ബം​ഗളൂരു ഐടി മേഖല പ്രതിസന്ധിയിലെന്ന് റിപ്പോര്‍ട്ട് ; 2024ൽ ജോലി നഷ്ടമായത് 50000 പേര്‍ക്ക്

ബം​ഗളൂരു : നിര്‍മിതബുദ്ധി സാങ്കേതികവിദ്യ ബം​ഗളൂരു ഐടി മേഖലയിൽ കടുത്ത തൊഴിൽ പ്രതിസന്ധി സൃഷ്ടിക്കുന്നതായും വരും ആഴ്‌ചകളിൽ കൂട്ടപ്പിരിച്ചുവിടൽ നടക്കുമെന്നും റിപ്പോര്‍ട്ട്. കഴിഞ്ഞവര്‍ഷം ബം​ഗളൂരുവിൽ അരലക്ഷത്തിലേറെ പേര്‍ക്ക് ജോലി നഷ്ടമായതായി ഫിനാന്‍ഷ്യൽ എക്‌സ്‌പ്രസ് റിപ്പോര്‍ട്ടുചെയ്‌തു. ചെലവുചുരുക്കലിന്റെ ഭാ​ഗമായും താഴ്‍ന്ന തലത്തിലുള്ള സാങ്കേതിക ജോലികൾക്ക് എഐ വ്യാപകമാകുന്നതിന്റെ ഭാ​ഗമായും കൂട്ടപ്പിരിച്ചുവിടൽ നടക്കും. കോഡിങ് അടക്കമുള്ള ജോലികള്‍ക്ക് എഐ ടൂളുകള്‍ ഫലപ്രദമായി ഇപ്പോള്‍ തന്നെ ഐടി മേഖലയിൽ ഉപയോ​ഗിക്കുന്നുണ്ട്. കുറഞ്ഞ വേതനമുള്ളവർക്കാണ്‌ ആദ്യം ജോലി നഷ്ടമാകുക.

ബം​ഗളൂരു ഏറ്റവും മോശം സാഹചര്യത്തെയാണ് അഭിമുഖീകരിക്കുന്നത്. ടെക്കികളെ മാത്രമല്ല, ഭവനമേഖല, റിയൽ എസ്റ്റേറ്റ്, മറ്റു ബിസിനസുകള്‍‌ എന്നിവയ്‌ക്കും വന്‍ തിരിച്ചടിയാണ്. വാടക താരതമ്യേന കുറവുള്ള പിജി പോലുള്ള സംവിധാനങ്ങൾ വൻതോതിൽ ഒഴിഞ്ഞുകിടക്കും. വീടുകളുടെ വിലയിടിയുന്നു. ഈ മേഖലകളിൽ നിക്ഷേപം നടത്തിയവര്‍ പ്രതിസന്ധി നേരിടുകയാണെന്നുമാണ് റിപ്പോര്‍ട്ട്.