ഓണക്കാലത്ത് മില്‍മ വിറ്റത് 
1.19 കോടി ലിറ്റര്‍ പാല്‍

തിരുവനന്തപുരം

ഓണക്കാലത്ത് പാലും പാലുല്‍പ്പന്നങ്ങളിലുമുള്ള വില്‍പ്പനയില്‍ സര്‍വകാല റെക്കോര്‍ഡുമായി മില്‍മ. ആറുദിവസം 1,19,58,751 ലിറ്റര്‍ പാലും 14,58,278 കിലോ തൈരുമാണ് വിറ്റത്. കഴിഞ്ഞതവണ പാൽ 1,16,77,314 ലിറ്ററും തൈര്‌ 13,76,860 കിലോയുമായിരുന്നു. ഇത്തവണ ഉത്രാടത്തിന് മാത്രം 38,03,388 ലിറ്റര്‍ പാലും 3,97,672 ലക്ഷം കിലോ തൈരുംവിറ്റു. കഴിഞ്ഞവര്‍ഷം ഉത്രാടത്തിന് പാലിന്റെ മൊത്തം വില്‍പ്പന 37,00,209 ലിറ്ററും തൈരിന്റെ വില്‍പ്പന 3,91,923 കിലോയുമായിരുന്നു. കൂടാതെ ആഗസ്ത് ഒന്ന് മുതല്‍ ഉത്രാടം വരെ 991.08 ടണ്‍ നെയ്യ് വിറ്റഴിച്ചു. നാല് ദിവസത്തിനിടെ മാത്രം വിറ്റഴിച്ചത് 127.16 ടണ്‍ നെയ്യ്.

ഓണത്തിന് പ്രത്യേകമായി 75 ലക്ഷം ലിറ്റര്‍ പാലാണ് കര്‍ണാടക, ആന്ധപ്രദേശ്, മഹാരാഷ്ട്ര എന്നിവിടങ്ങളില്‍ നിന്ന് എത്തിച്ചത്. ഇതില്‍ 80 ശതമാനവും കര്‍ണാടക മില്‍ക്ക് ഫെഡറേഷനില്‍ നിന്നാണ് വാങ്ങിയത്. സംസ്ഥാനത്ത് ദിവസം 13 ലക്ഷം പാലാണ് പൊതുവില്‍ ഉത്പാദിപ്പിക്കുന്നത്.

ഓണവിപണി മുന്നില്‍ കണ്ട് പാലും തൈരും മറ്റ് ഉല്‍പ്പന്നങ്ങളും സുഗമമായി വിതരണം ചെയ്യുന്നതിന് മില്‍മ കൃത്യമായ പദ്ധതികള്‍ ആസൂത്രണം ചെയ്തു നടപ്പാക്കിയിരുന്നുവെന്ന് കേരള കോ-ഓപ്പറേറ്റീവ് മില്‍ക്ക് മാര്‍ക്കറ്റിങ് ഫെഡറേഷന്‍ (കെസിഎംഎംഎഫ്) ചെയര്‍മാന്‍ കെ എസ് മണി പറഞ്ഞു. സപ്ലൈകോയുടെ ആറ് ലക്ഷം കിറ്റുകളില്‍ 50 മില്ലി ലിറ്റര്‍ നെയ്യും വിതരണം ചെയ്തു. മില്‍മയുടെ റെഡി ടു ഡ്രിങ്ക് അടക്കമുള്ള പായസം കിറ്റുകളും മികച്ച വില്‍പ്പന രേഖപ്പെടുത്തി.

നേട്ടത്തിന് കാരണം മില്‍മയോടുള്ള വിശ്വാസം

ഉപഭോക്താക്കളുടെ വിശ്വാസവും ഗുണമേന്മയും വിതരണത്തിലെ കാര്യക്ഷമതയുമാണ് മില്‍മയുടെ റെക്കോര്‍ഡ് നേട്ടം സാധ്യമാക്കിയത്. വിതരണക്കാര്‍ മുതല്‍ ബോര്‍ഡ് ഓഫ് ഡയറക്ടര്‍മാര്‍ വരെയുള്ളവരുടെ കൂട്ടായ പ്രയത്നമാണ് നേട്ടത്തിന് പിന്നിലുള്ളത്. കൂടെ സപ്ലൈകോയുടെ ആറ് ലക്ഷം കിറ്റുകളില്‍ 50 മില്ലി ലിറ്റര്‍ നെയ്യും വിതരണം ചെയ്തു. മില്‍മയുടെ റെഡി ടു ഡ്രിങ്ക് അടക്കമുള്ള പായസം കിറ്റുകളും മികച്ച വില്‍പ്പന നടത്തി.

​കെ എസ് മണി ചെയര്‍മാന്‍ ,കേരള കോ-ഓപ്പറേറ്റീവ് 
മില്‍ക്ക് മാര്‍ക്കറ്റിങ് ഫെഡറേഷന്‍