മനോരമ കൊലക്കേസ്: പ്രതിക്ക് ജീവപര്യന്തം കഠിനതടവും പിഴയും

തിരുവനന്തപുരം: കേശവദാസപുരം മനോരമ കൊലക്കേസിൽ പ്രതി ബംഗാൾ സ്വദേശി ആദം അലിക്ക് ജീവപര്യന്തം കഠിനതടവ്. കൂടാതെ 90000 രൂപ പിഴയും ഒടുക്കണം. തിരുവനന്തപുരം അഡീഷണല്‍ സെഷന്‍സ് കോടതിയുടെതാണ് വിധി. കേസില്‍ പ്രതി കുറ്റക്കാരനാണെന്ന് കോടതി കണ്ടെത്തിയിരുന്നു.

2021 ലാണ് കേസിന് ആസ്പദമായ സംഭവം. കേശവദാസപുരത്ത് വീട്ടമ്മയെ കൊലപ്പെടുത്തി കിണറ്റിലെറിഞ്ഞ കേസിൽ ബംഗാൾ സ്വദേശി ആദം അലി അറസ്റ്റിലാകുന്നത് 2022ലാണ്. കൊലപാതകത്തിനു ശേഷം തമ്പാനൂരില്‍ നിന്ന് ട്രെയിനിൽ തമി‍ഴ്നാട്ടിലേക്ക് കടന്ന പ്രതിയെ ചെന്നൈയില്‍ വെച്ചാണ് പിടികൂടിയത്. മനോരമയുടെ കൊലപാതകവുമായി ബന്ധപ്പെട്ട സിസിടിവി ദൃശ്യങ്ങൾ പുറത്ത് വന്നതാണ് അന്വേഷണത്തില്‍ നിര്‍ണായകമായത്.

ഭാരതീയ ന്യായ സംഹിത 362 വകുപ്പ് പ്രകാരം ജീവപര്യന്തവും 50,000 രൂപയും, 449 പ്രകാരം 10 വർഷം തടവ് 10000 രൂപ പിഴ, 393 പ്രകാരം ഏഴുവർഷം തടവ് 10000 രൂപ പിഴ, 397 പ്രകാരം ഏഴ് വർഷം തടവ് 10000 രൂപ പിഴ, 201 വകുപ്പ് പ്രകാരം ഏഴുവർഷം തടവ് 10000 രൂപ പിഴ എന്നിങ്ങനെയാണ് ശിക്ഷ.

ശിക്ഷാ വിധി സംബന്ധിച്ച വാദം ഉച്ചയ്ക്ക് രണ്ട് മണിക്ക് നടക്കാനിരിക്കെ പ്രതി കോടതിയില്‍ നിന്ന് ഇറങ്ങിയോടിയിരുന്നു. കേസുമായി ബന്ധപ്പെട്ട് 2022ല്‍ പിടികൂടുമ്പോഴും പ്രതി ഇതുപോലെ രക്ഷപ്പെടാന്‍ ശ്രമിച്ചിരുന്നു. പിടിയിലാകുമ്പോൾ 21 വയസായിരുന്നു പ്രതിയുടെ പ്രായം.