ആദ്യവിവാഹം നീണ്ടുനിന്നത് നാല് ദിവസം മാത്രം, രാഹുലിനെ പരിചയപ്പെട്ടത് അതിന് ശേഷം; പരാതിക്കാരിയുടെ മൊഴി

തിരുവനന്തപുരം: രാഹുൽ മാങ്കൂട്ടത്തിൽ ലൈം​ഗികപീഡനവും ​നിർബന്ധിത ​ഗർഭഛിദ്രവും നടത്തിയെന്ന യുവതിയുടെ പരാതിയിൽ മൊഴിയുടെ കൂടുതൽ വിവരങ്ങൾ പുറത്ത്. ആദ്യ വിവാഹത്തിൽ പങ്കാളിക്കൊപ്പം നാല് ദിവസം മാത്രമാണ് ഒരുമിച്ച് താമസിച്ചതെന്നും ഒരു മാസത്തിനുള്ളിൽ ബന്ധത്തിൽ നിന്നും ഒഴിഞ്ഞുവെന്നും രാഹുലിനെ അതിന് ശേഷമാണ് പരിചയപ്പെട്ടതെന്നും മൊഴിയിലുണ്ട്. വിവാഹം നടന്നത് 2024 ആഗസ്റ്റ് 22ന് ക്ഷേത്രത്തിൽ വെച്ചായിരുന്നു. ആചാരപ്രകാരം വിവാഹം കഴിച്ചതാണെങ്കിലും ക്ഷേത്രത്തിലോ മറ്റേതെങ്കിലും സംവിധാനത്തിലോ രജിസ്റ്റർ ചെയ്തിട്ടില്ല എന്നും പെൺകുട്ടി പൊലീസിനോട് പറഞ്ഞതായാണ് വിവരം.

യുവതിയുമായി നടത്തുന്ന സംഭാഷണത്തിന്‍റെയും ഭീഷണിയുടെയും ശബ്ദരേഖ തന്‍റേത് തന്നെയാണെന്ന് രാഹുൽ മാങ്കൂട്ടത്തിൽ സമ്മതിച്ചിട്ടുണ്ട്. മുൻകൂർ ജാമ്യാപേക്ഷയിലാണ് ഇക്കാര്യങ്ങൾ പ്രതി സമ്മതിച്ചത്.

എന്നാൽ, അതിജീവിതയെ അധിക്ഷേപിക്കുന്ന സമീപനമാണ് യുഡിഎഫ്‌ കൺവീനർ അടൂർ പ്രകാശ്‌ എംപി ഉൾപ്പടെ ഉള്ളവർ സ്വീകരിക്കുന്നത്. ഇരകളെ എല്ലാകാലത്തും സിപിഐ എമ്മിന്‌ കിട്ടിയിട്ടുണ്ടെന്നായിരുന്നു പ്രകാശിന്റെ ആക്ഷേപം. മുഖ്യമന്ത്രിയുടെ വീട്ടിൽ ഇര പോയത്‌ തിരക്കഥയുടെ ഭാഗമാണ്‌. തെരഞ്ഞെടുപ്പ്‌ കാലത്ത്‌ ഇരയെ മുതലെടുക്കുന്നു. താൻ കോന്നിയിലും ആറ്റിങ്ങലിലും മത്സരിച്ച സമയത്തും ഇതുപോലെ നിരവധി കേസുണ്ടായിട്ടുണ്ടെന്ന്‌ പറഞ്ഞായിരുന്നു അടൂർ പ്രകാശിന്റെ ന്യായീകരണം. കെട്ടിച്ചമച്ച കഥ മാത്രമാണ്‌ ഈ കേസെന്നും രാഹുലിന്റെ രാജി മുതിർന്ന നേതാക്കൾ തീരുമാനിക്കുമെന്നും കഴിഞ്ഞ ദിവസം അടൂർ പ്രകാശ്‌ മാധ്യമങ്ങളാടുപറഞ്ഞു.

കോൺഗ്രസ് നേതാക്കൾക്ക് പിന്നാലെ മാങ്കൂട്ടത്തിലിനെ സംരക്ഷിച്ച് മുഖപത്രവും രംഗത്തെത്തി. ഒളിവിൽ പോയ മാങ്കൂട്ടത്തിലിന് പൂർണ പിന്തുണയാണ് കോൺഗ്രസ് മുഖപത്രം വീക്ഷണം എഡിറ്റോറിയലിലൂടെ വ്യക്തമാക്കിയത്. രാഷ്ട്രീയ ഗൂഢാലോചനയുടെ ഇരയാണ് രാഹുൽ മാങ്കൂട്ടത്തിൽ എന്നാണ് പത്രത്തിന്റെ ന്യായീകരണം.

'പാലക്കാട് ഉപതെരഞ്ഞെടുപ്പിൽ എൽഡിഎഫിനെയും ബിജെപിയെയും ചരിത്ര ഭൂരിപക്ഷത്തിൽ തോൽപ്പിച്ചതായിരുന്നു രാഹുൽ ചെയ്ത കുറ്റം. രാഹുലിൻ്റെ തലമുറയിൽപെട്ട ഒരു പറ്റം ചെറുപ്പക്കാർ കോൺ​ഗ്രസിൽ വളർന്നു വരുന്നത് ഭീതി പടർത്തിയിരിക്കുകയാണ്. അപവാദങ്ങളിൽ പതറാതെയും വ്യക്തിഹത്യകളിൽ തളരാതെയും ജാ​ഗ്രതയോടെ മുന്നോട്ട് പോകണം.' - വീക്ഷണം എഴുതി.

ഇപ്പോഴും മാങ്കൂട്ടത്തിലിനെ വെള്ളപൂശുന്ന കോൺഗ്രസ് നേതൃത്വത്തിന്റെയും മുഖപത്രത്തിന്റെയും നിലപാടുകൾക്കെതിരെ വ്യപക വിമർശനമാണ് ഉയരുന്നത്.