print edition എസ്‌ഐആർ:എതിർപ്പറിയിച്ച്‌ ബിജെപി ഒഴികെയുള്ള പാർടികൾ

തിരുവനന്തപുരം: കേരളത്തിൽ എസ്‌ഐആർ നടപ്പാക്കുന്നതിന്റെ ഭാഗമായുള്ള രാഷ്ട്രീയ പാർടികളുടെ രണ്ടാംഘട്ട യോഗത്തിൽ എതിർപ്പ്‌ അറിയിച്ച്‌ ബിജെപി ഒഴികെയുള്ള പാർടികൾ. തദ്ദേശ തെരഞ്ഞെടുപ്പ്‌ നടപടികൾ ആരംഭിച്ച സാഹചര്യത്തിൽ എസ്‌ഐആർ നടത്തരുതെന്ന്‌ ആവശ്യപ്പെട്ടു. സംസ്ഥാന മുഖ്യ തെരഞ്ഞെടുപ്പ്‌ ഓഫീസർ വിളിച്ചുചേർത്ത യോഗത്തിൽ എട്ട്‌ അംഗീകൃത പാർടികളുടെ പ്രതിനിധികൾ പങ്കെടുത്തു. സിപിഐ എം സംസ്ഥാന സെക്രട്ടറിയറ്റ്‌ അംഗം എം വി ജയരാജൻ, സിപിഐയെ പ്രതിനിധീകരിച്ച്‌ സത്യൻ മൊകേരി, കെപിസിസി പ്രസിഡന്റ്‌ സണ്ണി ജോസഫ്‌ എംഎൽഎ, പി സി വിഷ്ണുനാഥ്‌ എംഎൽഎ, എം ലിജു, ബിജെപിക്കുവേണ്ടി എസ് സുരേഷ് തുടങ്ങിയവരാണ്‌ ചർച്ചയിൽ പങ്കെടുത്തത്‌. എസ്‌ഐആർ നടപടികൾ തുടങ്ങിയെന്നും പ്രവർത്തനങ്ങൾ നടപ്പാക്കാൻ പാർടികളുടെ സഹകരണം ആവശ്യമാണെന്നും മുഖ്യ തെരഞ്ഞെടുപ്പ്‌ കമീഷണർ പറഞ്ഞു.

സുപ്രീം കോടതിയിൽ കേസ്‌ നിലനിൽക്കേ, തിടുക്കപ്പെട്ട്‌ എസ്‌ഐആർ നടപ്പാക്കുന്നതിൽ യോജിപ്പില്ലെന്ന്‌ സത്യൻ മൊകേരി പറഞ്ഞു. തദ്ദേശ തെരഞ്ഞെടുപ്പിന്റെ നടപടികൾ ആരംഭിച്ചിരിക്കുകയാണ്‌. ഇ‍ൗ പശ്ചാത്തലത്തിൽ പരിശോധന നടത്തുന്നത്‌ അംഗീകരിക്കാൻ കഴിയില്ല. അസമിൽ എന്തുകൊണ്ടാണ്‌ പരിശോധന വേണ്ടെന്നുവച്ചതെന്ന്‌ അദ്ദേഹം ചോദിച്ചു. കേരള നിയമസഭ യോജിച്ച പ്രമേയം പാസാക്കിയിട്ടും ഗ‍ൗനിക്കാത്തത്‌ ജനങ്ങളോടുള്ള യുദ്ധപ്രഖ്യാപനമാണെന്ന്‌ സണ്ണി ജോസഫ്‌ പറഞ്ഞു. തദ്ദേശ തെരഞ്ഞെടുപ്പ്‌ കാലയളവിലെങ്കിലും എസ്‌ഐആർ നടപടികൾ നിർത്തിവയ്ക്കണമെന്നും അദ്ദേഹം ആവശ്യപ്പെട്ടു. കേരള കോൺഗ്രസ്‌, കേരള കോൺഗ്രസ്‌ എം, മുസ്ലിം ലീഗ്‌, ആർഎസ്‌പി പ്രതിനിധികളും എസ്‌ഐആർ തീരുമാനം പുനഃപരിശോധിക്കണമെന്ന്‌ ആവശ്യപ്പെട്ടു. വോട്ടർ പട്ടിക അതിവേഗം ശുദ്ധീകരിക്കാൻ എസ്‌ഐആർ നടപ്പാക്കണമെന്ന്‌ ബിജെപി നേതാവ്‌ എസ്‌ സുരേഷ്‌ പറഞ്ഞു.