ധർമസ്ഥല സ്‌നാനഘട്ടിൽ കുഴിക്കൽ തുടരും

ധർമസ്ഥല

പത്തുവർഷം മുമ്പ്‌ സ്‌ത്രീകളുടെ മൃതദേഹം കുഴിച്ചിട്ടതായി സാക്ഷി കാട്ടിക്കൊടുത്ത നേത്രാവതിക്കരയിലെ സ്‌നാനഘട്ടിൽ കുഴിക്കൽ തുടങ്ങി. ചൊവ്വ ഉച്ചവരെ 10 തൊഴിലാളികൾ നടത്തിയ കുഴിക്കൽ കനത്ത മഴയായതിനാൽ നിർത്തി. പിന്നീട്‌ ചെറിയ മണ്ണുമാന്തി യന്ത്രമുപയോഗിച്ച്‌ കുഴിച്ചു. ആദ്യ ഇടത്ത്‌ നാലടി വരെ കുഴിച്ചെങ്കിലും ഒന്നും കിട്ടിയില്ല. മൊത്തം 15 ഇടത്താണ്‌ പ്രത്യേക അന്വേഷക സംഘം അടയാളപ്പെടുത്തിയത്‌. ബുധനാഴ്‌ചയും കുഴിക്കൽ തുടരും.

പുത്തൂർ അസിസ്റ്റന്റ് കമീഷണർ സ്റ്റെല്ല വർഗീസിന്റെ നിർദേശപ്രകാരമാണ്‌ 10 തൊഴിലാളികളെ ആയുധങ്ങളുമായി കുഴിക്കാൻ എത്തിച്ചത്‌. ഉഡുപ്പി ഫോറൻസിക് സംഘവും സാക്ഷിയും കനത്ത പൊലീസ്‌ സുരക്ഷയിലാണ്‌ സ്‌നാനഘട്ടിൽ എത്തിയത്‌. വെള്ളം കയറിയപ്പോഴും സ്‌നാനഘട്ടിന്റെ പാർക്കിങ്‌ ഏരിയക്കായി നിർമാണം നടത്തിയപ്പോഴും തെളിവുകൾ നശിച്ചിരിക്കാമെന്നാണ്‌ നാട്ടുകാർ പറയുന്നത്‌.

മൃതദേഹം കുഴിച്ചിട്ടെന്ന സാക്ഷി പറയുന്ന ആദ്യ എട്ട് സ്ഥലങ്ങൾ നേത്രാവതി സ്‌നാനഘട്ടിൽത്തന്നെയാണ്‌. നാലുസ്ഥലം നദിയുടെ തീരത്തുകൂടി പോകുന്ന ദേശീയപാതയ്‌ക്ക്‌ തൊട്ടരികിലും. പതിമൂന്നാം സ്ഥലം നേത്രാവതിക്കും ആജുകുരിക്കും ഇടയിലുള്ള റോഡരികിലാണ്. കന്യാടി വനമേഖലയിലാണ് ബാക്കി രണ്ടിടങ്ങൾ.അതിനിടെ, പത്മലത, സ‍ൗജന്യ, വേദവല്ലി, യമുന എന്നിവരുടെ കൊലപാതകം എസ്‌എടി പ്രത്യേകമായി അന്വേഷിക്കണമെന്ന് ജനാധിപത്യ മഹിളാ അസോസിയേഷൻ മംഗളൂരുവിൽ നടത്തിയ കൺവൻഷൻ ആവശ്യപ്പെട്ടു.

പരാതിക്ക് പിന്നിൽ കേരളമെന്ന് 
കർണാടക പ്രതിപക്ഷ നേതാവ്

ധർമസ്ഥലയിൽ ഇപ്പോഴുയർന്ന വെളിപ്പെടുത്തലിന് പിന്നിൽ കേരള സർക്കാരാണെന്ന വിചിത്രവാദവുമായി കർണാടകത്തിലെ ബിജെപി എംഎൽഎയും പ്രതിപക്ഷ നേതാവുമായ ആർ അശോക. പരാതിക്കാരൻ മുസ്ലിമാണ്. ധർമസ്ഥല ക്ഷേത്രത്തിനെതിരെ വരുന്ന മാധ്യമ വാർത്തകൾക്ക് പിന്നിൽ അദൃശ്യകരങ്ങളുണ്ടെന്നും അദ്ദേഹം മൈസൂരുവിൽ മാധ്യമങ്ങളോട് പറഞ്ഞു.

പ്രത്യേക അന്വേഷണ സംഘത്തെ മുഖ്യമന്ത്രി സിദ്ധരാമയ്യതന്നെ നയിക്കണം. പരാതിക്കാർക്ക് അനുകൂലമായ സംഗതികൾ കിട്ടിയില്ലെങ്കിൽ ‘പുരോഗമനവാദികളുടെ സംഘം’ അന്വേഷണ റിപ്പോർട്ട് തള്ളുമെന്നും അശോക ആരോപിച്ചു. കേരളത്തിലെ ചില മാധ്യമങ്ങൾ മാത്രമാണ് ധർമസ്ഥല വാർത്തകൾ റിപ്പോർട്ട് ചെയ്യുന്നത്. ഇതിലുള്ള നീരസമാണ് ബിജെപി നേതാവ് പ്രകടിപ്പിച്ചത്. അതേസമയം, വെളിപ്പെടുത്തൽ നടത്തിയ വ്യക്തി പട്ടികജാതി വിഭാഗക്കാരനായ ഹിന്ദുവാണെന്ന്‌ ആക്‌ഷൻ കൗൺസിൽ പറഞ്ഞു. 2018ലെ സാക്ഷി സംരക്ഷണ ചട്ടപ്രകാരം വിലാസം വെളിപ്പെടുത്താനാകില്ലെന്നും അവർ പറഞ്ഞു.