ശബരിമല മണ്ഡല - മകരവിളക്ക്: ദർശനം നടത്തിയത് 12 ലക്ഷത്തോളം തീർഥാടകർ

ശബരിമല: ശബരിമല മണ്ഡല - മകരവിളക്ക് മഹോത്സവത്തോടനുബന്ധിച്ചുള്ള തീര്‍ഥാടനകാലം ആരംഭിച്ച് രണ്ടാഴ്ച്ച തികയുമ്പോൾ ദർശനം നടത്തിയത് 12 ലക്ഷത്തോളം തീർഥാടകർ. നവംബർ 16 മുതൽ 29 വൈകിട്ട് ഏഴ് വരെ ദര്‍ശനം നടത്തിയത് 11,89088 തീര്‍ഥാടകരാണ്. ശനിയാഴ്ച്ച താരതമ്യേനെ തിരക്ക് കുറവായിരുന്നു. പുലർച്ചെ 12 മുതൽ വൈകിട്ട് ഏഴു വരെ 61,190 പേർ മല കയറി. സു​ഗമദര്‍ശനം ലഭിച്ചതിൻ്റെ സന്തോഷത്തോടെയാണ് തീര്‍ഥാടകര്‍ മലയിറങ്ങുന്നത്. പമ്പയില്‍ നിന്ന് സന്നിധാനത്തേക്ക് പുറപ്പെട്ടാല്‍ അധികനേരം കാത്തുനില്‍ക്കാതെ തന്നെ എല്ലാ തീർഥാടകർക്കും ദര്‍ശനം ഉറപ്പാക്കാന്‍ കഴിയുന്നതായി സേനകൾ അറിയിച്ചു.

തിരക്ക് നിയന്ത്രിക്കുന്നതിനായി, സന്നിധാനത്തെ തിരക്കിന് അനുസൃതമായാണ് പമ്പയില്‍നിന്ന് തീർഥാടകരെ കയറ്റിവിടുന്നത്. ദീർഘനേരം കാത്തിരിക്കാതെ സുഗമവും കൃത്യസമയത്തുമുള്ള ദർശനം ഉറപ്പാക്കാൻ ഈ സംവിധാനം സഹായിക്കുന്നു. ദേവസ്വം ബോർഡ് നടത്തിയ ഫലപ്രദമായ ക്രമീകരണങ്ങളാണ് സുഗമമായ അനുഭവം നൽകുന്നത്. തിരക്ക് നിയന്ത്രണത്തിലെ ക്രമീകരണങ്ങളിൽ തീർഥാടകർ തൃപ്തി അറിയിച്ചു. തുടർച്ചയായ തിരക്ക് കണക്കിലെടുത്ത് ദർശനത്തിനുള്ള സ്പോട്ട് ബുക്കിങ് 5,000 ആയി നിജപ്പെടുത്തി.

അയൽ സംസ്ഥാനങ്ങളിൽ നിന്ന് നിരവധി ഭക്തർ എത്തുന്നതിനാൽ ശബരിമല തീർഥാടകർക്കായി കെഎസ്ആർടിസി അന്തർസംസ്ഥാന സർവീസുകൾ വിപുലീകരിച്ചു. പമ്പ–കോയമ്പത്തൂർ കെഎസ്ആർടിസി ബസ് കോയമ്പത്തൂരിൽ നിന്ന് രാത്രി 9:30 ന് പുറപ്പെട്ട് പിറ്റേന്ന് രാവിലെ 9 മണിക്ക് പമ്പയിൽ നിന്ന് മടങ്ങും. ഇന്ന് മുതൽ പുനലൂർ ഡിപ്പോ പമ്പ–തെങ്കാശി റൂട്ടിൽ സർവീസ് നടത്തും, വൈകുന്നേരം 7 മണിക്ക് തെങ്കാശിയിൽ നിന്ന് പുറപ്പെട്ട് രാവിലെ 9 മണിക്ക് പമ്പയിൽ നിന്ന് മടങ്ങും.

പളനി, തിരുനെൽവേലി, കമ്പം, ചെന്നൈ ഉൾപ്പെടെയുള്ള സ്ഥലങ്ങളിലേക്ക് അധിക സർവീസുകൾ ക്രമീകരിച്ചിട്ടുണ്ട്. തീർഥാടകരുടെ ആവശ്യാനുസരണം കർണാടകയിലേക്ക് ബസുകൾ ഷെഡ്യൂൾ ചെയ്യുമെന്നും ഉദ്യോഗസ്ഥർ സ്ഥിരീകരിച്ചു. ഈ റൂട്ടുകൾ സുഗമമാക്കുന്നതിനായി 67 കെഎസ്ആർടിസി ബസുകൾക്ക് പുതുതായി അന്തർസംസ്ഥാന പെർമിറ്റുകൾ അനുവദിച്ചു.