ബിഹാർ തെരഞ്ഞെടുപ്പിലേക്ക്; വോട്ടെടുപ്പ് നവംബർ 6, 11 തീയതികളിൽ; ഫലം 14ന്

ന്യൂഡൽഹി: ബിഹാറിൽ നിയമസഭാതെരഞ്ഞെടുപ്പ്‌ തീയതികൾ പ്രഖ്യാപിച്ചു. രണ്ട് ഘട്ടങ്ങളിലായി നവംബർ 6 , 11 തീയതികളിലാണ് പോളിങ്. 14 നാണ് വോട്ടെണ്ണൽ. ഇതുവരെ നടത്തിയതിൽവെച്ച് കൂടുതൽ ചിട്ടയോടെയുള്ള തെരഞ്ഞെടുപ്പാകും ഇത്തവണത്തേതെന്ന് മുഖ്യ തെരഞ്ഞെടുപ്പ്‌ കമീഷണർ ഗ്യാനേഷ്‌കുമാർ പറഞ്ഞു.

സെപ്‌തംബർ 30നാണ് സംസ്ഥാനത്തെ അന്തിമവോട്ടർ പട്ടിക പുറത്തിറക്കിയത്. മുഖ്യ തെരഞ്ഞെടുപ്പ്‌ കമീഷണർ ഗ്യാനേഷ്‌കുമാറിന്റെ നേതൃത്വത്തിലുള്ള സംഘം ബിഹാർ സന്ദർശിച്ചിരുന്നു. തെരഞ്ഞെടുപ്പ്‌ മുന്നൊരുക്കങ്ങൾ വിലയിരുത്തിയ ശേഷം സംഘം സംസ്ഥാന തെരഞ്ഞെടുപ്പ്‌ ഉദ്യോഗസ്ഥരുമായി ചർച്ചകൾ നടത്തി. സുരക്ഷ ഉറപ്പാക്കാൻ കേന്ദ്രസേനകളുടെ വിന്യാസം ഉൾപ്പടെയുള്ള കാര്യങ്ങളിൽ അന്തിമതീരുമാനമെടുത്ത ശേഷമാണ് തെരഞ്ഞെടുപ്പ്‌ തീയതി ഒ‍ൗദ്യോഗികമായി പ്രഖ്യാപിച്ചത്. 40 സംവരണ സീറ്റുകളാണുള്ളത്. 3.92 കോടി പുരുഷവോട്ടർമാരും, 3.50 സ്ത്രീ വോട്ടർമാരുമുൾപ്പടെ 7.43 കോടി വോട്ടർമാരാണ് സംസ്ഥാനത്തുള്ളത്.

തൊഴിൽ ഇല്ലായ്മ രൂക്ഷമായതിനാൽ നിരവധിയാളുകൾ സംസ്ഥാനത്തിന് പുറത്താണ്. ആക്രമണങ്ങൾക്കും വ്യാജ വാർത്തകൾക്കുമെതിരെ കർശന നടപടി സ്വീകരിക്കുമെന്നും ഗ്യാനേഷ്‌കുമാർ പറഞ്ഞു.

2020ൽ ബിഹാറിൽ മൂന്ന്‌ ഘട്ടങ്ങളായാണ്‌ തെരഞ്ഞെടുപ്പ്‌ നടത്തിയത്‌. നവംബർ 22നാണ്‌ ബിഹാറിലെ നിലവിലെ നിയമസഭയുടെ കാലാവധി പൂർത്തിയാകുന്നത്‌. ഇക്കുറി അന്തിമവോട്ടർപട്ടിക പുറത്തിറക്കി 53 ദിവസങ്ങൾക്കുള്ളിൽ തെരഞ്ഞെടുപ്പ്‌ നടപടിക്രമങ്ങൾ പൂർത്തിയാക്കുമെന്ന് കമീഷൻ പറഞ്ഞിരുന്നു. അതുകൊണ്ട്‌, രണ്ടിൽ കൂടുതൽ ഘട്ടങ്ങൾ ഉണ്ടാകാനുള്ള സാധ്യത വളരെ കുറവാണെന്ന്‌ രാഷ്ട്രീയനിരീക്ഷകർ പറയുന്നു. ഛഠ്‌ പൂജ ഉൾപ്പടെയുള്ള മതപരമായ ആഘോഷങ്ങൾ നടക്കുന്ന സമയത്ത്‌ തന്നെ തെരഞ്ഞെടുപ്പ്‌ നടത്തുന്നത്‌ ഗുണകരമാകുമെന്നാണ്‌ ബിജെപിയുടെ കണക്കുകൂട്ടൽ. ഇ‍ൗ സമയത്ത്‌ ആർഎസ്‌എസിന്റെയും മറ്റും നേതൃത്വത്തിൽ മതാടിസ്ഥാനത്തിൽ വലിയ രീതിയിൽ ആളുകളെ സംഘടിപ്പിക്കാനും മുന്നൊരുക്കങ്ങൾ നടത്താനും കഴിയും.

ചുരുങ്ങിയ സമയത്തിനുള്ളിൽ വലിയ പ്രചരണപരിപാടികൾ സംഘടിപ്പിച്ച്‌ വലിയ ഓളങ്ങളുണ്ടാക്കി ശക്തമായ ഭരണവിരുദ്ധ വികാരം മറികടക്കാമെന്നും ബിജെപി വിലയിരുത്തുന്നു. അതേസമയം, രണ്ട്‌ ഘട്ടങ്ങളിൽ തെരഞ്ഞെടുപ്പ്‌ നടത്തുന്നത്‌ സുരക്ഷാപരമായ വെല്ലുവിളികളുണ്ടാക്കും. നിയമസഭ തെരഞ്ഞെടുപ്പിനായി 470 നിരീക്ഷകരെ നിയമിച്ചതായി തെരഞ്ഞെടുപ്പ്‌ കമീഷൻ മുൻപ് അറിയിച്ചു.