അമ്മയുടെ മൃതദേഹവുമായി നാട്ടിലേക്ക് പോകവേ അപകടം; മകനും രണ്ട് ബന്ധുക്കളും മരിച്ചു

ജയ്‌പൂർ: അമ്മയുടെ മൃതദേഹവുമായി ജയ്‌പൂരിൽനിന്ന് ഹരിയാനയിലേക്ക് പോകുന്നതിനിടെ യുവാവിനും രണ്ട് ബന്ധുക്കൾക്കും ദാരുണാന്ത്യം. മൃതദേഹം കൊണ്ടുപോയ ആംബുലൻസിനെ അനുഗമിച്ചവരാണ് അപകടത്തിൽ പെട്ടത്. റോഹ്തക്കിലെ 152ഡി ഫ്‌ളൈഓവറിൽ വെച്ച് ഇവരുടെ കാർ പാർക്ക് ചെയ്തിരുന്ന ട്രക്കിലിടിക്കുകയായിരുന്നു.

വെള്ളിയാഴ്ചയാണ് സംഭവം. എടിഎസ് ഓഫീസർ ജോഗീന്ദർ കൗറാണ് വ്യാ‍ഴാ‍ഴ്ച ജയ്പൂരിൽ വെച്ച് വൃക്ക സംബന്ധമായ ആരോഗ്യ പ്രശ്ങ്ങളെ തുടർന്ന് മരിച്ചത്. ഇവരുടെ മൃതദേഹവുമായി പോകവെയാണ് കൗറിന്റെ മകൻ കിരാത്ത് (24), അവരുടെ സഹോദരി കൃഷ്ണ (61), സോണിപത്തിൽ നിന്നുള്ള ബന്ധു സച്ചിൻ എന്നിർ അപകടത്തിൽ മരിച്ചത്. കൂടെയുണ്ടായിരുന്ന മറ്റൊരു സ്ത്രീ ഗുരുതരാവസ്ഥയിൽ ചികിത്സയിലാണ്.

പരിക്കേറ്റ സ്ത്രീ ജയ്പൂർ അഴിമതി വിരുദ്ധ ബ്യൂറോയിൽ (എസിബി) ജോലി ചെയ്യുന്ന കോൺസ്റ്റബിൾ ദൽബീറിന്റെ ഭാര്യയാണെന്ന് പോലീസ് സ്ഥിരീകരിച്ചു. ഇവരുടെ മകനാണ് മരിച്ച സച്ചിൻ. അടുത്തിടെയാണ് സച്ചിൻ പാലിയിൽ വെറ്ററിനറി ഡോക്ടറായി ജോലിയിൽ പ്രവേശിച്ചത്.

മൂന്ന് മൃതദേഹങ്ങളും പോസ്റ്റ്‌മോർട്ടത്തിനായി സിവിൽ ആശുപത്രി മോർച്ചറിയിലേക്ക് മാറ്റി. അപകടത്തിൽപ്പെട്ട കാറും ട്രക്കും പൊലീസ് കസ്റ്റഡിയിലെടുത്തു.