ചോക്കുവരപോലെ അനന്യയും മാഞ്ഞു

ധർമസ്ഥല

ധർമസ്ഥലയിലെ പുതിയ വെളിപ്പെടുത്തലുകളുടെ പശ്ചാത്തലത്തിൽ, മകൾ അനന്യയെ നഷ്‌ടമായ സുജാത ഭട്ടിന്റെ വിലാപം ആരുടെയും ഉള്ളുലയ്‌ക്കും. കഴിഞ്ഞ 13ന് ധർമസ്ഥല പൊലീസിൽ അവർ നൽകിയ പരാതിയിൽ ഞെട്ടിക്കുന്ന വിവരങ്ങളാണുള്ളത്‌.

കൊൽക്കത്ത സിബിഐയിൽ സ്റ്റെനോഗ്രാഫറും ബംഗളൂരു പത്മനാഭ നഗർ സ്വദേശിയുമായ സുജാതയുടെയും അനിൽ ഭട്ടിന്റെയും മകളാണ് അനന്യ. മണിപ്പാൽ മെഡിക്കൽ കോളേജിൽ ആദ്യവർഷ എംബിബിഎസ് വിദ്യാർഥിനിയായിരിക്കെ അനന്യ 2003ൽ കൂട്ടുകാർക്കൊപ്പം ധർമസ്ഥലയിൽപോയി. പിന്നീട്‌ അനന്യയുടെ കൂട്ടുകാരി രശ്‌മി, കൊൽക്കത്തയിലെ സുജാതയുടെ ഓഫീസ് നമ്പറിൽ, അനന്യയെ കാണാതായെന്ന് വിളിച്ചു പറഞ്ഞു. ഹോസ്റ്റലിലേക്ക് വിളിച്ചപ്പോൾ അവിടെ ചെന്നിട്ട്‌ രണ്ടുനാളായെന്ന മറുപടിയാണ്‌ കിട്ടിയത്‌. ധർമസ്ഥലയിലെത്തിയ സുജാത അവിടെ കടകളിലും മറ്റും മകളുടെ ചിത്രം കാണിച്ച് അന്വേഷിച്ചു. ക്ഷേത്രം അധികാരികളോടും സങ്കടം പറഞ്ഞു. മുതിർന്ന ഒരു സ്‌ത്രീക്കൊപ്പം അനന്യയെ പോലെയുള്ള കുട്ടിയെ കണ്ടതായി ചിലർ പറഞ്ഞു. ഉടൻ ബൾത്തങ്ങാടി പൊലീസിൽ പരാതി നൽകി. മകൾ ആരുടെയെങ്കിലുംകൂടെ ഒളിച്ചോടിയതാകാം, അന്വേഷിക്കാനാകില്ല എന്നാണ് പൊലീസ് പറഞ്ഞത്.

തിരിച്ച് ധർമസ്ഥലയിൽപോയി ക്ഷേത്രമുറ്റത്ത് ഇരുന്ന് കരഞ്ഞു. ഇതോടെ ക്ഷേത്രത്തിലെ ചിലരെത്തി, മുറിയിൽ കൊണ്ടു പോയി മർദിച്ചു. തലയിൽ മുറിവേറ്റ്‌ ബോധരഹിതനായി. ഉണർന്നപ്പോൾ ബംഗളൂരു അഗഡി ആശുപത്രിയിലാണ്. ആരാണ് അവിടെ എത്തിച്ചതെന്നറിയില്ല. തലയിൽ എട്ട് തുന്നൽ. ബാഗും തിരിച്ചറിയൽ കാർഡുമെല്ലാം നഷ്‌ടമായി. പരിക്ക് ഭേദമാകാൻ മൂന്നു മാസം ആശുപത്രിയിൽ കിടന്നു–സുജാത പൊലീസിൽ നൽകിയ പരാതിയിൽ പറയുന്നു. സംഭവത്തിൽ എഫ്ഐആർ ഇട്ടിട്ടുണ്ട്. മകളുടെ ചെറിയ എല്ലിൻ കഷണമെങ്കിലും ശേഷക്രിയക്കായി കിട്ടണം. നേത്രാവതി പുഴക്കരയിൽ കുഴിച്ചിട്ട മൃതദേഹങ്ങളിൽ മകളുമുണ്ടാകും. അവൾ അങ്ങനെ മാഞ്ഞുപോയതല്ല എന്നെങ്കിലും എനിക്ക് ആശ്വസിക്കണം സുജാത വിതുമ്പി.