ധർമസ്ഥല ; കുഴിച്ചിട്ട സ്ഥലത്ത് സാക്ഷിയെ എത്തിച്ച് തെളിവെടുത്തു

ധർമസ്ഥല

പത്തുവർഷം മുമ്പ് നിരവധി സ്ത്രീകളെ കൊന്നു കുഴിച്ചിട്ടെന്ന് വെളിപ്പെടുത്തിയ സാക്ഷിയുമായി പ്രത്യേക അന്വേഷക സംഘം ധർമസ്ഥലയിലെത്തി. കുഴിച്ചിട്ടുവെന്ന് ഇയാൾ അവകാശപ്പെടുന്ന നേത്രാവതി കുളിക്കടവിന്‌ സമീപം 15 സ്ഥലങ്ങൾ സംഘം അടയാളപ്പെടുത്തി. അവിടെ മറ്റുള്ളവർ പ്രവേശിക്കുന്നത് തടയാൻ അതിരുകൾ കെട്ടി.

തിങ്കൾ രാവിലെ 11.30ന് മുഖംമൂടി ധരിച്ച് അഭിഭാഷകനൊപ്പം ബൾത്തങ്ങാടിയിലെ എസ്‌ഐടി ഓഫീസിലെത്തിയ സാക്ഷിയിൽനിന്ന്‌ അന്വേഷണ ഉദ്യോഗസ്ഥൻ ജിതേന്ദ്ര കുമാർ ദയാമ വിവരങ്ങൾ ആരാഞ്ഞു. തുടർന്നാണ്‌ സംഭവ സ്ഥലത്തേക്ക്‌ കനത്ത സുരക്ഷയിൽ ഇയാളെ കൊണ്ടുപോയത്‌. ഫോറൻസിക് സംഘം, റവന്യു, വനം വകുപ്പുകളിലെ ഉദ്യോഗസ്ഥർ, ലാൻഡ് റെക്കോർഡ്സ് വിഭാഗം ജീവനക്കാർ എന്നിവരും ഒപ്പമുണ്ടായിരുന്നു. സാക്ഷി തിരിച്ചറിഞ്ഞ സ്ഥലങ്ങളിലെല്ലാം സ്‌പോട്ട് മഹസർ നടത്തുമെന്ന്‌ ഉദ്യോഗസ്ഥർ പറഞ്ഞു.

കഴിഞ്ഞ മൂന്നിനാണ്, കർണാടകയെ ഞെട്ടിച്ച വെളിപ്പെടുത്തലുണ്ടായത്. താൻ കുഴിച്ചെടുത്തത് എന്നവകാശപ്പെട്ട് എല്ലിന്റെ ഭാഗങ്ങളുമായെത്തി ഇയാൾ ബൾത്തങ്ങാടി കോടതിയിൽ രഹസ്യമൊഴി നൽകിയിരുന്നു. സാക്ഷി പറഞ്ഞ കാലയളവിൽ ധർമസ്ഥലയിലുണ്ടായ ദുരൂഹ മരണങ്ങൾ, കാണാതാകലുകൾ എന്നിവയുടെ കണക്ക് തദ്ദേശ, റവന്യു വകുപ്പുകളുടെ സഹകരണത്തോടെ കണ്ടെത്തും.

ആരൊക്കെയാണ്‌ കൊല്ലപ്പെട്ടത്‌ എന്നതിൽ ഒരുവിവരവും ഇല്ലെന്നതാണ്‌ അന്വേഷക സംഘത്തെ കുഴക്കുന്നത്. എംബിബിഎസ് വിദ്യാർഥിനി അനന്യ ഭട്ടിന്റെ മൃതദേഹം കിട്ടാത്തത് മാത്രമാണ് പരാതിയായി ഇപ്പോഴും പൊലീസിന് മുന്നിലുള്ളത്. സമാനമായ തിരോധാനങ്ങളുടെ കണക്കെടുത്ത്, കേസിന് തുമ്പുണ്ടാക്കാനുള്ള ശ്രമമാണ് അന്വേഷക സംഘം നടത്തുന്നത്.

ആരോപണ വിധേയരായ കുടുംബം കർണാടകത്തിലും ഡൽഹി രാഷ്ട്രീയത്തിലും വലിയ സ്വാധീനമുള്ളവരായതിനാൽ അന്വേഷണത്തിന്റെ ഭാവി സംബന്ധിച്ചും ആക്ഷൻ ക‍ൗൺസിൽ ഭാരവാഹികൾക്ക് ആശങ്കയുണ്ട്.