ഡൽഹി മോത്തിയാഖാനിൽ എൽപിജി സിലിണ്ടർ പൊട്ടിത്തെറിച്ചു; ഒരാൾ മരിച്ചു: രണ്ട് പേർക്ക് പരിക്ക്

ന്യൂഡൽഹി: ഡൽഹിയിലെ മോത്തിയാഖാനിൽ തീപിടിത്തം. അപകടത്തിൽ ഒരാൾ മരിച്ചു. രണ്ട് അ​ഗ്നി രക്ഷാ ഉ​ദ്യോ​ഗസ്ഥർക്ക് പരിക്കേറ്റു. മോത്തിയാഖാനിലെ വീട്ടിൽ എൽപിജി സിലിണ്ടർ പൊട്ടിത്തെറിച്ചതിനെ തുടർന്നാണ് തീപിടിത്തമുണ്ടായത്.

ഉച്ച കഴിഞ്ഞ് മൂന്നോടെയാണ് അപകടം നടന്നതെന്നാണ് വിവരം. സിലിണ്ടർ പൊട്ടിത്തെറിച്ചതിനെത്തുടർന്ന് വീടിനുള്ളിൽ പെട്ടന്ന് തീ പടരുകയായിരുന്നു. ഉടൻ തന്നെ നാല് അ​ഗ്നി രക്ഷാസേനാ യൂണിറ്റുകൾ സ്ഥലത്തെത്തി തീയണയ്ക്കാൻ ശ്രമം തുടങ്ങി.

അഗ്നിരക്ഷാ സേന തീ നിയന്ത്രണ വിധേയമാക്കിയെങ്കിലും ഒരാൾ മരിച്ചു. വീടിൻ്റെ നാലാം നിലയിൽ നിന്ന് കത്തിക്കരിഞ്ഞ നിലയിലാണ് മൃതദേഹം ലഭിച്ചത്. അഗ്നിരക്ഷാ സേനാം​ഗങ്ങളായ ​സ്റ്റേഷൻ ഓഫീസർ രവീന്ദർ സിംഗ്, എഫ്ഒ വേദ് എന്നിവർക്കാണ് പൊള്ളലേറ്റത്. സംഭവത്തിൽ പൊലീസ് അന്വേഷണം ആരംഭിച്ചു.