print edition വനഭൂമിയിലെ പട്ടയം: സംയുക്ത പരിശോധന ഇന്നുമുതൽ

​തിരുവനന്തപുരം : മൂന്ന് പതിറ്റാണ്ടിനുശേഷം വനഭൂമിയിൽ പട്ടയം നൽകാനുള്ള സംയുക്ത പരിശോധന സംസ്ഥാന വ്യാപകമായി ഞായറാഴ്‌ച ആരംഭിക്കുന്നു. 1977 മുമ്പ് വനഭൂമിയിൽ കുടിയേറിയവർക്കാണ് പട്ടയം നൽകുന്നത്. ഇതിന് കേന്ദ്രസർക്കാരിന്റെ അനുമതി ആവശ്യമാണ്. ഇത്തരത്തിൽ അനുമതി ലഭ്യമാകണമെങ്കിൽ സംയുക്ത പരിശോധന നടത്തി അർഹത തീരുമാനിക്കണം. മന്ത്രിമാരായ എ കെ ശശീന്ദ്രനും കെ രാജനും കേന്ദ്ര വനം പരിസ്ഥിതി മന്ത്രി ഭൂപേന്ദ്ര യാദവുമായി കൂടിക്കാഴ്ച നടത്തിയിരുന്നു. തുടർന്ന് നടന്ന ഉദ്യോഗസ്ഥതല ചർച്ചയുടെ അടിസ്ഥാനത്തിലാണ് തീരുമാനമായത്‌.

പട്ടയത്തിന് അർഹരായവരും എന്നാൽ ഇതുവരെ പല കാരണങ്ങളാൽ അപേക്ഷിക്കാൻ കഴിയാത്തവരുമായ കുടിയേറ്റ കർഷകരുടെ വിവരശേഖരണം സംസ്ഥാന സർക്കാർ നടത്തിയിരുന്നു. ഇതിൽ 60,000 അധികം അപേക്ഷ ലഭ്യമായി. ഇനി സംയുക്ത പരിശോധനയിലൂടെ അർഹതയുടെ അടിസ്ഥാനത്തിൽ കേന്ദ്രസർക്കാരിന് അപേക്ഷ സമർപ്പിക്കും. കേന്ദ്രഅനുമതി ലഭിച്ചാൽ ഉടൻ പട്ടയ വിതരണം ആരംഭിക്കും. ഞായർ രാവിലെ 10ന്‌ പീച്ചിയിൽ മന്ത്രി എ കെ ശശീന്ദ്രൻ ഉദ്ഘാടനം ചെയ്യും. റവന്യു മന്ത്രി കെ രാജൻ പങ്കെടുക്കും.