അപകടം, പ്രകോപനം; രണ്ട് കിലോമീറ്റർ പിന്തുടർന്ന് ഇടിച്ചുവീഴ്ത്തി, ദമ്പതികൾ യുവാവിനെ കൊന്നു

ബംഗളൂരു: ചെറിയ റോഡ് അപകടത്തെ ചൊല്ലിയുണ്ടായ ദേഷ്യത്തിൽ യുവാവിനെ ദമ്പതികൾ പിന്തുടർന്ന് കൊലപ്പെടുത്തി. ബം​ഗളൂരു സ്വദേശി ദർശനെയാണ് ദമ്പതികളായ മനോജ് കുമാറും ഭാര്യ ആരതി ശർമ്മയും ചേർന്ന് കൊലപ്പെടുത്തിയത്. പ്രതികളെ പൊലീസ് അറസ്റ്റ് ചെയ്തു.

ശനിയാഴ്ച രാത്രി ബംഗളൂരു പുട്ടേനഹള്ളിയിലാണ് സംഭവം. ദർശൻ തന്റെ സുഹൃത്ത് വരുണിനൊപ്പം ബൈക്കിലും അതേ റോഡിലൂടെ പ്രതികളായ മനോജും ആരതിയും കാറിലും യാത്ര ചെയ്യുകയായിരുന്നു. തുടർന്ന ബൈക്ക് കാറിൽ തട്ടി ചെറിയ അപകടമുണ്ടായി.

അപകടത്തിൽ കാറിന്റെ സൈഡ് മിറർ തകർന്നു. പിന്നാലെ ദമ്പതികൾ യുവാക്കളെ കാറിൽ പിന്തുടർന്നു. രണ്ട് കിലോമീറ്ററോളം പിന്തുടർന്നശേഷം യുവാവിനെ കാറിടിച്ച് കൊലപ്പെടുത്തുകയായിരുന്നു.

പ്രതികളായ മനോജ് കുമാറും ആരതി ശർമയും

ദമ്പതികൾ യുവാക്കളെ പിന്തുടർന്ന് ഇടിച്ചു വീഴ്ത്തുന്ന സിസിടിവി ദൃശ്യങ്ങൾ കണ്ടെത്തി. ​ഇടിയുടെ ആഘാതത്തിൽ യുവാക്കൾക്ക് ​ഗുരുതരമായി പരിക്കേറ്റു. ദർശൻ സംഭവസ്ഥലത്ത് തന്നെ മരിച്ചു. വരുണിന്റെ നില ​ഗുരുതരമായി തുടരുന്നു.

യുവാക്കളെ ഇടിച്ച് വീഴ്ത്തിയതിന് ശേഷം ദമ്പതികൾ സ്ഥലത്തുനിന്ന് രക്ഷപ്പെട്ടു. പിന്നീട് മാസ്ക് ധരിച്ചെത്തി സംഭവ സ്ഥലത്ത് നിന്ന് തങ്ങളുടെ കാറിന്റെ തകർന്നുവീണ അവശിഷ്ടങ്ങൾ ശേഖരിച്ച് മടങ്ങി. ആദ്യം അപകടമരണമെന്നാണ് കേസ് രജിസ്റ്റർ ചെയ്തിരുന്നത്.

എന്നാൽ പിന്നീടാണ് കൊലപാതകമാണെന്ന് പൊലീസ് കണ്ടെത്തുന്നത്. ദമ്പതികൾക്കെതിരെ കൊലപാതക കുറ്റം ഉൾപ്പെടെയുള്ള വകുപ്പുകൾ ചുമത്തിയിട്ടുണ്ട്. സംഭവത്തിൽ പൊലീസ് അന്വേഷണം പുരോ​ഗമിക്കുന്നു.