ഹരിയാനയിൽ പൊലീസ് ഉദ്യോ​ഗസ്ഥന്റെ മരണം: രണ്ട് ഉന്നത പൊലീസുകാർക്കെതിരെ കേസ്

ചണ്ഡി​ഗഡ്: ഹരിയാനയിലെ പൊലീസ് ഉദ്യോഗസ്ഥൻ ആത്മഹത്യ ചെയ്ത സംഭവത്തിൽ രണ്ട് ഉന്നത പൊലീസുകാർക്കെതിരെ കേസ്. ഹരിയാന ഡിജിപി ശത്രുജീത് സിംഗ് കപൂർ, റോഹ്തക് എസ്പി നരേന്ദ്ര ബിജാർനിയ എന്നിവർക്കെതിരെയാണ് കേസ് രജിസ്റ്റർ ചെയ്തത്. ഹരിയാന എഡിജിപിയായിരുന്ന വൈ പുരൺ കുമാർ കഴിഞ്ഞ ദിവസം ജീവനൊടുക്കിയിരുന്നു.

പുരണിന്റെ ഭാര്യയും ഐഎഎസ് ഉദ്യോഗസ്ഥനുമായ അൻമീത് പി കുമാർ ഡിജിപിക്കെതിരെ ആത്മഹത്യാപ്രേരണാക്കുറ്റത്തിന് പരാതി നൽകിയിരുന്നു. ഈ പരാതിയുടെ അടിസ്ഥാനത്തിലാണ് കേസെടുത്തത്. പട്ടികജാതി-പട്ടികവർഗ (അതിക്രമങ്ങൾ തടയൽ) നിയമം, 1989 ലെ 3(1)(r) എന്നീ വകുപ്പുകൾ പ്രകാരം ചണ്ഡീഗഡിലെ സെക്ടർ 11 പൊലീസ് ആണ് കേസ് രജിസ്റ്റർ ചെയ്തത്.

കഴിഞ്ഞ ചൊവ്വാഴ്ച ചണ്ഡിഗഡിലെ സെക്ടർ 11ലുള്ള സ്വവസതിയിൽ പുരണിനെ വെടിയേറ്റ് മരിച്ച നിലയിൽ കണ്ടെത്തുകയായിരുന്നു. മാനസിക പീഡനം' ആരോപിച്ച് അദ്ദേഹം എഴുതിയ എട്ട് പേജുള്ള ആത്മഹത്യാ കുറിപ്പ് പൊലീസ് കണ്ടെടുത്തിട്ടുണ്ട്. ജാതിയുടെ പേരിൽ തന്റെ ഭർത്താവിനെ അധിക്ഷേപിച്ചു എന്നും, ഇത് ആത്മഹത്യയിലേക്ക് നയിച്ചു എന്നും അംനീത് നൽകിയ പരാതിയിൽ പറയുന്നു. പുരൺകുമാറിന്റെ മരണത്തിൽ കൂടുതൽ അന്വേഷണം പുരോ​ഗമിക്കുകയാണ്.