സഹോദരിമാരുടെ എഐ നിർമിത അശ്ലീല ചിത്രം കാണിച്ച് ഭീഷണിപ്പെടുത്തി; പത്തൊമ്പതുകരൻ ജീവനൊടുക്കി

ഫരീദാബാദ്: സഹോദരിമാരുടെ എഐ നിർമിത അശ്ലീല ചിത്രം കാണിച്ച് ഭീഷണിപ്പെടുത്തിയതിനെ തുടർന്ന് പത്തൊമ്പതുകരൻ ജീവനൊടുക്കി. ഹരിയാനയിലാണ് സംഭവം. ഡിഎവി കോളേജിലെ രണ്ടാം വർഷ ബിരുദ വിദ്യാർഥിയായ രാഹുൽ ഭാരതിയാണ് മരിച്ചത്.

ഫരീദാബാദ് ബസവെലായിലാണ് രാഹുലും കുടുംബവും താമസിക്കുന്നത്. സഹോദരിമാരുടെ എഐ ചിത്രങ്ങൾ കാണിച്ച് രാഹുലിനോട് പ്രതി 20,000 രൂപ ആവശ്യപ്പെട്ടതായും പണം നൽകിയില്ലെങ്കിൽ ഫോട്ടോകൾ സോഷ്യൽ മീഡിയയിൽ പ്രചരിപ്പിക്കുമെന്ന് ഭീഷണിപ്പെടുത്തിയതായും കുടുംബം പറഞ്ഞു. കുടുംബത്തിന്റെ പരാതിയിൽ രണ്ട് പേർക്കെതിരെ പൊലീസ് കേസെടുത്തു.

രണ്ടാഴ്ചകൾക്ക് മുമ്പാണ് രാഹുലിനെ പ്രതികൾ ഭീഷണിപ്പെടുത്തിയതെന്ന് കുടുംബം പറഞ്ഞു. മകന്റെ മൊബൈൽഫോൺ പ്രതികൾ ഹാക്ക് ചെയ്തതായി രാഹുലിന്റെ അച്ഛൻ മനോജ് ഭാരതി പറഞ്ഞു. തുടർന്നാണ് വാട്ട്സാപ്പിലൂടെ രാഹുലിന് സഹോദരിമാരുടെ എഐ നിർമിതമായ മോർഫ് ചെയ്ത ചിത്രങ്ങൾ ലഭിക്കാൻ തുടങ്ങിയത്.

ചിത്രങ്ങൾ പരസ്യപ്പെടുത്തുമെന്ന് പ്രതികൾ നിരന്തരമായി ഭീഷണിപ്പെടുത്തിയിരുന്നു. രാഹുലിന്റെ വാട്ട്സാപ്പ് ചാറ്റുകൾ പരിശോധിച്ച പൊലീസ് സംഭവം സ്ഥിരീകരിച്ചു. സാഹചര്യങ്ങളുടെ സമ്മർദം രാഹുലിന് താങ്ങാനായില്ല. ശനിയാഴ്ച രാത്രി ഏഴോടെ മുറിയിൽ മരിച്ച നിലയിൽ കണ്ടെത്തുകയായിരുന്നുവെന്ന് മനോജ് ഭാരതി പറഞ്ഞു.