ഒഡിഷയിൽ ബിജെപി നേതാവിനെ വെടിവെച്ച് കൊന്നു; ബൈക്കിലെത്തിയ അക്രമികൾ രക്ഷപ്പെട്ടു

ഭുവനേശ്വർ: ഒഡിഷയിലെ ബിജെപി നേതാവ് വെടിയേറ്റ് മരിച്ചു. മുതിർന്ന അഭിഭാഷകൻ പ്രിതാബാഷ് പാണ്ഡയാണ് മരിച്ചത്. ബൈക്കിലെത്തിയ രണ്ടുപേർ കൊലപ്പെടുത്തിയ ശേഷം കടന്നു കളഞ്ഞു. വീട്ടിലേക്ക് മടങ്ങു വഴിയാണ് പ്രിതാബാഷിനെ അക്രമികൾ കൊലപ്പെടുത്തിയത്. വെടിയേറ്റ പ്രതാബാഷിനെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

സംഭവത്തിന്റെ കാരണം വ്യക്തമല്ലെന്ന് പൊലീസ് പറഞ്ഞു. വ്യക്തിവൈരാ​ഗ്യമോ രാഷ്ട്രീയ ലക്ഷ്യങ്ങളോ ആകാം കൊലപാതകത്തിലേക്ക് നയിച്ചതെന്നും അന്വേഷണം പുരോ​ഗമിക്കുകയാണെന്നും പൊലീസ് വ്യക്തമാക്കി. ആക്രമികൾക്കായുള്ള തിരച്ചിൽ നടക്കുകയാണ്. സിസിടിവി ദൃശ്യങ്ങളും ഏതാനും തെളിവുകളും ലഭിച്ചിട്ടുണ്ട്. അന്വേഷണത്തിനായി പ്രത്യേക സംഘത്തെ നിയോഗിച്ചിട്ടുണ്ടെന്നും അധികൃതർ വ്യക്തമാക്കി.