ധർമസ്ഥല ; മനുഷ്യന്റെ അസ്ഥി കിട്ടി , തിരച്ചിൽ തുടരും

ധർമസ്ഥല (കർണാടകം)

ക്ഷേത്രപട്ടണമായ ധർമസ്ഥലയിൽ മൃതദേഹങ്ങൾ കുഴിച്ചിട്ടെന്ന്‌ സാക്ഷി ചൂണ്ടിക്കാണിച്ച സ്ഥലത്തുനിന്ന്‌ മനുഷ്യന്റെ അസ്ഥികൾ കണ്ടെത്തി. ധർമസ്ഥല നേത്രാവതി സ്‌നാനഘട്ടിനടുത്ത കാട്ടിലാണ്‌ മൂന്നടി താഴ്‌ചയിൽ അന്വേഷക സംഘം വ്യാഴാഴ്‌ച കണ്ടെത്തിയത്‌. പുരുഷന്റേതെന്ന്‌ സംശയിക്കുന്ന അസ്ഥിക്കഷണം ഫോറൻസിക് പരിശോധനക്ക് അയച്ചു. മൂന്നുനാൾ അഞ്ചിടത്ത്‌ തിരച്ചിൽ നടത്തിയെങ്കിലും ഒന്നും കിട്ടിയിരുന്നില്ല. ധർമസ്ഥലയിൽ കാണാതായി എന്നു പറയുന്നവരുടെ ശരീരാവശിഷ്‌ടമാണോ എന്നും പരിശോധിക്കും.

ധർമസ്ഥലയിൽ പൊതുശ്‌മശാനം തുടങ്ങുംമുമ്പ്‌ ഈ ഭാഗത്താണ്‌ മൃതദേഹങ്ങൾ അടക്കിയത്‌ എന്നും വാദമുയരുന്നുണ്ട്. പരാതിക്കാരൻ പറഞ്ഞ മറ്റ്‌ അഞ്ചിടത്തും എട്ടടി ആഴത്തിലും 15 അടി വീതിയിലും കുഴിച്ചു. നേത്രാവതിക്കരയിലും ദേശീയപതായോരത്തുമായി 13 സ്ഥലത്തും കന്യാടി വനപ്രദേശത്ത്‌ രണ്ടിടത്തുമാണ് പരിശോധന.

പുത്തൂർ അസിസ്റ്റന്റ് കമീഷണർ സ്റ്റെല്ല വർഗീസ്, ഫോറൻസിക് വിദഗ്ധർ ഡോ. ജഗദീഷ് റാവു, ഡോ. രശ്‌മി എന്നിവരും റവന്യു, വനം അധികൃതരും ഡോഗ് സ്‌ക്വാഡും ഇരുപതംഗ എസ്‌ഐടി സംഘത്തോടൊപ്പം തിരച്ചിലിനുണ്ട്. സാക്ഷിയുടെ സുരക്ഷ ഉറപ്പുവരുത്താനും തെളിവ്‌ നശിപ്പിക്കാതിരിക്കാനും സുരക്ഷ കർശനമാക്കി. മാധ്യമങ്ങൾക്കും നാട്ടുകാർക്കും പ്രവേശനം വിലക്കി.