വടക്കുന്നാഥനെ വലംവച്ച് 
പാടുന്നൊരിടയ്‌ക്കയാകുവാന്‍ 
മോഹം...

തൃശൂർ

‘വടക്കുന്നാഥനെ വലംവച്ച് പാടുന്നൊരിടയ്‌ക്കയാകുവാൻ മോഹം...’ പി ജയചന്ദ്രൻ അവസാനമായി പാടിയ ​ഗാനമാണിത്. വിഷ്ണുദാസ് ചേർത്തല രചനയും സം​ഗീതവും നിർവഹിച്ച ​ഗാനത്തിന്റെ റെക്കോർഡിങ് കഴിഞ്ഞവർഷം നവംബർ ഒമ്പതിനായിരുന്നു. തൃശൂരിലെ ഡിജി ട്രാക്ക് സ്റ്റുഡിയോയിലായിരുന്നു റെക്കോഡിങ്. ചിത്രീകരണം പൂർത്തിയായ ഈ ഭക്തി​ഗാന ആൽബം ഞായറാഴ്ച യുട്യൂബിലൂടെ പുറത്തിറക്കാനിരിക്കേയായിരുന്നു പി ജയചന്ദ്രന്റെ മരണം.

ലളിത​ഗാനങ്ങളും ഭക്തി​ഗാനങ്ങളുമായി ചേർത്തല ശാവേശേരി വിഷ്ണുദാസ് 30 വർഷമായി സം​ഗീത ലോകത്തുണ്ട്. അദ്ദേഹത്തിന്റെ ഏറെ നാളായുള്ള ആ​ഗ്രഹമായിരുന്നു താൻ രചനയും സം​ഗീതവും നിർവഹിച്ച ​ഗാനം പി ജയചന്ദ്രൻ പാടണമെന്നത്. ആ​ഗ്രഹം പി ജയചന്ദ്രനെ അറിയിച്ചപ്പോൾ സന്തോഷത്തോടെ സമ്മതിച്ചു. ശാരീരിക അവശതകൾക്കിടയിലും -ഭാവനാത്മകമായി അദ്ദേഹം പാടിയത് അത്ഭുതപ്പെടുത്തിയെന്ന് വിഷ്ണുദാസ് പറഞ്ഞു.