ഓണത്തിന് മില്‍മ തിരുവനന്തപുരം മേഖലാ യൂണിയന് 37 കോടിയുടെ വിറ്റുവരവ്

തിരുവനന്തപുരം : ഓണക്കാലത്ത് മില്‍മ തിരുവനന്തപുരം മേഖലാ യൂണിയന് (ടിആര്‍സിഎംപിയു) റെക്കോഡ് വിൽപ്പന. പാലിന്റെയും പാലുൽപ്പന്നങ്ങളായ തൈര്, നെയ്യ് തുടങ്ങിയവയുടെയും വില്‍പ്പനയിലാണ് ടിആര്‍സിഎംപിയു മികച്ച നേട്ടം കൈവരിച്ചത്. ഉത്രാടദിനത്തില്‍ മാത്രം 13,37,471 ലിറ്റര്‍ പാലും 1,49,632 കിലോ തൈരുമാണ് തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളില്‍ വിറ്റത്.

31 മുതല്‍ വ്യാഴാഴ്ച വരെ 38,78,851 ലിറ്റര്‍ പാലും, 3,69,507 കിലോഗ്രാം തൈരുമാണ് വിറ്റത്. ഓണക്കാലത്ത് 345 മെട്രിക് ടണ്‍ നെയ്യും വിറ്റു. ഓണക്കാലത്ത് ഉൽപ്പന്നങ്ങളുടെ ആകെ വിറ്റുവരവ് 37 കോടിയാണ്. ഓണത്തിന് പാലിനും അനുബന്ധ ഉൽപ്പന്നങ്ങള്‍ക്കുമുള്ള അധിക വില്‍പ്പന പരിഗണിച്ച് തിരുവനന്തപുരം മേഖലാ യൂണിയന്‍ വിപുലമായ ക്രമീകരണങ്ങളാണ് നടത്തിയതെന്ന് യൂണിയന്‍ ചെയര്‍മാന്‍ മണി വിശ്വനാഥ്, മാനേജിങ് ഡയറക്ടര്‍ മുഹമ്മദ് അന്‍സാരി എന്നിവര്‍ അറിയിച്ചു.