ദേശീയപാതയ്‌ക്കുമേൽ ​ ‘മൂന്നാംകണ്ണ്​’

കാസർകോട്‌: അതിവേഗം പ്രവൃത്തി പുരോഗമിക്കുന്ന ദേശീയപാതയുടെ, കേരളത്തിലൂടെ കടന്നുപോകുന്ന 451 കിലോമീറ്റർ ദൂരമാകെ ‘മൂന്നാംകണ്ണി’ന്റെ വലയത്തിലാകും. ദേശീയപാത 66ലെ 20​ റീച്ചുകളിലായി സ്ഥാപിക്കുന്ന ഓട്ടോമാറ്റിക്​ ട്രാഫിക്​ മാനേജ്​മെന്റ്​ സിസ്​റ്റത്തിലൂടെയാണ്​ അപകടങ്ങളും വേഗവും നിയന്ത്രിക്കുന്നതിന്​ സ്​മാർട്ട്​ കാമറ ശൃംഖല പ്രവർത്തിക്കുക. കർണാടകാതിർത്തിയായ തലപ്പാടി മുതൽ തിരുവനന്തപുരം കടമ്പാട്ടുകോണം വരെ 451 കാമറകളാണ്​ 24 മണിക്കൂർ എടിഎംഎസ്​ കൺട്രോൾറൂമിന്റെ ഭാഗമാവുക. 15 വർഷത്തെ പ്രവർത്തന കരാറോടെയാണ്​ എടിഎംഎസ്​ പ്രവർത്തിക്കുക.

രാത്രിയിലുൾപ്പെടെ അപകടമുണ്ടായാൽ തത്സമയം എടിഎംഎസ്​ കൺട്രോൾറൂമിൽ അലാറം മുഴങ്ങും. കൺട്രോൾറൂമിലെ സ്​ക്രീനിൽ ദൃശ്യങ്ങളും തെളിയും. അപകടമുണ്ടായ സ്ഥലത്തേക്ക്​ ​ ഞൊടിയിടയിൽ 1033 ആംബുലൻസ്​ കുതിച്ചെത്തും. മെയിന്റനൻസ്​ കൺട്രോൾറൂമിൽനിന്ന്​ ക്രെയിൻ ഉൾപ്പെടെയുള്ള യന്ത്രങ്ങളുമെത്തും. 24 മണിക്കൂർ പട്രോളിങ്ങും എല്ലാ റീച്ചിലുമുണ്ടാകും. ഗതാഗതം വഴിതിരിച്ചുവിടേണ്ട അടിയന്തര ഘട്ടങ്ങളിൽ ബാരിക്കേേഡുകളല്ല, ദേശീയപാതയിൽ പലയിടത്തായി ഡിജിറ്റൽ മുന്നറിയിപ്പ്​ ബോർഡുകൾ തെളിയും. വാഹനങ്ങൾ വേഗപരിധി കടന്നാലോ, വൺവേ തെറ്റിച്ചാലോ തത്സമയം നമ്പർപ്ലേറ്റ്​ സഹിതം കൺട്രോൾറൂമിലെ കൂറ്റൻ ഡിജിറ്റൽ ബോർഡിൽ കാമറാദൃശ്യമെത്തും. കാറ്റിന്റെ വേഗത, താപനില, മഴയുടെ ശക്തി ഉൾപ്പെടെയുള്ള വിവരങ്ങളും എടിഎംഎസ്​ രേഖപ്പെടുത്തും.

അപകടസാധ്യത തടയുന്നതിൽ നിർണായകമാകുന്നതാണ്​ എടിഎംഎസ്​ കൺട്രോൾ റൂം. അമിതവേഗവും തെറ്റായ ദിശയിൽ വാഹനമോടിക്കുന്നതും മുതൽ സീറ്റ്​ ബെൽട്ട്​ ധരിക്കാതെ വാഹനമോടിക്കുന്നത്​ ഉൾപ്പെടെ എടിഎംഎസ്​ കണ്ടെത്തുന്നതിനാൽ അപകടങ്ങൾക്കുള്ള സാഹചര്യം ലഘൂകരിക്കപ്പെടും. അപകടമുണ്ടായാൽ ആരും തിരിഞ്ഞുനോക്കാതെ, ചോരവാർന്ന്​ കിടക്കുന്ന സാഹചര്യം പൂർണമായും ഇല്ലാതാകും. ടോൾഫ്രീ നമ്പറായ 1033 ആംബുലൻസിലേക്ക്​ തത്സമയം വിവരമെത്തുകയും നിമിഷങ്ങൾക്കകം ആശുപത്രിയിൽ എത്തിക്കാനാകുമെന്ന്​ മഞ്ചേശ്വരത്ത്​ സജ്ജമായ എടിഎംസിലെ എൻജിനിയർമാരായ ജുബിൻനാഥും അഖിൽരാജും പറഞ്ഞു.

തലപ്പാടി– ചെങ്കള ഒന്നാം റീച്ചിലാണ്​ കേരളത്തിൽ ആദ്യമായി എടിഎംഎസ്​ പ്രവർത്തനസജ്ജമായത്​. 99 ശതമാനം പ്രവൃത്തി പൂർത്തിയായ ഇ‍ൗ റീച്ചിന്റെ കരാറുകാർ ഉ‍ൗരാളുങ്കൽ ലേബർ കോൺട്രാക്ട്​ സൊസൈറ്റിയാണ്​. എടിഎംഎസിന്​ അനുബന്ധമായാണ്​ 24 മണിക്കൂർ സേവനമുള്ള മെയിന്റനൻസ്​ കൺട്രോൾ റൂമും പ്രവർത്തിക്കും.