രാജസ്ഥാനില്‍ ഓടുന്ന ബസിന് തീപിടിച്ച് 21 പേർക്ക് ദാരുണാന്ത്യം

ജയ്‌സാല്‍മീര്‍: രാജസ്ഥാനില്‍ ഓടുന്ന ബസിന് തീപിടിച്ച് 21 പേര്‍ മരിച്ചു. ജെയ്‌സാല്‍മീര്‍ - ജോധ്പൂര്‍ ഹൈവേയിലാണ് സ്വകാര്യ ബസിന് തീ പിടിച്ചത്. ചൊവ്വാഴ്ച ഉച്ചക്ക് ശേഷം മൂന്ന് മണിയോടെയായിരുന്നു സംഭവം.

57 യാത്രക്കാരുമായി ഉച്ചയ്ക്ക് 3 മണിയോടെയാണ് ബസ് ജയ്സാൽമീറിൽ നിന്ന് പുറപ്പെട്ടത്. ജയ്സാൽമീർ - ജോധ്പൂർ ഹൈവേയിൽ വെച്ച് ബസിന്റെ പിൻഭാഗത്ത് നിന്ന് പുക ഉയരാൻ തുടങ്ങി. ഡ്രൈവർ ഉടൻ തന്നെ ബസ് റോഡരികിൽ നിർത്തിയെങ്കിലും നിമിഷങ്ങൾക്കകം തീ വാഹനത്തിലേക്ക് പടർന്നുപിടിച്ചു.

സ്ഥലത്തുണ്ടായിരുന്ന നാട്ടുകാരും അതുവഴി പോയവരും രക്ഷാപ്രവർത്തനത്തിനായി ഓടിയെത്തി ആദ്യഘട്ട രാക്ഷാപ്രവർത്തനം നടത്തി. പിന്നീട് വിവരമറിഞ്ഞ് പൊലീസും അഗ്നിശമന സേനാംഗങ്ങളും സ്ഥലത്തെത്തി രക്ഷാപ്രവര്‍ത്തനം ഏറ്റെടുത്തു. ഷോര്‍ട്ട് സര്‍ക്യൂട്ട് ആണ് അപകട കാരണമെന്നാണ് പ്രാഥമിക നിഗമനം. അഞ്ച് ദിവസം മുന്‍പ് മാത്രമാണ് ഈ ബസ് വാങ്ങിയതെന്നാണ് റിപ്പോര്‍ട്ട്.

മുഖ്യമന്ത്രി ഭജന്‍ ലാല്‍ ശര്‍മ രാത്രി വൈകി സ്ഥലത്തെത്തി. അപകടത്തിൽ നശിച്ച ബസ് അദ്ദേഹം പരിശോധിച്ചതായി മുഖ്യമന്ത്രിയുടെ ഓഫീസിലെ ഉദ്യോഗസ്ഥർ അറിയിച്ചു.

നാല് സ്ത്രീകളും രണ്ട് കുട്ടികളും ഉൾപ്പെടെ 15 യാത്രക്കാർക്ക് ഗുരുതരമായി പൊള്ളലേറ്റു, ചിലർക്ക് 70% വരെ പൊള്ളലുകളുണ്ട്. ഇവരെ ഉടൻ തന്നെ മൂന്ന് ആംബുലൻസുകളിലായി ജയ്സാൽമീറിലെ ജവാഹർ ആശുപത്രിയിൽ എത്തിക്കുകയും, പിന്നീട് വിദഗ്ദ്ധ ചികിത്സയ്ക്കായി ജോധ്പൂരിലേക്ക് റഫർ ചെയ്യുകയും ചെയ്തു.

അപകടവിവരം ലഭിച്ച ഉടൻ തന്നെ ജയ്സാൽമീർ ജില്ലാ ഭരണകൂടം ദുരിതാശ്വാസ - രക്ഷാപ്രവർത്തനങ്ങൾ ആരംഭിച്ചു. പരിക്കേറ്റവർക്ക് അടിയന്തര ചികിത്സ ഉറപ്പാക്കാൻ ജില്ലാ കളക്ടർ പ്രതാപ് സിംഗ് ഉദ്യോഗസ്ഥർക്ക് നിർദ്ദേശം നൽകി. ഹെൽപ്പ് ലൈൻ നമ്പറുകളും പുറത്തിറക്കി.

ആളുകളെ അടിയന്തരമായി മാറ്റുന്നതിനായി, പോലീസ് അകമ്പടിയോടെ എട്ട് ആംബുലൻസുകളുമായി ദേശീയപാത 125-ൽ ഒരു ഗ്രീൻ കോറിഡോർ സൃഷ്ടിച്ചു. ബസ് പൂർണ്ണമായും കത്തിനശിച്ചതായും പല മൃതദേഹങ്ങളും തിരിച്ചറിയാൻ കഴിയാത്ത നിലയിലായതായും ജില്ലാ കളക്ടർ സ്ഥിരീകരിച്ചു.

മരിച്ചവരെ തിരിച്ചറിയാൻ സഹായിക്കുന്നതിനായി ജോധ്പൂരിൽ നിന്നുള്ള ഡിഎൻഎ, ഫോറൻസിക് ടീമുകൾ സ്ഥലത്തെത്തി. "അഹമ്മദാബാദ് വിമാനദുരന്തത്തിൽ സ്വീകരിച്ച അതേ പ്രോട്ടോക്കോൾ അനുസരിച്ച്, ഡിഎൻഎ പരിശോധനയിലൂടെ മാത്രമേ മരിച്ചവരുടെ വ്യക്തിത്വം സ്ഥിരീകരിക്കുകയുള്ളൂ. അതിനുശേഷം മാത്രമേ മൃതദേഹങ്ങൾ ബന്ധുക്കൾക്ക് കൈമാറുകയുള്ളൂ," കളക്ടർ പറഞ്ഞു.