രാഹുൽ തെരഞ്ഞെടുപ്പ് പ്രചരണത്തിൽ പങ്കെടുത്തത് പ്രാദേശിക താൽപര്യപ്രകാരം; കോൺഗ്രസിന് ഇനി ഒന്നും ചെയ്യാനില്ലെന്ന് ഷാഫി പറമ്പിൽ

കൊച്ചി : ലൈം​ഗിക പീഡനക്കേസിലെ പ്രതിയായ രാഹുൽ മാങ്കൂട്ടത്തിലിനെതിരെ കോൺഗ്രസ് നടപടിയെടുത്തെന്നും വിഷയത്തിൽ ഇനി ഒന്നും ചെയ്യാനില്ലെന്നും ആവർത്തിച്ച് ഷാഫി പറമ്പിൽ എംഎൽഎ. ആരോപണം ഉയർന്നപ്പോൾ തന്നെ കോൺ​ഗ്രസിൽ നിന്ന് സസ്പെൻഡ് ചെയ്തെന്നും രാഹുലുമായി വ്യക്തിപരമായി അടുപ്പമുള്ളവർ ഒന്നും നടപടിയെ എതിർത്തില്ലെന്നും ഷാഫി പറമ്പിൽ. ഇനി കാര്യങ്ങൾ നിയമപരമായി മുന്നോട്ട് പോകട്ടെയെന്നും അതിൽ കെപിസിസി വർക്കിങ് പ്രസിഡന്റ് എന്ന നിലയ്ക്ക് കൂടുതൽ പ്രതികരണങ്ങൾ നടത്തേണ്ട ആവശ്യമുണ്ടെന്ന് താൻ കരുതുന്നില്ലെന്നും ഷാഫി പറഞ്ഞു. കൊച്ചിയിൽ സ്വകാര്യപരിപാടിയിൽ സംസാരിക്കുകയായിരുന്നു ഷാഫി.

​ഗുരുതരമായ ലൈം​ഗിക പീഡനക്കേസിൽ പ്രതിയായ രാഹുൽ മാങ്കൂട്ടത്തിലിനെ സംരക്ഷിക്കുന്ന നിലപാടാണ് മുമ്പും ഷാഫി പറമ്പിൽ സ്വീകരിച്ചത്. അടുത്ത അനുയായിയായ രാഹുലിനെക്കുറിച്ചുള്ള ചോദ്യങ്ങൾക്ക് കൃത്യമായി മറുപടി പറയാതെ മുങ്ങുകയായിരുന്നു ഷാഫി. പാർടി നടപടിയെടുത്തിട്ടുണ്ടെന്നും അതിൽ കൂടുതലൊന്നും പറയാനില്ലെന്നുമാണ് ഷാഫി നിരന്തരമായി ആവർത്തിക്കുന്നത്.

കോൺ​ഗ്രസിലെ മുതിർന്ന നേതാക്കൾക്ക് വിഷയത്തിൽ ഭിന്നാഭിപ്രായമുള്ളത് ചൂണ്ടിക്കാട്ടിയപ്പോൾ അത് വ്യക്തിപരമായ അഭിപ്രായമാണെന്നും രാഹുലിനോട് അടുപ്പമുള്ള താനടക്കമുള്ളവർ ഉണ്ടായിട്ടും കോൺ​ഗ്രസിന്റെ തീരുമാനം ഏകപക്ഷീയമായിരുന്നുമെന്നുമാണ് ഷാഫിയുടെ വാദം. പാലക്കാട് രാഹുൽ മാങ്കൂട്ടത്തിൽ ഇലക്ഷൻ പ്രചരണത്തിന് പോയതിനെക്കുറിച്ചുള്ള ചോദ്യത്തിന് അത് തീർത്തും പ്രാദേശികമായ കാര്യമാണെന്നും പരാതി വരുന്നതിനു മുമ്പുള്ള കാര്യമാണെന്നും പറഞ്ഞ് ഷാഫി പറമ്പിൽ ന്യായീകരിച്ചു. പ്രാദേശികമായി ആളുകൾ ആവശ്യപ്പെട്ടതുകൊണ്ടാണ് രാഹുൽ പോയതെന്നും ആ സമയങ്ങളിൽ ലൈം​ഗിക പീഡനത്തിൽ പരാതി നൽകിയിട്ടില്ലായിരുന്നുവെന്നുമാണ് ഷാഫിയുടെ ന്യായീകരണം.