മിൽമ മേഖലാ യൂണിയന്‌ തിരിച്ചടി; 
സംഘങ്ങൾക്ക് മിൽക്ക്‌ എടിഎം തുടങ്ങാം

കൊച്ചി: ക്ഷീരസംഘങ്ങൾ മിൽക്ക് എടിഎം സ്ഥാപിക്കാൻ പാടില്ലെന്ന മിൽമ എറണാകുളം മേഖലാ യൂണിയന്റെ തീരുമാനം ക്ഷീരവികസനവകുപ്പ്‌ റദ്ദാക്കി. മിൽക്ക് എടിഎം സ്ഥാപിക്കുന്നത് നിർത്തണമെന്നും എടിഎം ആരംഭിച്ചാൽ ആനുകൂല്യവുംമറ്റും നൽകുന്നത് നിർത്തിവയ്ക്കാനുമുള്ള യൂണിയന്റെ തീരുമാനമാണ് ക്ഷീരസഹകരണ സംഘം രജിസ്ട്രാർ റദ്ദാക്കിയത്.

മാർച്ച് 29ന് ചേർന്ന എറണാകുളം മേഖലാ യൂണിയൻ ഭരണസമിതിയാണ് മിൽക്ക് എടിഎം സ്ഥാപിക്കുന്നതിനെതിരെ തീരുമാനമെടുത്തത്‌. പിന്നീട്‌ ചേർന്ന ഭരണസമിതി യോ​ഗത്തിൽ സർക്കാർ പ്രതിനിധി ഈ തീരുമാനത്തെ എതിർത്തു. ക്ഷീരസംഘങ്ങൾ ആനന്ദ് മാതൃകയിൽ ആരംഭിച്ച മിൽക്ക് എടിഎം തദ്ദേശസ്ഥാപനങ്ങളുടെ പദ്ധതിയിൽ ഉൾപ്പെട്ടതാണ്. ക്ഷീരസംഘത്തിന്റെ വിപണി കഴിഞ്ഞുള്ള പാൽമാത്രം യൂണിയന് നൽകിയാൽ മതിയെന്ന് സഹകരണനിയമത്തിൽ പറയുന്നുണ്ടെന്നും സർക്കാർ പ്രതിനിധി യോ​ഗത്തിൽ വ്യക്തമാക്കി. മിൽക്ക് എടിഎം പ്രവർത്തിപ്പിക്കുന്ന ക്ഷീരസംഘങ്ങൾക്ക് ആനുകൂല്യങ്ങൾ നൽകില്ലെന്ന യൂണിയന്റെ നിലപാടിനെയും എതിർത്തു.

യൂണിയൻ തീരുമാനത്തിനെതിരെ ക്ഷീരസംഘങ്ങൾ ക്ഷീര സഹകരണസംഘം രജിസ്ട്രാർക്ക് പരാതി നൽകിയിരുന്നു. ഉപഭോക്താക്കൾക്ക് ​ഗുണനിലവാരമുള്ള പാൽ ലഭ്യമാക്കുന്നതിനാണ് ക്ഷീരസംഘങ്ങൾ മിൽക്ക് എടിഎം സ്ഥാപിക്കുന്നതെന്നും തദ്ദേശസ്ഥാപനങ്ങൾ നടപ്പാക്കുന്ന പദ്ധതികൾക്ക് യൂണിയൻ തടസ്സം നിൽക്കുകയാണെന്നും ആനുകൂല്യങ്ങൾ നൽകില്ലെന്ന തീരുമാനം സംഘങ്ങളെ ദ്രോഹിക്കുന്നതാണെന്നും ക്ഷീര സഹകരണ സംഘം രജിസ്ട്രാർ കണ്ടെത്തി. ഇതിന്റെ അടിസ്ഥാനത്തിലാണ് യൂണിയൻ ഭരണസമിതി തീരുമാനം രജിസ്ട്രാർ റദ്ദാക്കിയത്‌.