽ; സ്ത്രീ വെടിയേറ്റ് മരിച്ചു

ജയ്പൂർ: രാജസ്ഥാനിൽ വസ്തു തർക്കത്തെ തുടർന്നുണ്ടായ വെടിവയ്പ്പിൽ സ്ത്രീ കൊല്ലപ്പെട്ടു. 52 കാരിയായ കൈലാഷി ദേവി ആണ് കൊല്ലപ്പെട്ടത്. പത്ത് കുടുംബാംഗങ്ങൾക്ക് ആക്രമണതതിൽ പരിക്കേറ്റു. ജൗസ ജില്ലയിൽ ബാഗ്ദിയോൺ കി ബാസിലാണ് ആക്രമണം നടന്നത്. സംഭവം ജനങ്ങൾക്കിടയിൽ പ്രതിഷേധത്തിനിടയാക്കി. നാട്ടുകാർ സ്ത്രീയുടെ മൃതദേഹവുമായി ബസ്വ പൊലീസ് സ്റ്റേഷനും ആൽവാർ-സിക്കന്ദ്ര ഹൈവേയും ഉപരോധിച്ചു. പ്രതിയെ അറസ്റ്റ് ചെയ്യണമെന്ന് ആവശ്യപ്പെട്ടായിരുന്നു പ്രതിഷേധം. തുടർന്ന് ദീർഘ സമയം ഹൈവേയിലൂടെ ​ഗതാ​ഗതം തടസപ്പെട്ടു. ​ഗതാ​ഗതക്കുരുക്കും രൂക്ഷമായി.

കൈലാഷി ദേവിയും കുടുംബാംഗങ്ങളും രാവിലെ ബാഗ്ദിയോൺ കി ബാസിലെ അവരുടെ കൃഷിയിടത്തിലേക്ക് പോയപ്പോഴാണ് സംഭവം. ഭൂമിയുടെ അതിർത്തി സംബന്ധിച്ച് കൈലാഷി ദേവിയുടെ ഭർത്താവ് ഗോപാലും പാപ്പുറാം എന്നയാളുമായി തർക്കം നിലനിന്നിരുന്നുവെന്ന് പൊലീസ് പറഞ്ഞു. ബുധനാഴ്ച രാത്രി പാപ്പുറാമിന്റെ കുടുംബം സ്ഥലത്തിന്റെ അതിർത്തി വേലികെട്ടി തിരിച്ചു. എന്നാൽ തങ്ങളുടെ സ്ഥലം കയ്യേറി വേലികെട്ടിയെന്നാണ് ​ഗോപാൽ പറയുന്നത്. വ്യാഴാഴ്ച രാവിലെ ഗോപാലിന്റെ കുടുംബം വേലി മാറ്റിസ്ഥാപിക്കാൻ ശ്രമിച്ചു. ഇതോടെ ഇരു കുടുംബങ്ങളും തമ്മിൽ ഏറ്റുമുട്ടലുണ്ടായി.

സംഘർഷത്തിനിടെ രാജേന്ദ്രൻ എന്നയാളാണ് വെടിയുതിർത്തത്. വെടിയേറ്റ കൈലാഷി ദേവി സംഭവസ്ഥലത്തുവെച്ചുതന്നെ മരിച്ചു. കൈലാഷിയുടെ സഹോദരന്റെ ഭാര്യ ബിദം ദേവിയ്ക്കും (53) വെടിയേറ്റു. തലയ്ക്ക് പരിക്കേറ്റ ബിദത്തിനെ ഗുരുതരാവസ്ഥയിൽ ദൗസ ജില്ലാ ആശുപത്രിയിൽ പ്രവേശിപ്പിച്ചു. ​ഗോപാൽ ഉൾപ്പെടെ ഒമ്പത് പേർക്ക് മർദനമേറ്റു. ഇവർ ബസ്വ ആശുപത്രിയിൽ ചികിത്സയിലാണ്. നാട്ടുകാർ പ്രതിഷേധവുമായി എത്തിയതോടെ പാപ്പുറാമിന്റെ കുടുംബം ഒളിവിൽ പോയി.