ഡിവോഴ്‌സ് ആയതിനാൽ വീട്ടിൽ വിവാഹത്തിന് സമ്മതിക്കില്ല, കുഞ്ഞുണ്ടെങ്കിൽ സമ്മതിക്കുമെന്ന് വിശ്വസിപ്പിച്ചു: രാഹുലിന് കുരുക്ക് മുറുക്കി യുവതിയുടെ മൊഴി

തിരുവനന്തപുരം: ലൈംഗിക പീഡനാരോപണ കേസിൽ പ്രതിയായ പാലക്കാട് എംഎൽഎ രാഹുൽ മാങ്കൂട്ടത്തിലിന് കുരുക്ക് മുറുക്കി അതിജീവിതയുടെ മൊഴി. വിവാഹ വാഗ്ദാനം നൽകിയാണ് രാഹുൽ തന്നെ ചൂഷണം ചെയ്തതെന്നാണ് യുവതി പൊലീസിന് നൽകിയ മൊഴി. ഇതോടെ രാഹുലിനെ ന്യായീകരിക്കാൻ കോൺഗ്രസ് നേതാക്കളും അണികളും ഉയർത്തിയ വാദങ്ങളെല്ലാം ഒന്നൊന്നായി തകർന്നിരിക്കുകയാണ്.

യുവതി ഡിവോഴ്‌സ് ആയതിനാൽ വീട്ടിൽ വിവാഹത്തിന് സമ്മതിക്കില്ലെന്ന് രാഹുൽ പറഞ്ഞിരുന്നു. കുഞ്ഞുണ്ടെങ്കിൽ വിവാഹത്തിന് സമ്മതിക്കുമെന്ന് വിശ്വസിപ്പിക്കുകയും ചെയ്തതായി യുവതിയുടെ മൊഴിയിൽ പറയുന്നു. ഈ വാദങ്ങളിൽ വിശ്വസിച്ചാണ് താൻ ഗർഭം ധരിക്കാൻ തയ്യാറായത്. എന്നാൽ, എന്തിനാണ് പിന്നീട് ഗർഭം അലസിപ്പിക്കാൻ രാഹുൽ നിർബന്ധിച്ചത് എന്ന ചോദ്യമാണ് ഇപ്പോൾ ഉയരുന്നത്. ഇത് യുവതിയെ കെണിയിൽ കുടുക്കാനുള്ള രാഹുലിന്റെ നേതാവിന്റെ നീക്കമായിരുന്നു എന്ന് കൂടുതൽ വ്യക്തമാവുകയാണ്.

ആദ്യ വിവാഹ ബന്ധം നിലനിൽക്കെയാണ് രാഹുലുമായി യുവതി ബന്ധം സ്ഥാപിച്ചത് എന്നായിരുന്നു രാഹുൽ അനുകൂലികളുടെ പ്രധാന ആരോപണം. എന്നാൽ ഈ വാദങ്ങള്‍ അതിജീവിതയുടെ മൊഴിയിലൂടെ തകര്‍ന്നു. ഒരുമിച്ച് ജീവിച്ചത് 4 ദിവസം മാത്രം ആണ്. ഒരു മാസത്തിനുള്ളിൽ ബന്ധം ഒഴിഞ്ഞു. പിന്നീട് അഞ്ച് മാസങ്ങൾക്ക് ശേഷമാണ് രാഹുലുമായി അടുക്കുന്നത് എന്നും യുവതി മൊഴി നൽകി. ഇതോടെ, വിവാഹിതയാണെന്ന് അറിഞ്ഞിരുന്നില്ല എന്ന് പറഞ്ഞ് രാഹുലിനെ ന്യായീകരിച്ചവർക്കും, പിന്നീട് കല്യാണം കഴിച്ച പെണ്ണിനെ വീണ്ടും കെട്ടാൻ പറ്റില്ലല്ലോ എന്ന് വാദിച്ചവർക്കും യുവതിയുടെ മൊഴി കുരുക്കായി മാറി.

അതേസമയം, രാഹുലിനെതിരെ ഗുരുതരമായ ആരോപണങ്ങൾ ഉയരുമ്പോഴും കോൺഗ്രസ് നേതൃത്വവും പാർട്ടി മുഖപത്രവും അദ്ദേഹത്തിന് പൂർണ്ണ പിന്തുണ നൽകുകയാണ്. ഇന്നത്തെ 'വീക്ഷണം' മുഖപത്രത്തിൽ പോലും രാഹുൽ മാങ്കൂട്ടത്തിൽ രാഷ്ട്രീയ ഗൂഢാലോചനയുടെ ഇരയാണെന്ന് ന്യായീകരിച്ച് എഡിറ്റോറിയൽ എഴുതിയിരുന്നു. നിലവിൽ ഒളിവിൽ കഴിയുന്ന രാഹുൽ മാങ്കൂട്ടത്തിലിന് പാർട്ടിയുടെ സമ്പൂർണ്ണ പിന്തുണയുണ്ടെന്ന് ഇതോടെ വ്യക്തമായിരിക്കുകയാണ്.

എന്നാൽ വീക്ഷണത്തിന്റെ എഡിറ്റോറിയൽ വിവാദമായതോടെ കോൺ​ഗ്രസ് നേതാക്കൾ മലക്കം മറിയുകയാണ്. ഇന്നലെ വരെ രാഹുലിനെ അവിശ്വസിക്കുന്നില്ല എന്ന് പറഞ്ഞ കെ സുധാകരൻ ഇന്ന് നിലപാട് മാറ്റി. രാഹുൽ തെറ്റുകാരനല്ലെന്ന് പറഞ്ഞിട്ടില്ലെന്നും ചെയ്തത് തെറ്റാണെന്ന് തന്നെയാണ് താൻ പറയുന്നതെന്നുമാണ് അദ്ദേഹം ഇന്ന് പറഞ്ഞത്.

വീക്ഷണത്തിന്റെ എഡിറ്റോറിയൽ എന്താണ് അങ്ങനെ എഴുതിയത് എന്ന് എഴുതിയവരോട് പോയി ചോദിക്കൂ എന്നായിരുന്നു വി ഡി സതീശന്റെ വാദം. ഒളിവിൽ പോയ മാങ്കൂട്ടത്തിലിന് പൂർണ പിന്തുണയാണ് കോൺഗ്രസ് നേതാക്കളും പാർട്ടിയുടെ മുഖപത്രമായ വീക്ഷണവും ഇപ്പോഴും നൽകുന്നത് എന്നത് വ്യക്തമാക്കിയിരിക്കുകയാണ്.