print edition അമ്പേ പാളി ഗൂഢാലോചന വാദം ; ദുരനുഭവം പങ്കുവച്ചത്‌ നിരവധി സ്‌ത്രീകൾ

തിരുവനന്തപുരം

രാഹുൽ മാങ്കൂട്ടത്തിലിന്റെ ലൈംഗികപീഡനങ്ങളും അതിജീവിതയുടെ പരാതിയും പ്രതിരോധിക്കാനാകാതെ കോൺഗ്രസ്‌. രാഷ്‌ട്രീയ ഗൂഢാലോചനാ സിദ്ധാന്തം മുൻനിർത്തിയുള്ള പ്രതിരോധം അമ്പേ പാളി.

ജൂലൈയിൽ സമൂഹമാധ്യമങ്ങളിലും രാഷ്‌ട്രീയരംഗത്തും വിഷയം ചർച്ചയായിരുന്നു. ഇരയെ കുറിച്ച്‌ അഭ്യൂഹങ്ങളുമുണ്ടായെങ്കിലും ‘ പ്രതി ’ മാങ്കൂട്ടത്തിലാണെന്നത്‌ രഹസ്യമായിരുന്നില്ല. ആഗസ്ത്‌ ആദ്യം ശബ്ദസന്ദേശങ്ങളും ചാറ്റുകളും പുറത്തുവന്നു. 23 ന്‌ വാർത്താസമ്മേളനം റദ്ദ്‌ ചെയ്ത രാഹുൽ യൂത്ത്‌ കോൺഗ്രസ്‌ പ്രസിഡന്റ്‌ സ്ഥാനം രാജിവച്ചു. നേതാക്കളുടെ പ്രതികരണങ്ങളും രാഹുലിന്‌ എതിരായിരുന്നു. കോൺഗ്രസിന്റെ വനിതാനേതാക്കൾ ഉൾപ്പെടെ പല സ്‌ത്രീകളും ദുരനുഭവങ്ങൾ തുറന്നു പറഞ്ഞു. കെപിസിസി പ്രസിഡന്റ്‌ സണ്ണിജോസഫ്‌ മുതിർന്ന നേതാക്കളുമായി ചർച്ച ചെയ്താണ്‌ ആഗസ്ത്‌ 25 ന്‌ കോൺഗ്രസിന്റെ പ്രാഥമിക അംഗത്വത്തിൽ നിന്ന്‌ സസ്‌പെൻഡ്‌ ചെയ്തത്‌. എംഎൽഎ സ്ഥാനം രാജിവയ്ക്കണമെന്ന്‌ നിലപാടെടുത്തവരാണ്‌ രാമേശ്‌ ചെന്നിത്തലയും വി ഡി സതീശനും മറ്റും.

അന്ന്‌ ശബരിമല സ്വർണ മോഷണമോ തെരഞ്ഞെടുപ്പ്‌ പ്രഖ്യാപനമോ ഇല്ല. അയ്യപ്പന്റെ സ്വർണ മോഷണവുമായി ബന്ധപ്പെട്ട്‌ ആരെയും രക്ഷിക്കാനില്ലെന്നും കട്ടവരെ അകത്താക്കുമെന്നുമുള്ള ഉറച്ച നിലപാടാണ്‌ സിപിഐ എം ആദ്യം തന്നെ പ്രഖ്യാപിച്ചത്‌. ചരിത്രത്തിലില്ലാത്ത വിധം ഒമ്പതര വർഷമുണ്ടായ വികസനവും ക്ഷേമ നടപടികളും തന്നെയാണ്‌ എൽഡിഎഫിന്റെ തെരഞ്ഞെടുപ്പ്‌ പ്രചാരണ വിഷയം.

രാഹുലിന്റെ ലൈംഗിക പീഡന കേസ്‌ ചർച്ച തെരഞ്ഞെടുപ്പ്‌ വേളയിലേക്ക്‌ എത്തിച്ചത്‌ കോൺഗ്രസ്‌ തന്നെയാണ്‌. വ്യക്തമായ തെളിവുകൾ സഹിതം പീഡനം പുറത്തുവന്ന വേളയിൽ നടപടിയെടുക്കാൻ തയ്യാറായില്ല. ഷാഫി പറന്പിലിന്റെ നേതൃത്വത്തിലുള്ള സംരക്ഷക സംഘത്തിന്‌ കീഴ്‌പ്പെട്ടതിന്റെ ദുരന്തഫലമാണിതെന്ന്‌ കോൺഗ്രസ്‌ നേതാക്കൾ തന്നെ ഇപ്പോൾ പറയുന്നു.