'ഇയാളെ കണ്ടാൽ പൊലീസിൽ പറയണേ, സ്ത്രീകൾക്ക് സമാധാനത്തിൽ ജീവിക്കാനാ'; ലുക്കൗട്ട് നോട്ടീസുമായി എസ്എഫ്ഐ

പാലക്കാട്: ലൈംഗിക പീഡനാരോപണ കേസിൽ പ്രതിയായ പാലക്കാട് എംഎൽഎ രാഹുൽ മാങ്കൂട്ടത്തിലിനെതിരെ വേറിട്ട പ്രതിഷേധവുമായി എസ്എഫ്ഐ. പ്രതീകാത്മക ലുക്കൗട്ട് നോട്ടീസ് വിതരണം ചെയ്താണ് പാലക്കാട്‌ ജില്ലാ കമ്മിറ്റി പ്രതിഷേധ ക്യാമ്പയിൻ സംഘടിപ്പിച്ചത്. നഗരത്തിലെ കടകളും ബസ് സ്റ്റാൻഡും കേന്ദ്രീകരിച്ചായിരുന്നു പ്രതിഷേധം.

എസ്എഫ്ഐ നടത്തിയ ലുക്കൗട്ട് നോട്ടീസ് വിതരണം

ബസ് സ്റ്റാൻഡ് പരിസരത്ത് മാങ്കൂട്ടത്തിലിന്റെ ലുക്കൗട്ട് നോട്ടീസ് പതിപ്പിക്കുന്ന എസ്എഫ്ഐ പ്രവർത്തകർ

'കുഞ്ഞുങ്ങളുടെ ശവപ്പെട്ടിക്കാണ് ഏറ്റവും കനം; അമ്മയെ ചതിച്ച് ഗർഭത്തിലെ കുഞ്ഞിനെ കൊന്നവനാണ് ഏറ്റവും ക്രൂരൻ' എന്ന പോസ്റ്റർ ക്യാമ്പയിനുമായി ഡിവൈഎഫ്ഐ സംസ്ഥാനത്തിന്റെ വിവിധയിടങ്ങളിൽ പ്രകടനവും മാർച്ചും വെള്ളിയാഴ്ച നടത്തി. രാഹുൽ മാങ്കൂട്ടത്തിൽ ലൈം​ഗികചൂഷണത്തിനിരയാക്കുകയും ​ഗർഭഛിദ്രത്തിന് നിർബന്ധിക്കുകയും ചെയ്തുവെന്നുള്ള യുവതിയുടെ പരാതി പുറത്ത് വന്ന സാഹചര്യത്തിൽത്തന്നെ ഡിവൈഎഫ്ഐയുടെ നേതൃത്വത്തിൽ പാലക്കാട് എംഎൽഎ ഓഫീസിലേക്ക് പ്രതിഷേധ മാർച്ച് നടത്തി റീത്ത് സമർപ്പിച്ചിരുന്നു.

അതേസമയം, മാങ്കൂട്ടത്തിലിന് കുരുക്ക് മുറുകും വിധമാണ് അതിജീവിതയുടെ മൊഴി. വിവാഹ വാഗ്ദാനം നൽകിയാണ് രാഹുൽ തന്നെ ചൂഷണം ചെയ്തതെന്നാണ് യുവതി പൊലീസിന് നൽകിയ മൊഴി. ഇതോടെ രാഹുലിനെ ന്യായീകരിക്കാൻ കോൺഗ്രസ് നേതാക്കളും അണികളും ഉയർത്തിയ വാദങ്ങളെല്ലാം ഒന്നൊന്നായി തകർന്നിരിക്കുകയാണ്.

യുവതി ഡിവോഴ്‌സ് ആയതിനാൽ വീട്ടിൽ വിവാഹത്തിന് സമ്മതിക്കില്ലെന്ന് രാഹുൽ പറഞ്ഞിരുന്നു. കുഞ്ഞുണ്ടെങ്കിൽ വിവാഹത്തിന് സമ്മതിക്കുമെന്ന് വിശ്വസിപ്പിക്കുകയും ചെയ്തതായി യുവതിയുടെ മൊഴിയിൽ പറയുന്നു. ഈ വാദങ്ങളിൽ വിശ്വസിച്ചാണ് താൻ ഗർഭം ധരിക്കാൻ തയ്യാറായത്. എന്നാൽ, എന്തിനാണ് പിന്നീട് ഗർഭം അലസിപ്പിക്കാൻ രാഹുൽ നിർബന്ധിച്ചത് എന്ന ചോദ്യമാണ് ഇപ്പോൾ ഉയരുന്നത്. ഇത് യുവതിയെ കെണിയിൽ കുടുക്കാനുള്ള രാഹുലിന്റെ നേതാവിന്റെ നീക്കമായിരുന്നു എന്ന് കൂടുതൽ വ്യക്തമാവുകയാണ്.

വരുംദിവസങ്ങളിൽ പ്രാദേശികാടിസ്ഥാനത്തിൽ പ്രതിഷേധം കടുപ്പിക്കുമെന്നും ഒരുനിമിഷം പോലും എംഎൽഎ സ്ഥാനത്ത് തുടരാൻ മാങ്കൂട്ടത്തിൽ അർഹനല്ലെന്നും എസ്എഫ്ഐ-ഡിവൈഎഫ്ഐ ഭാരവാഹികൾ അറിയിച്ചു.